Widźał, słyšał, napisał (20.05.19)
Awtor dźensa
André Strelow
Wot soboty mamy noweho mištra w zwjazkowej koparskej lize. Haj, njeje ćežko wuhódać, wo koho so tu jedna. Sedmy raz za sobu poradźi so to mustwu FC Bayern Mnichow. Bilanca je wězo wurjadna, pokazuje pak tež, kak wostudła liga je. Znajmjeńša traješe napjatosć lětsa hač do poslednjeho hrajneho dnja. Tajku konstelaciju přihladowar hižo dołho dožiwił njeje. Přiwšěm so wosebje čorno-žołty fan abo kopar praša, čehodla njezamóchu sej hrajerjo BVB Dortmunda titul zawěsćić.
Wosobinsce wjeselu so za cyłk RB Lipsk, kotryž hraje klětu znowa na europskej runinje w champions league. Zašłe lěto běch raz w Lipšćanskim stadionje a dožiwich tam dobyće přećiwo FC Porto. Snano je tež raz duel přećiwo Lionelej Messijej wot FC Barcelony abo Cristianej Ronaldej wot Juventusa Turin móžne, čehodla nic!?
W druhej lize su so koparjo Dynama Drježdźany na kóncu sezony hišće raz stopnjowali a tak zestupej zadźěwali. Diskrepancy a wušparanja, runje hladajo na wotchad wrotarja Markusa Schuberta, su mjerzace a njetrjebawše.
Widźał, słyšał, napisał (13.05.19)
Awtor dźensa
Tadej Cyž
W jednotliwych koparskich klasach so hrajne lěto pomału nachila. Wo tym, štó postupi abo zestupi, je nimale wšudźe hižo rozsudźene, a jednotliwe zjednoćenstwa planuja hižo za nowu sezonu. Tak započina so zdobom zaso čas wulkich spekulacijow. W tym zwisku je so trenar Tomaš Henčl hižo jasnje wuprajił. Wón zakónči swój nadawk pola prěnjeho mustwa FC Hornja Łužica Neugersdorf. Henčl je w zašłym času tež ideju nastorčił, zo dyrbjeli mustwa z Hornjeje Łužicy wušo hromadźe dźěłać. Jenož tak hodźi so wěsty niwow kopańcy w regionje dołhodobnje zaručić. Wo tym měli towarstwa na kóždy pad rozmyslować.
Widźał, słyšał, napisał (29.04.19)
Awtor dźensa
Jan Hrjehor
Punt sykaneho Pětra, nyšpor jutrońčku w Kulowje, kliny za skakanje a zababjeny běhar w Pěskečanskim lěsu – to su štyri hesła, kotrež su mje w zašłymaj tydźenjomaj zaběrali, a kotrež maja wšitke poćah k sportej a tuž tež k dźensnišej sportowej kolumnje.
„Jano! Sym ze Siegmarom, ty tla wěš, Wätzlichom, hišće před měsacom rěčał, a to je wón mi prajił, zo je sej wón duel Rakecy – Porchow we wokrjesnej wyšej lize wobhladał. ‚Cyle špatny niwow‘ je wón mi dźeń po tym na kromje hrajnišća při partiji Ramnow – Ralbicy prajił, a nětko je wón hižo zemrěty“, rozprawješe mi do jutrow Róžeńčan Stanij Suchi, kiž bě z Wätzlichom spřećeleny. Njetraješe dołho, to namakam w swojim mejlowym kašćiku powěsć sportoweho přećela Heinza Noacka z Wulkeje Dubrawy, kotryž so mi wuskorži, zo je něhdyša legenda Drohotki Ramnow a Dynama Drježdźany poprawom hišće raz z puntom sykaneho Pětra do Wulkeje Dubrawy na interview přijěć chcyła. Zeleny štwórtk pak je Siegmar Wätzlich na prawdu Božu wotešoł.
Widźał, słyšał, napisał (24.04.19)
Awtor dźensa
Toni Ryćer
Widźał, słyšał, napisał (15.04.19)
Awtor dźensa
Tomaš Faska
Cyle sprawnje, lubi přećeljo kožaneje kule, za kotrejž 20 muži honi, zo bychu jón do přećiwniskich wrotow dóstali, a dwaj wrotarjej spytataj tomu zadźěwać! Štó z was zwěri sej twjerdźić, zo dokładnje wě, kotre němske koparske towarstwo, kotrež hišće dźensa wobsteji, je najstarše? Mi znajmjeńša wone, kotrež smě na najdlěše towarstwowe stawizny zhladować, nihdy nanihdy njeby do myslow přišło. Ja wo nim dotal ani ničo njewědźach. Je to Berlinska BFC Germania 1888. Ličba w mjenje hižo přeradźa, w kotrym lěće bu załožena, cyle dokładnje 15. apryla.
Widźał, słyšał, napisał (01.04.19)
Awtor dźensa
Jan Hrjehor
Widźał, słyšał, napisał (25.03.19)
Awtorka dźensa
Halena Jancyna
Njedawno słyšach w radiju interview z Alisu Fatum. Znajeće ju? Wona je dwójna swětowa mišterka, wobaj titulej wudoby sej w Murmansku. Nětko so zawěsće prašeće, w kotrej sportowej disciplinje da!? – na, w lodowym płuwanju, němsce Eisschwimmen. Dokelž je mi tale ekstremna sportowa družina njeznata, sym so raz w interneće wobhoniła.
W ruskim Murmansku su njedawno swětowe mišterstwa w lodowym płuwanju přewjedli, a to w třoch disciplinach. Woda měješe temperaturu wokoło nule, štož je tež za nazhonitych płuwarjow ekstremnje zyma. Za němskich sportowcow pak bě to po zdaću runje prawa temperatura, dokelž docpěchu jako stafla 4×250 m wólny stil nowy swětowy rekord. W 12:08:37 min wudoby sej kwartet titul před Pólskej a Ruskej. Za Němsku startowaca štwórka Alisa Fatum, Christof Wandratsch, Stefan Runge a Tobias Jäkle wyskaše po dobyću. W kralowskej disciplinje 1 000 m wudoby sej płuwarka z Lipska Alisa Fatum druhi titul. Němski team bě najwuspěšniše mustwo na swětowych mišterstwach. Jeničce pola muži přesadźi so Peter Stojčew z Bołharskeje, a to w 12:10:81 min na 1 000 m.
Widźał, słyšał, napisał (18.03.19)
Awtor dźensa
Clemens Šmit
Čim starši, ćim nazhonićiši sy a ćim lěpje móžeš so ze swojej rutinu tež přećiwo młódšim kontrahentam přesadźić – poprawom logiska to formula. W kopańcy je samo rěč wo ominoznej najlěpšej starobje, hdyž hrajerjo na kóncu karjery hišće raz wosebite wukony docpěwaja. Njerěkaš-li pak runje Pizzaro, Buffon abo Zynda, sy dźensa hižo z 30 lětami swój cenit karjery překročił.
Widźał, słyšał, napisał (11.03.19)
Awtor dźensa
Jurij Bjeńš
Swój dźensniši nastawk wěnuju wosebje młodźinskim trenarjam serbskich koparskich cyłkow. Tójšto lět trenuju nětko hižo młodźinu F Sokoła Ralbicy/Hórki. Najbóle mje spokoja, hdyž wobkedźbuju wuwiće jednotliwcow. Tajnje so potom přeco nadźijam, zo tež pozdźišo raz pola 1. mustwa Sokoła Ralbicy/Hórki runje tak wo dypki wojuja kaž pola młodźiny F. Realita wšak je hinaša. Mnozy po někotrych lětach prosće wjac kopańcu njehraja. Maja hinaši hobby, najčasćišo pak faluje motiwacija, dokelž sylni koparjo na přikład do Kamjenca abo Budyšina woteńdu a tak so mustwo roztorha a kwalita so pozhubi.
Widźał, słyšał, napisał (04.03.19)
Awtor dźensa
Křesćan Korjeńk
„Póstnicam sym klawn so přehot’wał a wšě mje spóznaja ...“ Takle spěwaja Lózy hólcy, poćahujo so na pjaty počas a wosebity fluidum w Kulowje. Haj, dźensa mamy róžowu póndźelu a cyle wěsće knježi w Kulowje wulkotna atmosfera. Wo tajkej rozprawjeć je stajnje rjana wěc, to cyle wěsće kóždy redaktor rady čini.
Jako dóstach kónc zašłeho lěta plan pisanja, přemyslowach, wo čim drje budu móc čitarjam rozprawjeć. Dźensa tu sedźu a myslu na słowa soburedaktora: „Temow je wjele: karusel trenarjow so wjerći, koparjo su dale a bóle dźiwadźelnicy a diskutowarjo, widejowy dopokaz, doping w zymskim sporće je mjeztym tež Němsku docpěł, wulkotne wuspěchi našich skakarjow, impozantna serija Łužiskich liškow, Sokołski turněr wo pokal Domowiny a politiske nastajenje sponsorow někotrych łužiskich mustwow.“
