Fachowcow sej zawěsćić
Wjacore nawěški falšowane byli
Budyšin (SN/BŠe). W někotrych němskich nowinach kopja so nawěški, z pomocu kotrychž ludźo ze strowotniskeho wobłuka nowe dźěłowe městno pytaja. Tež w minjenym wudaću tydźenika Oberlausitzer Kurier bě cyła strona z nawěškami pjelnjena. Inseraty mějachu přewažnje samsny wobsah: chorobna sotra/hladarka atd., nješćěpjena, pyta wot 16. měrca nowe wužadanje. Redaktor rozhłosa RBB Andreas Rausch je so z nawěškami rozestajał a 18 razow spytał pod podatym telefonowym čisłom někoho docpěć. Ani jenički telefonat pak njemóžeše z potrjechenej wosobu wjesć, kaž wón w internetnej syći Twitter zwurazni, mjenujo inseraty falšowane.
Z naprašowanja SN w redakciji tydźenika wuchadźa, zo je najwjac kupcow swoje nawěški online zapodało. Płaćizna za tajki wučinja jědnaće do 20 eurow. W zwisku z přepruwowanjom njejsu zamołwići lokalneje nowiny žane njedostatki hladajo na wobchodniske wuměnjenja, zakonske abo zarjadniske postajenja zwěsćili. „Jenož mało inseratow měješe direktne politiske wuprajenje, čehoždla je wotpokazachmy“, rěka w oficialnej zdźělence redakcije.
Miliony eurow do kónčiny inwestowali
Regionalny management Leaderoweje kónčiny Hornjołužiska hola a haty zhladuje pozitiwnje na minjenu spěchowansku dobu, ale ma tež kritiske přispomnjenja.
Rakecy (UM/SN). W Leaderowej kónčinje Hornjołužiska hola a haty wudachu w spěchowanskej dobje 2014–2020 cyłkownje 12,4 miliony eurow za wjac hač 200 jednotliwych projektow. To wuchadźa z nětko předležaceje zakónčaceje rozprawy regionalneho managementa ze sydłom w Rakecach. Najwjac projektow – 32 – su w Malešanskej gmejnje zwoprawdźili. Nimale 1,7 milionow eurow spěchowanja tam wužiwachu. Tež w Radworskej gmejnje bě to nimale 1,1 milion eurow. W Bóščanskej gmejnje njemějachu porno tomu žadyn projekt přizwoleny.
Wokrjes nětko wohrožene pasmo
Zhorjelc (SN/BŠe). Afriska swinjaca mrětwa so na wuchodźe Sakskeje razantnje wupřestrěwa, čehoždla je krajna direkcija škitne pasma rozšěriła. Po nowych, wot 19. januara płaćiwych postajenjach, je cyły Zhorjelski wokrjes wohrožene pasmo II. Ratarske a lěsne dźěła hodźa so dale wukonjeć, krajna direkcija pak móže to hišće změnić.
Wobsedźerjo ležownosćow maja nimo toho dowolić, zo na jich płoninach zaraćenja a płoty za škit před dźiwimi swinjemi připrawjeja. Hońtwa je pod wobmjezowanjemi dale dowolena. Zatřělene swinje abo jich mjaso z pasma won wozyć pak je zakazane. Aktualizowane postajenja je Zhorjelski wokrjes hajnikam zdźělił.
Tež plahowarjo domjacych swini dyrbja so we wobłuku škitneho pasma po wěstych prawidłach měć. Kóždy ma swój skót zamołwitemu weterinarnemu zarjadej přizjewić. Swinje smědźa plahowarjo jenož w chlěwach dźeržeć. Dale je zakazane sej nowe skoćata kupić.
Zwoprawdźenje naprawow zamołwja Zhorjelski wokrjes, kotryž chce z hajnikami-hońtwjerjemi, lěsnymi a ratarskimi zawodami kaž tež komunami wusko hromadźe dźěłać.
Swědomišo rešeršować!
Prěnjotnje ze zmylkami za Serbow wabili
Turistiska marketingowa towaršnosć Sakskeje ma Serbow za zajimawy a wažny turistiski potencial w swobodnym staće. Premjera wobnowjeneje internetneje prezentacije njebě tradicije našeho ludu nastupajo bjez zmylkow.
Drježdźany/Budyšin (SN/at). Z turistiskej syću Sakskeje bu předwčerawšim najwažniši wobstatk hladajo na digitalne dalewuwiće turizma w swobodnym staće spřistupnjeny. Jadro je prěnja centralna, cyły kraj zapřijaca datowa banka z informacijemi wo poskitkach, kotrež móža turisća w Sakskej dožiwić. Nowa prezentacija je najprjedy w němskej a jendźelskej rěči pod docpějomna.
W druhej koronowej sezonje wjele twarili
Mały Wjelkow (UM/SN). Małowjelkowski prazwěrjenc je loni nimale 200 000 hosći wopytało. Nimo toho zličichu 25 000 přidatnych tiketow w susodnym błudnišću, kotrež parkej wot lěta 2020 administratiwnje přisłuša. Najebać to, zo smědźachu woblubowane zarjadnišćo koronapandemije dla hakle ze zapozdźenjom dweju měsacow wotewrěć, je wjele zajimcow do parka před Budyskimi wrotami přichadźało.
Hladajo na předchadźace lěta nochcedźa so zamołwići dokładnišo wuprajić. „Ze sezonu smy spokojom a wjeselimy so, zo je w lěćnych a nazymskich prózdninach telko ludźi prazwěrjenc wopytało“, informuje Linda Krause, asistentka Budyskeje wobdźělenskeje a wobhospodarjenskeje towaršnosće (BBB) za nowinarske a zjawnostne dźěło. Znate pak je, zo běchu w lěće 2019 z něhdźe 242 000 wopytowarjemi dotalny rekord docpěli.
Natwarja na nazhonjenja
Apoteka ma dołhe stawizny a wot spočatka lěta nowu nawodnicu
Kulow (AK/SN). Worjołska apoteka słuša k markantnym twarjenjam Kulowskeho torhošća. Jeje stawizny sahaja hač do lěta 1854. „W tutym domje sym wotrostła a znaju apoteku, dołhož móžu myslić“, powěda Claudia Kupcyna z Łazka. Mjeztym 31 lět wona w apotece dźěła. Jeje mać Dorothea Görigkowa je apoteku wot 1970 do 1990 nawjedowała. Po tym přewza Marlies Graudußus nawodnistwo domu a jón wot rukowaćelnje kupi. 1993 su dom a apoteku wobšěrnje saněrowali. Wot spočatka 2022 nětko Elisa Gedan Kulowsku apoteku nawjeduje. Přistajenych ma wona inženjerce za farmaciju, techniskej asistentce, farmaceutiskotechnisku asistentku a posołku. Něhdźe 4 500 lěkow maja w sortimenće. Ludźo jězdźa ze Sernjan a Róžanta runje tak do Kulowa kaž z Wóslinka, Jitra a Skaskowa. Předewšěm starši pacienća sej waža, zo posołka skazane medikamenty ludźom domoj wozy.
Němsko-pólski zwjazk załoženy
Zhorjelc (SN/BŠe). Po wjele lětach přihotow su nětko 14 čłonow wopřijacy mjezu přesahowacy zwjazk Němsko-pólski geopark Mužakowski zahórk załožili. Jeho zaměr je koordinować, spěchować a wolóžić zhromadne dźěło na dobro naslědneho wuwića geoparka. Na konstituowacym posedźenju minjenu póndźelu su sobustawojo z Pólskeje, Braniborskeje a Sakskeje wažne zakłady kooperacije wobzamknyli, tak zo móže zwjazk bórze dźěłać započeć. Čestnohamtski prezident je Tadeusz Jędrzejczak. Hłowne sydło zarjaduja w Małym Kólsku (Klein Kölzig), kaž nowinska rěčnica Zhorjelskeho wokrjesa Franziska Glaubitz wčera informowaše. Dale su sobustawojo rozsudźili hłownohamtskeho direktora přistajić.
Ze stron Sakskeje je Zhorjelski krajny rada Bernd Lange (CDU) w zwjazku zastupjeny. Dalše sobustawske komuny su Brody, Łęknica, Przewóz, Trzebiel, Tuplice, Żary, ale tež wojewódstwo Lubuskie w Pólskej. Braniborsku zastupuja gmejny Dolina Nysy a Małksy, Feliksowy jězor a wokrjes Sprjewja-Nysa. Dalšej sakskej čłonaj stej město Běła Woda a gmejna Jabłońc (Gablenz) w Zhorjelskim wokrjesu.
Awstralska firma budźe w Čornej Pumpje produkować
Zhotowjenje baterijowych materialow wuwiwa so dźakowano změnje k elektro-mobiliće na industriju přichoda. Runje łužiski brunicowy region w tymle wobłuku dźeń a wjetšu rólu hraje.
Čorna Pumpa (dpa/SN). Předewzaće Altech Industries Germany tzwr chce w Čornopumpskim industrijnišću na 14 hektarow wulkej płoninje produkciske stejnišćo za naworštowanje wysokowukonitych litiumowo-ionowych baterijow twarić. Plany za to je předstejićel Uwe Ahrens wčera w Čornej Pumpje rozłožił. Němska wotnožka awstralskeho koncerna Altech Chemical chce hač do 500 milionow eurow do projekta inwestować. Něhdźe 150 dźěłowych městnow ma nastać. Po słowach Uwy Ahrensa trjebaja procesowych technikarjow, logistikarjow a dalšich motiwowanych ludźi z regiona.
