Widźał, słyšał, napisał (23.05.16)
Awtor dźensa
Toni Ryćer
Što by sport był bjez zahoritych přiwisnikow? Někotryžkuli wuběrny wukon njehodźał so bjez podpěry přihladowarjow docpěć. Tež hdyž je to husto z wulkimi wudawkami zwjazane, wo trěbnym swobodnym času nochcu scyła rěčeć, jězdźa ludźo rady sta kilometry, zo bychu swojim idolam bliscy byli a jim přiwyskali. Podobnje budźe to w juniju, hdyž so Serbja do Južneho Tirola nastaja, zo bychu łužiskej koparskej mustwje pohonjeli. Wězo njeda so to přirunać z wulkimi wubědźowanjemi, kaž na přikład w zwjazkowej kopańcy abo w motorsporće, zmysł pak je samsny a na wotpowědnej euforiji njebudźe falować, toho sym sej wěsty. Nimo toho da so wulět do Italskeje zwjazać z dowolom w krasnej krajinje. Móžu to woprawdźe horco doporučić. Znaju kónčinu wokoło Puster-Garder- a Ahrntala, hdźež so europeada wotměje, z někotrych zymskich dowolow. Bohužel njemóžu sobu. Sym runje w tym času na motorsportowych wubědźowanjach w Francoskej a Němskej zasadźeny.
Widźał, słyšał, napisał (17.05.16)
Awtor dźensa
Tomaš Faska
To njeběch po zazběhu lětušich swětowych mišterstwow w lodohokeju hižo wočakował. Němska wubranka je so za štwórćfinale kwalifikowała. A to najebać šwarnu ličbu zranjenych hrajerjow. Bjez štyrjoch kruće w mustwje zakótwjenych muži wudobychu sej chowancy trenarja Marca Sturma přećiwo Madźaram ze zasłuženym 4:2 doskónčny skok do koła poslednich wosom cyłkow. Při tym bě to poprawom hižo dočasnje zaručene, dźak dobyću Kanady přećiwo Francoskej. Ale wo to pokoj.
Nětko čaka na němsku wubranku wězo wjetši kaliber – pak hosćićel Ruska pak Čěska pak Šwedska. Kóžde z tychle narodnych mustwow drje Němcam puć do přichodneho koła bjez problemow zarući. Wšo druhe by sensacija była, ale tajkich wšak runje w sporće maš. Wočakńmy!
Što w interneće runje čitam? Miroslav Klose, něhdyši němski narodny kopar, so nawróći? Dźenik Süddeutsche Zeitung znajmjeńša twjerdźi, zo je sej Eintracht Frankfurt 38lětneho rodźeneho Polaka, z 71 wrotami najwuspěšnišeho třělca němskeje wubranki, „kupił“.
Widźał, słyšał, napisał (09.05.16)
Awtor dźensa
Jan Hrjehor
Gangster – swětowy mišter w Róžeńće na wopyće! Tak abo podobnje móhła so krótka rozprawa wo konju započeć, kotryž bě lětsa prěni raz jutrowny kóń. Meterwosomaštyrceći wysoki šumjel bě so nam na februarskim wopyće na jěchanskim dworje blisko Magdeburga hakle krótko do wotjězda pokazał, jako jeho młoda jěcharka na dworje sedłaše. Z konjom Bamke mějachmy hižo dalšeho šumjela za jutry 2016 wupytaneho. Tak hodźeše so šumjel-wurězanc Gangster cyle derje ke koble. Nic runjewon po wysokosći, za to pak po charakteru a wulkosći za křižerja-nowačka. Bamke bě dźesać centimetrow wyši. Wobsedźerka nam do wotjězda hišće wosebite mjeno konja přeradźi, zo bychmy wulki pjatk w Róžeńće tež wědźeli, štó z kim a tak dale. Jako słyšachmy mjeno Gangster, wubudźi to w nami tróšku brjušebolenje, wosebje w nowačku. Wobsedźerka pak změrujo doda, zo bě Gangster raz gangster, zo pak to dźensa hižo njeje, wšako zasadźeja jeho w jěchanskim wukubłanju dźěći a młodostnych.
Widźał, słyšał, napisał (02.05.16)
Kelko finalnych hrow je trěbnych, zo bychu volleyballistki Drježdźanskeho SC dubl docpěli? Wotmołwu hižo wěm – wuslědk zańdźeneje hry tež, ale što so dźensa w Drježdźanskej Margon-arenje stawa, to tučasnje njewěm. Chowanče trenarja Waibla dyrbja dźensnišu hru přećiwo Stuttgartej dobyć, zo bychu so z mištrom stali.
Widźał, słyšał, napisał (25.04.16)
Awtor dźensa
Clemens Šmit
Wšojedne, wo kotrym kwasu w Serbach rěčimy, sy-li tam něhdźe z hosćom, móžeš sej dweju wěckow wěsty być. Sprěnja, zo sydatej k wobjedu kwasna poliwka a na to chrěn z howjazym mjasom. Zdruha, zo słyšiš na tajkim swjedźenju wjace měnjenjow ekspertow a posudkow kołowokoło swěta kopańcy, hač by sej tajkich w nowinach a interneće načitać móhł. Podobnje dźěše so tež mi. Běch do Šunowa na slěborny kwas Ralbičanskeje koparskeje korifeje a jeho mandźelskeje prošeny. Wězo je tam wo kopańcu šło, a hdys a hdys padnyštej tež słowje europeada a wubranka.
Widźał, słyšał, napisał (18.04.16)
Awtor dźensa
Jurij Bjeńš
Widźał, słyšał, napisał (11.04.16)
„Hišće jónu, hišće raz widźeć jeju wóčkow kras´ a škleńčku wupić na strowje, kaž ...“, tele słowa Muskeho chóra Delany drje wjetšina z was čitarjow derje znaje a zwěrju sej twjerdźić, zo je spěw po słowach Jurja Šěna zdawna hymna spěwarjow. Spěwarjow-sportowcow drje je w tutym cyłku tež někotrych, najskerje nic w tak bohatej ličbje. A tola sej někotryžkuli z nich, z dynamowcow, praji tak „Hišće jónu, hišće raz“, a potom wupijemy sej škleńčku na postup do druheje koparskeje ligi Němskeje. Po sobotnej hrě so cyle wěsće mnozy prašachu, čehodla nic hižo dźensa. Fantastiski publikum, rjane wjedro a přećiwnik bjez starosćow, z trenarjom, pochadźacym z Drježdźan – postup perfektny? Ně, nažel tomu teoretisce tak njebě, hačrunjež je wšo dwělowanje ryzy teorija. Pjatnaće dypkow předskoka a super wrotowy poměr, što měło so tu hišće stać? Tola swjedźenja njebě, a tuž hišće raz wšě mocy koncentrować na hru w Magdeburgu. Abo chcedźa dynamowcy hakle tydźeń pozdźišo ze swojim přiwiskom postup swjećić?
Widźał, słyšał, napisał (04.04.16)
Awtor dźensa
Ludwig Zahrodnik
Njedawno sym wo tym čitał, zo su při sněhakowarskim lětanju hižo dźensa dalokosće nad 300 metrow móžne – teoretisce! Hladajo do sportowych stawiznow zwěsćich, zo bě před 80 lětami Awstričan Sepp Bradl na skakanišću w słowjenskej Planicy ze 101 metrom swětowy rekord docpěł. Kajke je to do dźensnišeho razantne wuwiće!
Mnozy so prašeja, hač budu „slěborne kłoki“ Mercedesa dale awtowe wubědźowanje formule 1 dominować, abo hač so Ferrarijej wokoło Vettela poradźi zastatk nachwatać. Mercedes bě hižo před 80 lětami nawjedowaca awtowa značka na swěće. Tak bě na přikład Hans Stuck w měrcu 1936 wjacore swětowe rekordy spěšnosće nastajił, a w aprylu samsneho lěta doby němski Rudolf Laracciola Wulke myto Monaca.
Kónc februara je Täve Schur 85. narodniny swjećił. Jeho wuspěchi w 1950tych lětach to předewšěm běchu, kotrež nas tehdy zahorichu. Njezapomnite wostanu rozprawy Heinza Floriana Oertela wo měrowych jězbach. Schur je ju dwójce dobył a dwójce sta so tež ze swětowym mištrom. Za mnohich nadróžnych kolesowarjow je wón z přikładom.
Widźał, słyšał, napisał (29.03.16)
Awtor dźensa
Michał Nuk
Widźał, słyšał, napisał (21.03.16)
Awtor dźensa
André Strelow
Přiwisnicy kopańcy dožiwjeja tučasnje horcu fazu z rozsudami na mjezynarodnej a zwjazkowej runinje. Najprjedy su so Mnichowčenjo w kralowskej lize hakle w poslednjej mjeńšinje do podlěšenja wuchowali. Thomas Müller z hłójčkowanym bulom bě jim blamažu zalutował. Wjeselo běše wězo jara wulke. W přidatnym hrajnym času Bayerojo hišće dwójce do čorneho trjechichu a su so tak doskónčnje za přichodne koło kwalifikowali. Tam čaka poměrnje lochki nadawk. Benfica Lissabon je a budźe jenož mjezystacija po puću do połfinala. Wšitko druhe by jara wulke přesłapjenje było. Koparjo z Wolfsburga, kotřiž su so přećiwo KAA Gentej přesadźili, dóstachu porjadny kaliber přilosowany. Real Madrid, najwuspěšniši klub we wubědźowanju, budźe najprjedy z hosćom w Němskej. Nadawk je nimale njerozrisajomny. Přiwšěm je to za Heckingowe mustwo najwjetši towarstwowy wuspěch.
