Datowu banku předźěłali
Towarstwo SKT dźěławosć změniło, ale přiwšěm dale z partnerom było
Budyšin (SN/BŠe). Dźěławosć towarstwow w času koronapandemije je chětro wobmjezowana. Wšako dyrbja runje wone hižo měsacy dołho wosobinske kontakty pomjeńšić. Tuchwilu su zwiski k čłonam předewšěm telefoniskeho a pisomneho razu, přiwšěm chcedźa aktiwity dale wjesć.
Minjeny tydźeń wutoru pak su so čłonojo towarstwa Serbski kulturny turizm (SKT) prěni raz po dlěšim času we Wojerecach schadźowali, wězo pod wěstotnymi postajenjemi. „Fokus dźěławosće je so za čas koronakrizy trochu změnił. Tak wužiwachmy minjene měsacy za to, našu datowu banku předźěłać a aktualizować kaž tež postajenjam datoweho škita přiměrić“, předsyda SKT Pětr Brězan wujasnja. Hewak telko chwile za tajke wěcowne dźěło njeje, tuchwilna pandemija pak zmóžnja intensiwne rozestajenje.
Dale dźěła towarstwo zhromadnje z fachowcami na nowej internetnej stronje. Nimo toho hotuje so nětko hižo na jubilej 25lětneho wobstaća, kotryž chcedźa klětu woswjećić. Tak SKT nětko prěnjorjadnje ideje zběra.
Přiběracemu naprašowanju wotpowědować
Budyšin/Kinspork (SN/BŠe). W časach koronakrizy su powěsće z hospodarskeho wobłuka skerje negatiwneho razu. Cyle hinak informuje nětko Budyske předewzaće Debag Deutscher Backofenbau, kotrež inwestuje šěsćcyfrowu sumu do stejnišća w Kinsporku, hdźež ma nowa produkciska hala nastać. Přichodnje chcedźa tam pjecy třoch najwoblubowanišich modelow monsun-mini, monsun-city a helios twarić. W Budyšinje změja potom zaso wjace městna, kotrež je za serijowu produkciju předewšěm wulkopjecow nuznje trěbne.
„Rozšěrjenja našich kapacitow dla móžemy zhotowjenske procesy w Budyšinje a Kinsporku eficientnišo wuhotować. Tak móžemy zdobom hač do 40 procentow wjace pjecow za wobchody produkować, a rosćacemu naprašowanju wotpowědować. Runočasnje naši kupcy hižo tak dołho na swoje skazanki čakać njetrjebaja“, rozłožuje jednaćel Debag Oliver Theiß.
Kamjenc „wutroba globalneje syće“
Swětowy koncern Daimler chce so hladajo na elektromobilitu dale wuwić, při čimž Kamjenski zawod accumotive centralnu rólu hraje. Jednu wažnu značku nastupajo pak konkurenca tuchwilu prědku leži.
Kamjenc (UM/SN). Mercedes-Benz AG chce w swojimaj Kamjenskimaj zawodomaj firmy accumotive bórze lětnu produkciju poł miliona baterijowych systemow docpěć. To je něhdźe telko, kelkož su w Kamjencu wot spočatka produkcije w lěće 2012 cyłkownje zhotowili. Hižo wot wotewrěća Kamjenskeho druheho zawoda před lětomaj tam kapacitu zaměrnje a krok po kroku stopnjuja“, wuswětla přisłušna nowinska rěčnica Mercedes-Benz Madeleine Herdlitschka.
Łódź „Klara“ sypa wapno do Sedlišćanskeho jězora
Sedlišćo (AK/SN). Kwalitu wody we łužiskich jězorach bywšich jamow Łužiska a srjedźoněmska towaršnosć hórnistwoweho zarjadnistwa (LMBV) poněčim polěpša. Wčera je swoju saněrowansku łódź „Klara“ prěni raz na Sedlišćanskim jězoru zasadźiła. „Hač do septembra trjebamy tam najprjedy něhdźe 10 000 tonow běłeho drobneho wapna. Ličimy ze wšědnje šěsć do sydom wjezbami nakładneho awta“, podšmórny Michael Matthes, wotrjadnik projektoweho managementa LMBV.
Sedlišćanski jězor je do pjeć sektorow rozrjadowany, po kotrychž łódź „Klara“ wapno rozdźěla. Te padnje ze sila najprjedy suche do dozěrowanskeje připrawy. W njej so wapno a woda změšatej. Wo přidatne rozdźělenje staratej so łódźnej šrubaj. Tak docpěwaja intensiwne změšenje wapna we wodźe, kotrež tuž wjele efektiwnišo wužiwaja, zo bychu jězor neutralizowali. Tuchwilna pH-hódnota Sedlišćanskeho jězora je 3, krok po kroku chcedźa marku 7,0 docpěć.
Wapno za lěpšu wodu
Čas do prózdnin wužiwać
Drježdźany (SN). Koronakrizy dla je situacija na wukubłanskich wikach w rjemjeslniskim wobłuku lětsa jara napjata. W zawodach wokrjesow Mišno, Budyšin, Zhorjelc, Sakska Šwica-Rudne horiny kaž tež w sakskej stolicy Drježdźanach je dotal jenož 574 młodostnych wukubłanske zrěčenje, kotrež so w pózdnim lěću zahaji, podpisało. To je 89 zrěčenjow mjenje hač loni w samsnym času a wučinja zdobom 13,4 procenty.
„Zadźerženje ludźi za čas koronapandemije so w rjemjesle wotbłyšćuje. Najebać wolóženja woni zdźeržliwje do přichoda planuja“, praji jednaćel Drježdźanskeje rjemjeslniskeje komory Andreas Brzezinski. Temu powołanska orientacija su młodostni ze zawrěćom šulow kaž tež z wotprajenymi zarjadowanjemi dospołnje z fokusa zhubili. Brzezinski skedźbnja na to, zo měli šulscy wotchadnicy a zawody čas do lětnich prózdnin wužiwać a so w móžnym praktikumje zeznać. Přehlad swobodnych wukubłanskich městnow podawa rjemjeslniska komora na swojej internetnej stronje, hdźež je za wuchodnu Saksku wjac hač 230 městnow wupokazanych.
Wjele naprašowanjow za dowolom we Łužicy – swjatki su hišće ...
Budyšin/Zły Komorow (SN/BŠe). Swjatki steja před durjemi, a mnozy wužiwaja podlěšeny kónc tydźenja za krótkodowol. Dypkownje su tuž hotele, pensije a dowolowe bydlenja za nich swoje durje zaso wotewrěli.
Łužica móže přidobyć
Twarstwo před ćežkimi časami
Berlin (dpa/SN). Wulkeje ličby nadawkow dla je twarska industrija Němskeje dotal dosć derje přez krizu koronawirusa dla přišła. W přichodnych měsacach pak budźe połoženje widźomnje ćeše. „Dožiwjamy hižo měsac dołho ekstremnje woteběracu ličbu nowych twarskich nadawkow“, rjekny prezident hłowneho zwjazka němskeje twarskeje industrije Peter Hübner wčera w Berlinje. „To njejsu wokomiknje žane dobre wuhlady.“ Po informacijach Hübnera „je ličba twarskich nadawkow w prěnim kwartalu porno lońšemu wo 30 do 40 procentow spadnyła. A bohužel to dale dźe.“
Njewidźany rozmach twarstwa minjenych lět so abruptnje kónči. Zwjazk twarskeje industrije trochuje, zo wobroty firmow lětsa pola 135 miliardow eurow stagněruja. Minjene lěta bě kwota rozrosta zdźěla nad dźesać procentami była. Hišće w prěnim kwartalu běchu dochody branše wo dźewjeć procentow wyše hač loni w samsnym času. Mjeztym, zo drje wostawaja nadawki w bydlenjotwarje dale stabilne, su mnohe priwatne a zjawne nadawki wotpadnyli. Komuny maja krizy dla hoberske straty dawki nastupajo.
Běła flota wohrožena
Drježdźany (dpa/SN). Hižo do koronakrizy zapozdźeneho zahajenja lětušeje sezony dla su so sobudźěłaćerjo Sakskeho łódźnistwa parnikow alarmowani pokazali. Woni maja tradiciske předewzaće za wohrožene, po tym zo njeje swobodny stat přilubjeny kredit w meji přepokazał, wobžarowaše rěčnik předewzaća po krizowym zetkanju sobudźěłaćerjow wčera na łobjowym parniku „Dresden“. Tak njemóže předewzaće mzdy a socialne wotedawki płaćić, łódźe a firmowe wotnožki z wjacorymi stami dźěłowych městnow su wohrožene. Personal kritizowaše wahanje a namołwi swobodny stat, swoje přilubjenje dodźeržeć.
Niłka woda a z njej zwjazane woteběrace dochody běchu Drježdźanskemu tradiciskemu a turistiskemu předewzaću hižo loni deficit wunjesli. Hač do awgusta 2020 maja cyłkowny koncept za nowe wusměrjenje předewzaća zdźěłać. W awgusće 2019 běchu towaršnicy strukturu financowanja změnili. To bě wuměnjenje za dalše pjenjezy bankow a Swobodneho stata Sakskeje. Běła flota wužiwa dźewjeć historiskich parnikow a dwě modernej pasažěrskej łódźi.
