Statne digitalne poskitki tež serbsce
Chrósćicy (SN). Sakska Rada za serbske naležnosće je so na dźěłowym posedźenju předwčerawšim w Chrósćicach na to dojednała, so za zapřijeće serbšćiny do digitalnych poskitkow swobodneho stata zasadźić. W konkretnymaj padomaj so gremij na ministerstwje za kultus a za nutřkowne wobroći.
Kaž gremij informuje, jedna so wo program Sophisto, kotryž je integrowany do sakskeho šulskeho portala a z kotrymž mjez druhim tež dalekubłanja wučerkow a wučerjow planuja, kaž tež online-formular sakskeje policije za wozjewjenje njeskutkow po digitalnym puću. We woběmaj njemóža so dotal wosebite serbske pismiki zapodać. W prěnim padźe tuž njehodźa so wopisanja serbskorěčnych dalekubłanjow korektnje podać. W tamnym zaručene njeje, serbske a hinaše wosobowe mjena z wosebitymi znamješkami prawje zapisać móc.
Postajenje Serbskeho zakonja, ze statnymi instancami serbsce komunikować móc, maja techniske wuměnjenja we wšitkich statnych poskitkach zaručeć.
Serbski sejm we wuměnje z SPD
Drježdźany (SN/at). Politikarkam a politikarjam stronskeho a frakciskeho nawodnistwa sakskeje SPD je wažne, zo na krajnej runinje naležnosće serbskeho ludu w jeho mnohotnosći wobkedźbuja. Tohodla chcedźa wuměnu ze zastupjerkami a zastupjerjemi wšelakich serbskich organizacijow intensiwnje pěstować. Krajna předsydka Kathrin Michel, frakciski předsyda Dirk Panter a serbskopolitiska rěčnica Sabine Friedel podšmórnychu w rozmołwje z Christinu Ruby, dr. Tomašom Wornarjom a Měrćinom Krawcom ze Serbskeho sejma, zo je nimo pěstowanja rěče a kultury widźomnosć serbskich zajimow w zjawnych diskursach wažny wobstatk za připóznaće serbskeje identity.
W srjedźišću wuměny předwčerawšim w Drježdźanach steješe w aktualnym koaliciskim zrěčenju CDU, Zwjazka 90/ Zelenych a SPD zakótwjeny přewod dialoga wo wjace prawach soburěčenja, sobutworjenja a sobupostajowanja serbskeho ludu. Kaž Serbski sejm zdźěli, je jeho delegacija ze swojeho wida pozadki a trěbnosć korporacije samozarjadnistwa předstajiła, wosebje jako nošer kubłanskeje awtonomije.
To a tamne (14.04.22)
W jutrownym času je 130 ze syna zdźěłanych zajacow w Silberbachu, wokrjes Hof, nastajenych. Wone su w kostimach, tak jako policisća abo wohnjowi wobornicy. Předstajene su wšelake sceny wjesneho žiwjenja, tak cyle aktualnje testowa stacija korony dla abo wuchowanska akcija wohnjoweje wobory. Jutry ma gmejnje Konradsreuth přisłušaca wjes z połsta dušemi wjace synowych zajacow hač wjesnjanow, a tójšto wopytowarjow.
Wulku konopjowu plantažu ze 415 000 rostlinami je španiska policija na sewjeru kraja našła. Dohromady pjeć wosobow bu při akciji w Navarrje zajatych, kaž zastojnicy wutoru zdźělichu. Sušene bychu rostliny hódnotu 30 milionow eurow na čornych wikach měli, dale předźěłane na cannabidiol (CBD) a dalše wudźěłki samo 100 milionow eurow. Ekstrakt CBD w medicinje wužiwaja.
Zwyšenje rentow schwalene
Berlin (dpa/SN). Zwjazkowe knježerstwo je dźensa planowanemu zwyšenju rentow 1. julija a dalšim změnam nastupajo starobne zastaranje ludźi přihłosowało. Na zapadźe Němskeje zwyša renty wo 5,35 procentow, na wuchodźe wo 6,12 procentow. Naćisk ministra za socialne naležnosće Hubertusa Heila (SPD) nimo toho předwidźi, zo dóstanje tři milionow dźěła njekmanych rentnarjow dołhodobnje wjace pjenjez.
Kritizuja wobraz knježerstwa
Berlin (dpa/SN). Po wotstupje zwjazkoweje swójbneje ministerki Anne Spiegel (Zeleni) su zastupnicy unije wustupowanje zwjazkoweho knježerstwa SPD, FDP a Zelenych kritizowali. „Wobraz knježerstwa w zjawnosći dawa přičinu k starosćenju“, rjekny parlamentariski jednaćel frakcije CDU/CSU w zwjazkowym sejmje Thorsten Frei nowinarjam. Při tym njeńdźe jenož wo to, zo je z Anne Spiegel prěnja ministerka hižo po štyrjoch měsacach wotstupiła. „Tež druzy ministrojo kabineta njejsu swojim nadawkam zrosćeni.“
Johnsom zapowědźi wotstup
Sakska socialna ministerka Petra Köpping (SPD, 2. wotlěwa) je ...
Kubicki kritizuje afront Ukrainy
Žadaja sej brónje
Dalše ruske nadpady na Mariupol
Kijew (dpa/SN). Ukrainske město Mariupol, wo kotrež tydźenje dołho wojuja, je minjenu nóc znowa cil ruskich atakow było. Kaž ukrainske wójsko zdźěla, su ruske jednotki tež přistaw města a woclownju nadběhowali. We wulkim industrijnym kompleksu so ukrainscy wojowarjo dale ruskim jednotkam wobaraja.
Wulkoměsto Charkiw na wuchodźe kraja su ruske jednotki znowa z kanonami wobtřěleli. Informacije wo wojowanjach njehodźa so njewotwisnje přepruwować. Ukrainska rańša rozprawa pak na to pokazuje, zo njeje so wojerske połoženje wulce změniło. Přichodne dny wočakuja na wuchodźe Ukrainy wulku rusku ofensiwu k zničenju tam zhromadźenych ukrainskich jednotkow.
W Mariupolu je najebać zničenja přeco hišće tójšto ciwilistow. Ludźo chowaja so w pincach a škitnych rumnosćach před bombami a granatami. Kaž zastupowacy měšćanosta Serhij Orlow zdźěla, je tam dotal wjace hač 20 000 ciwilistow žiwjenje přisadźiło. Tež tuta ličba njehodźi so njewotwisnje přepruwować.
Wjace personala za lěsnistwo
Dźěłarnistwo pokazuje na hoberske nadawki změny klimy dla
Budyšin (SN). Lěsnicy na mjezy poćežowanja: Wichory, suchota a škódniki njewobradźa jenož štomam wulki stres, ale wjedu tež k přežadanju tych, kotřiž w lěsnistwje dźěłaja. Na to skedźbnja industrijne dźěłarnistwo twar-agrar-wobswět we wuchodnej Sakskej – a žada sej wjace personala za branšu. „Wot lěsnika hač k nawodnicy rewěra – přistajeni maja w Sakskej ruce połnej dźěła. Runočasnje so wo to staraja, lěsy přichoda sadźeć, zo bychu so změnje klimy lěpje wobarać móhli“, rjekny wobwodny předsyda dźěłarnistwa Roland Müller.
