Zły Komorow (AK/SN). Mjezypřesahowacy turistiski zwjazk Łužiska jězorina zasadźuje so dale za wjace bjezbarjernosće podłu jězorow regiona. „Ze sepju dźěłarničkow skedźbnjamy na móžnosće so bjez zadźěwkow na přibrjohach pohibować. Po přepytowanju štyrjoch modelowych jězorow chcemy nětko praktiske poručenja zajimcam pokazać“, zdźěli minjeny tydźeń nowinska rěčnica turistiskeho zwjazka Katja Wersch. Jako čłon dźěłoweho zjednoćenstwa „Lóšo pućować – bjezbarjerne dowolowe cile w Němskej“ sadźa zwjazk tež na dowol w jězorinje. Hižo loni a tež lětsa su k tomu dźěłarnički přewjedli. Management za turizm a strowotne hospodarstwo braniborskeho marketinga (TMB) iniciatiwu łužiskeho zwjazka podpěruje.
Budyšin (SN/BŠe). W Sakskej je dotal wosom padow afriskeje swinjaceje mrětwy pola dźiwich swinjow dopokazanych. To wuchadźa z přepytowanjow kołowokoło Krušwicy, hdźež su zarjady po zwěsćenju prěnjeho pada kónc oktobra dokładne slědźenje zahajili. „Dźakowano wjele pomocnikow zwjazkoweje wobory, Techniskeho pomocneho skutka, dobrowólneje wohnjoweje wobory a statneho lěsniskeho zawoda Sachsenforst, kaž tež hajnikow a wodźerjow psykow je so nam poradźiło přestrjeń dokładnje přepytować“, wuswětli krajny rada Zhorjelskeho wokrjesa Bernd Lange (CDU). Sakske socialne ministerstwo zawčerawšim zdźěli, zo su 53 dźělow ćěła dźiwich swinjow na cyłkownje 13 500 hektarow wulkim zawěranskim pasmje našli. Sydom z nich su z mrětwu inficěrowane. Tuž je nětko po cyłej Sakskej wosom padow znatych.
Krótko do zakónčenja šule zaběraja so młodostni z powołanskimi přećemi. Powołanska orientacija, kotruž dźěłowe agentury abo rjemjeslniske, industrijne a wikowanske komory na kubłanišćach přewjeduja, pak pandemije dla tuchwilu móžna njeje. Akterojo spytaja zajimcow tuž po hinašich pućach docpěć.
Budyšin (SN). Molerjo Budyskeho wokrjesa měli přichodnje wjace mzdy dóstać, žada sej dźěłarnistwo IG Bau. Najebać koronapandemije maja rjemjeslnicy knihi połne nadawkow. „Twarska branša w krizy wobstajnje dźěła, z čehož mjez druhim tež molerske firmy profituja. Něhdźe 540 přistajenych branše w Budyskim wokrjesu dyrbi tuž dobreho wobchodniskeho połoženja dla wjace pjenjez dóstać“, pisa předsyda twarskeho dźěłarnistwa wuchodneje Sakskeje Peter Schubert. W běžnym tarifowym kole žada sej IG Bau 5,4 procenty wjace mzdy. Dotal su dźěłodawarjo minimalny poskitk namjetowali, zwyšić mzdu wo 0,8 procentow, nawoda jednanjow dźěłarnistwa Carsten Burckhardt kritizuje. „To je plista tym, kotřiž njemóža w homeofficu dźěłać, ale wšědnje pod ćežemi korona-wobmjezowanjow na dźěło chodźa.“
Zhorjelski wokrjes je wobšěrne naprawy zahajił, kotrež maja dalšemu wupřestrěću afriskeje swinjaceje mrětwy (ASP) zadźěwać, podšmórny tamniši krajny rada wokrjesa Bernd Lange (CDU) minjeny štwórtk na nowinarskej rozmołwje w Zhorjelcu.
Zhorjelc (AK/SN). 27. oktobra su blisko Nysy inficěrowane dźiwje swinjo našli. To wšak pokazuje, zo drje su prěnje škitne naprawy pomhali, kotrež w juniju zahajichu. Wokrjes, gmejny a ministerstwo swobodneho stata a Zwjazka su hromadźe na tym dźěłali. Wokrjes z wjele ratarskimi zawodami, hdźež mjez druhim tež swinje plahuja a mjaso předźěłuja, je přiwšěm wosebje potrjecheny. Předewšěm wjele wužitneho skotu maja před mrětwu škitać. W Kodersdorfje na přikład je zawod z něhdźe 25 000 swinjemi.
Budyšin (SN/BŠe). W času koronapandemije pytaja institucije, zarjady a dalši akterojo za nowymi pućemi, klientow bjez wosobinskeho kontakta docpěć. Internet a digitalna technika wšak skićitej za to wšelake móžnosće. Tež Budyska dźěłowa agentura so srědkow posłužuje. Hižo wot spočatka pandemije w měrcu móžachu so ludźo, kotřiž běchu dźěło zhubili, online přizjewić. Kaž wotnožka w sprjewinym měsće informuje, je poskitk nětko dale móžny.
Němska železnica a předewzaće Łužiska energija a milinarnje chcetej zhromadnje dźěłowe městna we Łužicy wutworić a zawěsćić a na te wašnje přichod regiona wuspěšnje wuhotować.
Choćebuz (SN/BŠe). Wužadanja hladajo na strukturnu změnu we Łužicy su jara wulke, štož je mnohim předewzaćam wědome. Zo móža mjezsobne kooperacije zakład wuspěšneje změny być, stej Němska železnica (DB) a koncern Łužiska energija a milinarnje (LEAG) spóznałoj. Minjeny pjatk stej wonej kooperaciske dojednanje podpisałoj a chcetej přichodnje we wobłukach wukubłanje, kwalifikacija a přewzaće personala wusko hromadźe dźěłać. Něhdźe 1 200 nowych dźěłowych městnow ma na stejnišću Němskeje železnicy w Choćebuzu hač do lěta 2026 nastać, hdźež budźe nowa moderna, wobswětej nješkódna twornja natwarjena. Wot spočatka septembra je znate, zo chce DB wulce do Łužicy inwestować. Tuchwilu dźěła na jeje Choćebuskim stejnišću 450 ludźi.