Abbas atentat zasudźił
Ramallah (dpa/SN). Palestinski prezident Mahmud Abbas je atentat z dwěmaj smjertnymaj woporomaj w israelskim pobrjóžnym měsće Tel Avivje zasudźił. „Morjenje palestinskich a israelskich ciwilistow połoženje dale pohubjeńša. Spytamy pak je polěpšić“, Abbas palestinskej powěsćerni Wafa rjekny. Pozdatny palestinski atentatnik bě wčera wječor na wopytowarjow hosćenca třělał a dwě wosobje morił. Policisća jeho hodźiny pozdźišo namakachu a zatřělichu.
Steinmeier w Finskej
Helsinki (dpa/SN). Zwjazkowy prezident Frank-Walter Steinmeier je dźensa na wopyt do Finskeje dolećał. W stolicy Helsinkach wočakowaše jeho prezident Sauli Niinistö. Hłowna tema rozmołwow bě wójna Ruskeje přećiwo Ukrainje, přez kotruž čuje so Finska wohrožena. Kraj ma 1 300 kilometrow dołhu mjezu z Ruskej. W Finskej wo tym diskutuja, hač njedyrbjał kraj swoju neutralitu spušćić a do NATO zastupić. Steinmeier chcyše prezidentej signalizować, zo by Němska tajku kročel podpěrowała.
Prěnja čorna sudnica
Scholz: Žadyn nowy pospyt
Zastaranje wěste
Von der Leyen po puću do Kijewa
Blamaža koalicije
Na prěni napohlad je wčerawši rozsud zwjazkoweho sejma přećiwo winowatostnemu šćěpjenju pře koronawirus triumf demokratije: Wjetšina zapósłancow najwyšeho zakonje dawaceho gremija je rozsudźiła – a hotowe. Na druhim boku je wuslědk wothłosowanja poražka, haj blamaža za knježerstwo. Zwjazkowy kancler Olaf Scholz njeje kmany, swoju knježerstwowu koaliciju – kotraž ma wjetšinu w sejmje – za sobu zhromadźić. A někotryžkuli by na městnje strowotniskeho ministra Karla Lauterbacha wotstupił.
Wčerawši dźeń pak tež pokazuje, kajki njestabilny zwjazk wona amplowa koalicija je, štož móhło so tež w druhich prašenjach jako fatalne wopokazać. Nic naposledk dźěše wo stronsko-politiske manewry. Opozicija chcyše na kóždy pad poražku knježerstwa, zo by swoju móc pokazała. Móžemy so jenož nadźijeć, zo ličby infekcijow dale woteběraja. Hewak změjemy nazymu, kajkuž ju nichtó wjace dožiwić nochce. Marko Wjeńka
To a tamne (08.04.22)
900 eurow před pjenježnym awtomatom namakała je 23lětna žona w sewjerosakskim Delitzsch a je pjenjezy pola policije wotedała. Kaž zastojnicy zdźěla, nětko za wobsedźerjom pjenjez pytaja. Policija potrjechenu wosobu prosy, so z dopokazom wo wotzběhnjenju na policajskim rewěrje přizjewić.
We wuliwje duše z porstom tčacy wostała je žona w šwicarskim Winterthurje pola Züricha, jako kupjel rjedźeše. Wohnjowi wobornicy dyrbjachu ju wuswobodźić, štož spočatnje ani tak lochko njebě. Hnydom tři jězdźidła wohnjoweje wobory běchu na akciji wobdźělene. Susod bě wołanje žony słyšał a policiju alarmował. Ani policistam ani wuchowanskim sanitetarjam so njeporadźi, problem rozrisać. Skónčnje dyrbjachu wobornikow přiwołać. Tući z pomocu piły wuliw rozrězachu a žonu njezranjenu wuswobodźichu.
Za reformu wólbneho prawa
Berlin (dpa/SN). Prěni króć po lońšich wólbach zwjazkoweho sejma je so dźensa komisija fachowcow zetkała, kotraž ma namjety k změnje wólbneho prawa zdźěłać. Wutworjenje komisije je wobstatk koaliciskeho zrěčenja SPD, FDP a Zelenych. Hłowna přičina je spochi přiběraca ličba zapósłancow parlamenta. Poprawom postajena ličba 598 zapósłancow je tak mjenowanych přewisowacych mandatow dla mjeztym na 736 rozrostła. Orban poskićuje Budapest
Budapest (dpa/SN). Madźarski ministerski prezident Viktor Orban je ruskemu prezidentej Wladimirej Putinej stolicu Budapest jako hosćićela jednanjow wo přiměr w Ukrainje poskićił. Tole je Orban po telefonaće z Putinom na nowinarskej konferency zdźělił. Putin bě Orbana zazwonił, zo by jemu k wólbnemu dobyću gratulował. Na to bě jemu Orban namjetował, zo móhli so jednanja z wobdźělenjom zwjazkoweho kanclera Olafa Scholza (SPD) a francoskeho prezidenta Emmanuela Macrona w Budapesće zahajić.
Centrum Mariupola zdobyty
Protestujo přećiwo wójnje w Ukrainje su so wčera tysacy ...
Šćěpić abo nic?
Kraje: Kóšty sej fairnje dźělić
Berlin (dpa/SN). Do dźensnišeho zetkanja zastupnikow Zwjazka a zwjazkowych krajow su sej kraje fairne rjadowanje kóštow zastaranja ukrainskich wójnskich ćěkancow žadali. Někotre centralne prašenja su dale wotewrjene a maja so rozsudźić, rjekny ministerski prezident Badensko-Württembergskeje Winfried Kretschmann (Zeleni). Dźe wo kóšty zaměstnjenja a zastaranja ludźi. Po nadpadźe Ruskeje na Ukrainu su sej statysacy ludźi do Němskeje wućeknyli.
Durinski ministerski prezident Bodo Ramelow (Lěwica) je za to, kóšty za ćeknjenych z etata za bjezdźěłnostny pjenjez Hartz IV a nic z etata za požadarjow azyla brać. Berlinska knježaca měšćanostka Franziska Giffey (SPD) rjekny nowinarjam: „Chcemy, zo Zwjazk, podobnje kaž 2015, kompletne kóšty přewozmje“.
Ministerscy prezidenća chcychu popołdnju ze zwjazkowym kanclerom Olafom Scholzom (SPD) wuradźować, kak měli kóšty za zastaranje ukrainskich ćěkancow rozdźělić. Nimo toho dźěše wo jich registrowanje a rozdźělenje.
