ZVON płaćizny lochce zwyši
Budyšin (SN/JaW). Wobchadny zaměrowy zwjazk Hornja Łužica-Delnja Šleska (ZVON) zwyši wot 1. awgusta swoje płaćizny. To zdźěla zwjazk na swojej internetnej stronje pod .
„Płaćizny nimale wšitkich jězdźenkow w našim wobchadnym zwjazku lochce přiměrimy“, wobkrući našemu wječornikej nowinska rěčnica ZVON Sandra Trebesius. Kaž z nowinskeje zdźělenki dale wuchadźa, bě zwyšenje płaćiznow zwjazkowa zhromadźizna ZVON hižo w měrcu wobzamknyła.
Stipendije maja do Łužicy wabić
Choćebuz (SN/JaW). Załožba Łužiska brunica spěchuje studowacych ze stipendijemi, zo bychu do Łužicy přišli, so tu zasydlili a dźěłali. Wo tym informowaše minjeny pjatk předewzaće Łužiska energija a milinarnje LEAG w nowinskej zdźělence. Minjeny štwórtk je mjenujcy załožba Łužiska brunica rozsudźiła, wosom studentkow a studentow z přiražku podpěrać. Mjez stipendiatami staj mjez druhim Francis Noack z Wólšynki (Oelsnig) pola Drjowka (Drebkau), kotraž studuje w masterskim studiju hydrobiologiju na Drježdźanskej Techniskej uniwersiće a Christoph Scale z Grabina (Finsterwalde), kiž studuje elektrotechniku na diplom, tohorunja na Drježdźanskej TU.
Dotal wjac hač sto projektow přizwolenych
Podstupim (dpa/SN). Za strukturnu změnu we Łužicy je w Braniborskej dotal 112 projektow jako spěchowanjahódnych wobkrućenych. Z nich je 55 naprawow ze stron Zwjazka a 57 ze stron Braniborskeje, z wotmołwy statneje kenclije w Podstupimje na naprašowanje frakcije Lěwicy braniborskeho krajneho sejma wuchadźa. Za dalše 15 předewzaćow su pjenježne srědki zawěsćene.
Wobchowuja serwis na wsy
Budyšin (SN/at). Budyska wokrjesna lutowarnja poskićuje w dźesać ze swojich 21 filialow widejowy serwis. Trěbna technika bu tam instalowana. To potrjechi filiale w Budyskej Strowotnej studni, na Ericha Weinertowej a Nowosólska, we Wjazońcy, Załomju, Budestecach a Małym Wjelkowje. Wo tym je kreditny institut wčera informował. W Großharthauwje, Zemicach-Tumicach a Njeswačidle lutowarnja městny serwis jenož přez widejo zaruča. Nětko přiměrja serwisowy čas za widejowu posłužbu wot 1. awgusta w mjenowanych dźesać filialach wot póndźele do pjatka wot 9 do 18 hodź.
W Njeswačidle wjesnjanosta Gerd Schuster (CDU) dobre nazhonjenja z widejoserwisom wobkrući. „Posłužowanje je zdobom za staršich ludźi jara jednore“, wón měni a ma za wažne, zo „je so Budyskej wokrjesnej lutowarni poradźiło, we wjesnym rumje serwis na městnje wobchować“. Dalši dopokaz je praksa. Lutowarnja rěči wo měsačnje wjace hač 500 serwisowych rozmołwach, kotrež nětko hižo z pomocu widejoweje techniki wjedu. Tak lutowarnja kontakt z klientami wosebje na wsy wudźeržuje.
Kabinet nowemu programej EU přihłosował
Drježdźany (dpa/SN). Sakski kabinet je nowemu programej EU za brunicowe regiony přihłosował, z kotrehož je přichodnje 645 milionow eurow k dispoziciji. Konkretnje jedna so wo program Just Transition Fund (JTF), zdźěli hospodarske ministerstwo Swobodneho stata Sakska minjenu wutoru po posedźenju sakskeho kabineta. We łužiskim rewěrje chcedźa hač do lěta 2027 spěchowanske srědki we wobjimje 375 milionow eurow zasadźić, w srjedźoněmskim rewěrje je to 200 milionow eurow a městu Kamjenicy ma 70 milionow eurow k dispoziciji być. Spěchowanske srědki EU chcedźa z priwatnymi a srědkami kraja dale wudospołnjeć, tak zo wučinja cyłkowna suma samo hač do 1,3 miliardy eurow.
Mjezwoči hladać móc
Z tysac štomikami chcedźa klimu w měsće polěpšić
Budyšin (CS/SN). Wjacore iniciatiwy, kotrež so w Budyšinje „zelenym“ temam wěnuja, přeprosychu předwčerawšim na „Zeleny dźeń“ před Němsko-Serbske ludowe dźiwadło. Tam běchu swoje stejnišća natwarili, zo móhli wo swojich zaměrach informować a ludźi k sobu činjenju pohnuwać. Ze zastupjerjemi iniciatiwow so Manja Gruhn rozmołwješe a jich dźěło předstaji. Na te wašnje wopytowarjo na přikład wot Steffena Reitziga ze Šešowa wo skutkowanju tak mjenowanych měšćanskich hajnikow zhonichu. Hajnicy staraja so wo zranjene abo wohrožene zwěrjata w měsće.
Porjadnje wotškódnić
Wočakuja dobre žně kórkow
Nic jenož škit jedneje družiny wažny
Razantne wuwiće wjelčeje populacije wuskutkuje so na plahowanje pastwoweho skotu
Jara spěšnje wotkrywa sej wjelk nowe žiwjenske rumy a je so předewšěm w Braniborskej, Delnjej Sakskej, Sakskej, Mecklenburgsko-Předpomorskej a Saksko-Anhaltskej kruće etablěrował. Wjelk słuša mjeztym k domjacej fawnje. Kónc meje su so zastupjerjo ratarskich a zwěrjećich zwjazkow w Pančicach-Kukowje zešli a swoje ćeže hladajo na rubježne zwěrjo nowinarjam rozłožili. Jasne je, zo populacija wjelka razantnje přiběra, za čož su skónčnje přiwótřene naprawy nastupajo škit zwěrjatow na pastwach trěbne. Zwjazkowe knježerstwo měło reagować, za čož ma so sakski ministerski prezident Michael Kretschmer zasadźić. Zastupjerjo zwjazkow su wotpowědny dokument ze žadanjemi podpisali.
