Budyšin (SN). Zrěčenje wo rozdaću wukonow busoweho wobchada w Budyskim wokrjesu su zastupjerjo krajnoradneho zarjada, wobchadneju zwjazkow Hornje Łobjo (VVO) a Hornja Łužica-Delnja Šleska (ZVON) kaž tež wukonjaceho předewzaća Regionalny bus Hornja Łužica (RBO) wčera podpisali. Zrěčenje złožuje so na nowokoncipowanu syć. Jeje jadro su wot swobodneho stata spěchowane linije plusbusow a taktbusow, kotrež w hodźinskim resp. dwuhodźinskim takće hłowne čary posłužuja a zwisk k železnicy zaručeja. Wone wudospołnjeja linije po pódlanskich čarach, kotrež šulerski transport dale zawěsćeja, zwjazujo wsy zboka hłownych dróhow ze zjawnym wosobowym bliskowobchadom.

Budyske předewzaće RBO je so we wurisanju po cyłej Europje přesadźiło. Wupisanje bě z něhdźe dwanaće milionami kilometrow w lěće swój čas najwjetši nadawk na wikach w Němskej, kaž krajnoradny zarjad informuje. Podpisane zrě­čenje płaći wot klětušeho hač do 2031, ma lětny wobjim 33 milionow eurow a je za wo­krjes zdobom inwesticija do wu­bědźowanskeje kmanosće regiona.

Zwjazkowemu ministerstwu za kubłanje a slědźenje jako projekt namjetowany slědźenski wulkocentrum „Łužiska fabrika přichoda“ je wizija za cyły region­ a za jeho mjezami.

Hórnikecy (AK/SN). Tajki centrum ma nowe technologije za wobłuki woda, energija a zežiwjenje wutworić. To podšmórny sobuiniciator prof. Michael Stelter, w Fraunhoferskim instituće zastu­powacy nawoda instituta za keramiske technologije a systemy, wčera w Hórnikečanskej Energijowej fabrice. „Je-li po­žadanje wuspěšne, móhł klětu w měrcu koncept předležeć. Nazymu 2022 móhli potom projekt zahajić, a to ze zazběhowej fazu třoch do pjeć lět. Ličimy z lětnym budgetom 170 milionow eurow. Dohromady 1 500 dźěłowych městnow (z wokolinu ličene 4 500 cyłkownje) móhło nastać“, prof. Stelter rozłoži. Wjes­nja­nostam, měšćanostam a zastupjerjam z hospodarstwa, slědźenja a zwjazkow předstaji wón projekt, za kotrymž steji 40 podpěrarjow. Za „Łužisku fabriku přichoda“ su so pod režiju Fraunhoferskeje towaršnosće Wysoka šula Žitawa/Zhorjelc, TU Drježdźany, TU Freiberg kaž tež Wysoka šula za techniku a hospodarstwo Drježdźany požadali.

Budyska wagonownja, pišćeletwarc Eule abo nowa wulce moderna płunowa tepjernja na Mužakowskej – čłowjek so stajnje zaso dźiwa, kelko wšelakich zawodow w Budyšinje eksistuje. Štož tudyše měšćanske zarjadnistwo kóžde lěto we wobłuku „pózdnjeje změny“ organizuje, je jara chwalobne. Dalše města kaž Wojerecy a Biskopicy Budyskemu přikładej mjeztym sćěhuja. Zajimawy je tež starobny přerězk wobdźělnikow. Poprawom wšak bě „pózdnja změna“ za to myslena, młodostnym móžnosće wukubłanja takrjec live předstajić a jich za powołanje zajimować. Ličba młodostnych, znajmjeńša tych, kotrychž sym sam widźał, pak je jara wobmjezowana. Za to su něhdyši sobudźěłaćerjo mjez wopytowarjemi, zajimowani rentnarjo abo swójby z dźěćimi. A cyle připódla so čłowjek praša, hač móhł sej předstajić ­tajke abo hinaše powołanje wukonjeć ­a wšědnje sam při mašinje stać. Na kóždy pad pak wopytowar, wšojedne kak stary je, něšto přiwuknje. Marko Wjeńka

Budyšin (CS/SN). Mjeztym štwórty króć běchu ludźo minjeny pjatk popołdnju na „pózdnju změnu“ přeprošeni. Je to wot Budyskeho měšćanskeho zarjadnistwa organizowana jězba, kotraž zmóžnja dohlad za kulisy wšelakich Budyskich zawodow. Někotre z cyłkownje dźewjeć čarow běchu spěšnje wuknihowane, tak tež ­čara čo. 6, kotraž wjedźeše mjez druhim k zhotowjerjej pisakow Edding a do Wulkodubrawskeho zawoda za graty prasowanskich wudźěłkow.