Budyšin (SN/MiR). Budyska Sundowner-bara wotewrje zajutřišim, srjedu, zaso swoje durje. Cyłe dźewjeć tydźenjow, wot 30. junija hač do 29. awgusta, chce iniciator Beno Brězan ze swojim mustwom srjedu, štwórtk a njedźelu wot 17 do 22 hodź., pjatk a sobotu hač do 23 hodź. ­wopytowarjow při rjanym wjedrje zapleńčić. Wospjet změje za to młodostnych, mjenujcy Budyskich serbskich gymnaziastow a studentow, poboku. Tak njebudu woni jenož hosći posłužować, ale tež ćežke kisty, blida a stólcy nosyć, wšitko sporjadkować a tak dale. Połdra hodźiny do wotewrjenja a runje telko časa­ po tym na nich dosć dźěła čaka. „Sym ­jara zbožowny, zo mam tónkróć tež cyły rjad młodźencow wjace hač zašłe lěta­, kotřiž so nimo holcow lětsa na dyr­domdej Sundowner na najrjeńši Budyski balkon podadźa“, Beno Brězan wuswětla. Nowinka je přistup na zahrodu. Wot Mosta měra to twarskich dźěłow w Serbskim ludowym ansamblu dla móžno njeje. Tež na Rybarskej při SLA je da­le twarnišćo. Tak dóstanu so tam hosćo přez poměrnje schowane durčka při Rybarskej ze směra Stareje wodarnje abo přez dwór SLA a w nim zaměstnjenu Röhrscheidtowu ba­štu­.

Drježdźany (SN/CoR). W nadawku Drježdźanskeho Fraunhoferskeho instituta za keramiske technologije (IKTS) a systemy zdźěłany požadanski film „Fabrika přichoda Łužica – wotmołwy na globalny hłód za resursami“ je nětko zjawnje w interneće přistupny. W třoch mjeńšinach předstaja widejo zakładnu ideju wulkoslědźerskeho centruma za wodu, energiju a zežiwjenje we Łužicy.

Z namjetom „Fabrika přichoda Łužica“ wobdźěli so konsorcij – su to Fraunhoferska towaršnosć, Techniskej uniwersiće Drježdźany a Freiberg, Wysoka šula za techniku a hospodarstwo Drježdźany a Wysoka šula Žitawa/Zhorjelc – na idejowym wubědźowanju zwjazkoweho ­ministerstwa za kubłanje a slědźenje (BMBF) „Wěda twori perspektiwy za region!“. Zaměr wubědźowanja je, najlěpše koncepty za wulkoslědźerskej centrumaj we łužiskim kaž tež srjedźoněmskim brunicowym rewěrje namakać.

Hdyž wokrjesny zarjad za dohladowanje žiwidłow a weterinarstwo rězniskemu zawodej termin staja, zo by njedostatki w swojej rězarni wotstronił, potom je to alarmowacy signal. Wězo nanuzuje so prašenje, hač su zastojnicy snano přesprócniwi? Abo mějachu woni dosć porokowacych faktow, kotrež proste „dale tak“ pod wobstejacymi wuměnjenjemi pod aspektom hygieny wuzamkuja? Hdyž to přitrjechi, njebě postupowanje jenož woprawnjene, wone bě nuznje trěbne. Rjemjesło ze žiwidłami wukonjeć je na wěste normy wjazane. Zwěsća-li dohladowanski zarjad hrube ranjenja, da dyrbi po zakonju zakročić. Powšitkowny hněw na „běrokratach w hamtskich stwach“, tak zda so mi być, tule na městnje njeje. Skerje jewi so zjaw, kotryž hodźi so bohužel jako započatk kónca wopisować. W tajkich padach měł so firmownik kritisce prašeć, što snano je sam zanjechał abo njeje chutnje dosć brał. A to w zajimje kupcow. Abo sej wón tajkich hižo njewaži? Axel Arlt

Budyski rěznik Roman Wjenk dyrbi swoju rězarnju na Horje zawrěć

Budyšin (CS/SN). Dotal bě Budyske Wjenkec rěznistwo mjez tymi, kotřiž poskićachu swoje wudźěłki ze swójskeho rězanja. Werner Wjenk, nan dźensnišeho mějićela Romana Wjenka, běše sej rězarnju na Horje pola Bóšic zarjadował. Tola nětko dyrbi tam rězniski mišter dźěławosć nachwilnje zastajić. Přičina toho su žadanja zarjada za dohladowanje žiwidłow a weterinarstwo Budyskeho wokrjesa, kotrež Roman Wjenk krótkodobnje spjelnić njemóže. W lisće, kotryž bě wón dźeń do swjatkow dóstał, sej zarjad wot njeho žadaše, předpołožić hač do 20. junija koncept, kak chcył žadanja zwoprawdźić. Mjez druhim běchu rězniskeho mištra napominali, pomjenować dalšeho zamołwiteho za škit skotu a zo ma lěpšu dokumentaciju wjesć. Swinje měli samsny dźeń zarězać, kaž je z nakładnym ­awtom do rěznistwa přiwjezu. Njeje-li to móžno, měli je dale picować. Z tym pak by wjace hownow nastało, kotrež měli wotstronić. Nimo toho žada sej zarjad twarske změny w rězarni, a te by hač do 31. julija zakónčić dyrbjał.