Hosćo „lubuška“ wuzwolili
Dobrošecy (SN/BŠe). Dowolnicy w Sakskej su njedawno swoje najwoblubowaniše přebywanišća wuzwolili. W kategoriji prózdninske bydlenje dóstanje tež hornjołužiski hosćićel titul „Lubušk hosći“. Woblubowane bydlenje je w Dobrošecach (Doberschütz) pola Malešec hnydom na kromje biosferoweho rezerwata Hornjołužiska hola a haty. Na wulkim třistronskim statoku su dwě separatnej bydleni a dowolowy domčk zarjadowane. Z hódnoćenjom 99 wot 100 móžnych dypkow zdoby sej Dobroščanski statok najlěpši wuslědk nominowanych, kaž Marketingowa towaršnosć Hornja Łužica-Delnja Šleska informuje. Tak njeje jenož najlěpše prózdninske bydlenje tudyšeje kónčiny, ale cyłeje Sakskeje.
Mějićelej statoka Heike Schulz a Jens Richter staj jara zbožownaj: „W juliju 2018 smój podpěru spěchowanskeho programa Leader přebywanišćo z cyłkownje šěsć łožemi wotewrěłoj. Wulke naprašowanje naju zmuži poskitk rozšěrić, a smój hač do lětušeje meje dalše přenocowanske móžnosće wutworiłoj. Titul je namaj wulki dźak hosći, ale tež pohon, dale z dobrym hosćićelom być.“
Trumpf zaměrnje inwestuje
Roboter a kumštna inteligenca wažnej zakładaj za dalše wuwiće zawoda
Wjazońca (UM/SN). Předewzaće Trumpf tzwr we Wjazońcy ma swoje hłowne sydło w šwabskim Ditzingenje, přiwšěm nawodnistwo do stejnišća we Łužicy zaměrnje inwestuje. To potwjerdźichu na wčerawšej nowinarskej konferency, hdźež dźěše wo přichodne plany a hižo docpěte kompetency. „Wjazońca je naš kompetencny centrum, dźe-li wo awtomatizaciju“, rozłoži přitomnym jednaćel Wjazońčanskeho stejnišća Armin Brüchle. Awtomatizacija we łužiskim zawodźe dźě twori wažny zakład, zo ma skupina Trumpf stajnje dosć materiala.
„Wuslědki skerje přesłapjeja“
Zhorjelc (SN/BŠe). Po ćežkich a dlijacych so jednanjach su so minjeny tydźeń dźěłodawarjo a dźěłopřijimarjo předewzaća Siemens Energy dojednali. Za to běchu so zastupnicy wobeju stronow w Mnichowje zetkali. Za Zhorjelske stejnišćo koncerna pak maja nětko docpěte naprawy konsekwency. Cyłkownje 124 dźěłowych městnow dyrbja tam hladajo na dalše wusměrjenje Siemensa šmórnyć, stejnišći w Berlinje a Mühlheimje porno tomu profitujetej. Wěste produkciske čary budu prjedy abo pozdźišo samo do Madźarskeje přepołožene. Na zbožo pak je nawodnistwo koncerna dowidźało, zo ma wukubłanski centrum w Zhorjelcu wostać, kaž dźěłarnistwo IG metal rozprawja. Přiwšěm zawostajeja naprawy w měsće nad Nysu hórki přisłód.
Brěčkownja Neubert z Rózborka je tuchwilu z mobilnej staciju we ...
Korona měnja nakupowanje
Koronowych naprawow dla sej naladu skazyć njedali
Figura z interneta je minjeny kónc tydźenja w Stróži (Wartha) lětuše Łužiske rybowe tydźenje wotewrěła. Tež hewak je to a tamne hinak hač lěta do toho wotběžało.
Stróža (UM/SN). Módro-běła smužkata matrozowa košla, žołty kabat, gumijowe škórnje, čerwjenu čapku na hłowje a šibały posměwk: To je Franzi. Holčka z rybarskeho dwora, kotraž hižo něšto měsacow w interneće na łužisku rybu skedźbnja. Tola kak so naraz realna stanje? „Cyle jednorje: Sym čłonka młodźinskeho dźiwadła NLSDź“, rozłoži Greta. Wšako je Greta Brückner prawe mjeno figury Franzi. A wona tež njeje hakle dźewjeć, ale hižo 13 lět. Hewak pak ma rodźena Budyšanka ze swojim wirtuelnym přikładom tójšto zhromadneho – hač k lubosći k přirodźe a domjacej rybinje.
Steinbach liči z přizwolenjom
Podstupim (dpa/SN). Twarc elektroawtow Tesla z USA za swoju fabriku pola Berlina prawdźepodobnje přizwolenje dóstanje, zdźěli wčera braniborski hospodarski minister Jörg Steinbach (SPD). W rozmołwje z dźenikom Frankfurter Allgemeine Zeitung liči Steinbach 95procentowsce z pozitiwnym rozsudom. Dotal jenož hišće wobswětoprawniska dowolnosć krajneho wobswětoweho zarjada Braniborskeje pobrachuje. Twar fabriki pak je mjeztym hižo chětro postupował, dokelž Tesla na zakładźe dočasnych přizwolenjow dale twari. Wobswětowe zwjazki a wobydlerjo pak widźa rizika.
Hospodarski minister wumjetuje koncernej Tesla „pobrachowacu wotewrjenosć ludźom napřećo. Bych sej přał, zo Tesla starosće wobydlerjow chutnišo bjerje.“ Poprawom chcyše Tesla hižo w juliju z produkciju elektroawtow započeć, mjeztym pak to kónc lěta planuje.
New York w Hornjej Łužicy?
W Budyskim a Zhorjelskim wokrjesu pytaja wuspěšne předewzaća
Budyšin (SN/BŠe). Za dwaj měsacaj spožča zaso Hornjołužiske předewzaćelske myto, za kotrež hodźa so hišće hač do 24. septembra namjety podać. Hłowne hesło wuznamjenjenja je lětsa New York. Što pak za tym tči, a kak so Hornja Łužica w nim jewi?
Z lětušim hesłom Hornjołužiskeho předewzaćelskeho myta njezwjazuja metropolu USA New York, ale dźe wo filozofiju Frithjofa Bergmanna. Wusměrjenje předewzaća skići sobudźěłaćerjam nowe móžnosće, nańć balansu mjez swójskim dźěłom a žiwjenjom. Organizatorojo předewzaćelskeho myta, Marketingowa towaršnosć Hornja Łužica-Delnja Šleska, reaguja tak na měnjate ramikowe dźěłowe wuměnjenja. Dźěłowy swět dźě so runje w zwisku z digitalizaciju přeměnja. Situacija a wužadanja kołowokoło korony wuwiće samo pospěšeja. Předewzaća a předewzaćeljo we wjesnych kónčinach maja wjetše ćeže, wuměnjenjam wotpowědować. Wopřijeće New York zjednoća měnjacy so dźěłowy swět a z tym zwisowacu filozofiju.
Korony dla jich wukubłanje tróšku hinaše było
75 rjemjeslniskich su na swjatočnosći Budyskeho wokrjesneho rjemjeslnistwa w Němsko-Serbskim ludowym dźiwadle minjeny pjatk z wukubłanja wuwjazali a jim wuswědčenja přepodali.
Budyšin (CS/SN). Młodźi ludźo su powołanje pjekarja, rěznika, wšelakich fachowych předawarjow, frizerki, mulerja, třěchikryjerja, blidarja kaž tež překupče a překupca w běrowowym managemenće nawuknyli. Lětnik měješe so ćešo hač tamne, dokelž je w času korony něštožkuli hinak běžało hač zwučene. Předewšěm wučba w powołanskej šuli bě zdźěla wupadnyła abo bu digitalnje podawana. Frizerki njejsu zawrjenych zawodow dla zdźěla praktisce dźěłać móhli. Wone maja so tež dźensa hišće z najwjace wobmjezowanjemi bědźić. Zasadnje je wola, so wukubłać dać, přez koronu haćena była, rjekny zastupowaca wokrjesna rjemjeslniska mišterka, frizerka Szilvia Schiffel. Wobžarujomny sćěh z toho je, zo přichodnje žane frizerki a žani pjekarjo swoje powołanskošulske wukubłanje w Budyšinje wjac njezměja, dokelž bě so přemało młodostnych přizjewiło.
Kónčina móhła přikład być
Na dźěłarničkach bjezbarjerny přistup k łužiskim jězoram rozjimali
Kóšyna (AK/SN). Hižo wot lěta 2012 wobstejacy mjezy přesahowacy turistiski zwjazk Łužiska jězorina bjezbarjerny dowol nastupajo zaměrnje dale dźěła. To podšmórny wčera jednaćelka zwjazka Kathrin Winkler w Kóšynje (Großkoschen). W tamnišim prózdninskim domicilu „Sonnenhof 1864“ su sej turistikarjo z Braniborskeje w běhu dweju dnjow nazhonjenja a mysle wuměnjeli. Do zetkanja běchu organizatorojo dźěłarnički na temu turizm bjez zadźěwkow w Braniborskej zarjadowali.
„Na prěnim workshopje dźěše wo bjezbarjerny přistup k jězoram. Na druhim wobjednawachmy přikłady braniborskeho a sakskeho dźěla jězorinoweho zwjazka“, jeho jednaćelka rozłoži. Wuslědk rěkaše, zo su hišće wulke rezerwy. Zdźěla hač do 14 metrow wysoke nasypy maja tež za ludźi w jězbnym stole přewinjomne być. Ćežko zwoprawdźić hodźi so tohorunja přistup k wodźe po pěskojtym přibrjohu.
