Drježdźany (dpa/SN). Sakska koalicija CDU, Zeleni a SPD chce zajutřišim w Sakskim krajnym sejmje próstwu wo přichodnym zastaranju z wodu zapodać. „Sćěhi klimoweje změny a přiběrace suche periody Saksku wužaduja, wšako ma zastaranje z wodu za ludnosć, ratarstwo a industriju zaručene być“, zdźěli wčera politikar Zelenych Volkmar Zschocke powěsćerni dpa w Drježdźanach. „Mamy ­hižo dźensa zamołwitosć, so wo naše dźěći a wnučki starać.“ To započnje so ze zachowanjom, z hladanjom a inwesticijemi do rěčnych zawěrow. Runje tak dyrbja bliske zastaranske móžnosće z mudrym ­managementom zaručene być, přede­wšěm brunicowe kónčiny.

Kamjenica (dpa/SN). Centralne stejnišćo ma přichodnje předewzaća a přistajenych w Sakskej nastupajo temy kaž pobrachowace fachowcy poradźować. Sakski hospodarski minister Martin Dulig (SPD) je wčera nowy centrum za zawěsćenje fachowych mocow a dobre dźěło (ZEFAS) w Kamjenicy wotewrěł. Tak bu předewzaće koaliciskeho zrěčenja sakskeho knježerstwa zwoprawdźene, zdźěli sakske hospodarske ministerstwo.

Martin Dulig na wotewrjenju wujasni, zo su falowace dźěłowe mocy wobknježaca tema hladajo na přichod kraja. Nic jenož za předewzaća je problem, jeli městno kolegi, kotryž so na wuměnk po­da, znowa wobsadźić njemóža. „Nadawki dyrbja dale spjelnjene być. A tuž je to poćeženje za wšěch přistajenych“, Dulig rozłoži.

ZEFAS ma firmy hladajo na praktiske prašenja kaž připućowanske postajenja poradźować, jeli chcedźa fachowcy z wukraja přińć. Dale ma stejnišćo pomhać, zo so předewzaća jako atraktiwni dźěłodawarjo etablěruja. Přistajeni móža so z tarifowymi prašenjemi na ZEFAS wobroćić. Zaměr ma być, pomocy potrěbnym poskitki w Sakskej wuwědomić.

Dokelž njeje rentnarski porik swoju koronowu pokutu zapłaćił ma so dźensa před Hamburgskim sudnistwom zamołwić. Wuměnkarka wšak njedowidźi, zo mataj wona a mandźelski 178,50 eurow za wužiwanje nuznika w pjekarni zapłaćić. Tam wona w juniju 2021 kontaktny formular w zwisku z pandemiju dospołnje wupjelniła njeje. Pad je wjele njezrozumjenja wubudźił. Pjekarnja chcyše samo pokutu rentnarjow přewzać a zapłaćić.

Swójba kačkow je krótke zawěranje zwjazkoweje awtodróhi A 6 pola Nürnberga zawiniła. Mać z cyłkownje dźewjeć ćipkami je so na awtodróhu zabłudźiła. Zastojnicy wobchadneje policije su tuž dróhu za něhdźe 20 mjeńšinow zawrěli a tak pjeriznu wuchowali. Pad stany so na zbožo sobotu dopołdnja, jako wjele awtow po puću njebě. Tohodla njeje k wjetšim wobchadnym haćenjam dóšło.

Jerusalem (B/SN). Po dwěmaj lětomaj přestawki swjećachu 24. apryla zaso orto­doksne jutry w swjatym kraju. Israelska policija pak postaji w starym měsće Jerusalema, wosebje w Cyrkwi Božeho rowa, krućiše přistupne wobmjezowanja hač samo za čas koronapandemije. Město dotalnych 10 000 wobdźělnikow, smědźeše so jenož 4 000 ludźi na centralnych swjatočnosćach wobdźělić. Wo wjele mjenje putnikow wobdźěli so z Ukrainy a Ruskeje, za to wjace koptiskich křesćanow z Egyptowskeje. Wjeršk ortodoksnych jutrow, kotrež so po starym Julianskim kalendrje lětsa tydźeń po jutrach w zapadnych cyrkwjach woswjeća, bě jutrownu sobotu wječor prastara liturgija „Swjateje swěcy“.

Žiwa ekumena