Pjeć partnerow z Pólskeje a Němskeje tuchwilu hromadźe dźěła, zo bychu přirodne a kulturne namrěwstwo w geoparku Mužakowski zahork zachowali. Dźe wo šěsć projektowych wobsahow.
Derbno (JoS/SN). Geopark UNESCO Mužakowski zahork je jedyn z 161 tajkich parkow w 44 krajach. Wón je jedyn z jenož štyrjoch transnacionalnych geoparkow, dokelž wupřestrěwa so po němskim a pólskim teritoriju. Z toho wurosćace němsko-pólske zhromadne dźěło je samozrozumliwe w prócowanju, zo budźe park za wopytowarjow hišće znaćiši a přićahliwiši. K tomu słuži zhromadny interreg-projekt z titlom „Geopark UNESCO Mužakowski zahork – zhromadne namrěwstwo w němsko-pólskim pomjeznym rumje“ za dobu 2014–2020, kotryž bu aktualnje wo lěto podlěšeny.
Marketingowa towaršnosć Hornja Łužica-Delnja Šleska (MGO ) ma korony dla problemy z wabjenjom a sadźi na partnerstwa kaž ze Serbskim ludowym ansamblom.
Dagmar Steuer z Wojerec je prěnju łuku za sadźenje rostlin załožiła. Dale je wona hosćićelka Wojerowskeje wikowanskeje iniciatiwy a aktiwna partnerka mnohe powšitkownowužitne projekty nastupajo. Silke Richter je so z njej wo dotal docpětym a wo nowych zaměrach rozmołwjała.
Zo byšće swój team zesylnili, pytaće zahrodnikarja, ratarja abo přidružnika. Što za tym tči?
Plany za přichodny železniski wobchad mjez Drježdźanami a Wojerecami hač do Złeho Komorowa ze stron politiki su jasne. W detailu pak je hišće mnoho problemow, kaž namjet strony Zwjazk 90/Zeleni wujewja.
Kamjenc (SN/UM). Z ćahom z Drježdźan přez Kamjenc do Wojerec abo Złeho Komorowa jěć – haj rady! Toho su sej mjeztym wšitcy přezjedni, kotřiž w regionalnym wosobowym bliskowobchadźe skutkuja. W zwisku ze strukturnej změnu su za to tež pjenjezy k dispoziciji, štož bě před pjeć lětami hišće njepředstajomne. Rozdźělne pak su měnjenja nastupajo prašenje, wot hdy budźe železniski zwisk móžny. Mjeztym zo wobchadny zwjazk Hornje Łobjo (VVO) časowy wobłuk „hač do lěta 2030“ předwidźi, chcedźa Zeleni Sakskeje tónle zaměr hižo prjedy docpěć. Za to su swójski koncept za tak mjenowany „předběhowy wobchad“ na čarje přichodneje měšćanskoželezniskeje čary 7 nastajili, kotraž ma wot Drježdźanskeho hłowneho dwórnišća přez Kamjenc hač do Wojerec resp. Złeho Komorowa wjesć.
Zhorjelski wokrjes chce so dale k wuspěšnemu hospodarskemu stejnišću wuwić. Fakty pokazuja, zo su na dobrym puću. Přiwšěm su zamołwići brošurku z datami a faktami kaž tež marketingowe kampanje zdźěłali.
Dowolowy region łužiskeje jězoriny je tuchwilu hišće w zymskim sparje. Zamołwity turistiski zwjazk ze sydłom w Złym Komorowje pak lětušu sezonu hižo pilnje přihotuje.
Zły Komorow (SN/BŠe). Hladajo na tuchwilnu situaciju, zo turistikarjo žanych hosći witać njemóža, měła přichodna dowolowa sezona ćim wuspěšniša być. Lětsa chcedźa zamołwići wabjenje, mjez druhim swójbny dowol nastupajo, jako ćežišćo tematizować, štož móža domoródni rady podpěrać. Kaž turistiski zwjazk Łužiska jězorina nětko wozjewi, pytaja za nowe fota a wideja swójbu z dźěćimi, kotrež su starše hač dźesać lět. Wosebje wulku wažnosć kładu na přirodne wustupowanje. Akterojo njeměli so tež kamery bojeć. Nazhonjenja we wobłuku někajkich nahrawanjow njejsu žane trěbne. Fotograf chce typiske dowolowe situacije zapopadnyć, kaž na přikład zhromadny wulět z kolesom, čołmikowanje abo wopyt w brunicowej jamje.
Budyšin/Zhorjelc (SN/BŠe). Era sparty kanadiskeho předewzaća Bombardier w Budyšinje a Zhorjelcu je zakónčena. Nowy wobsedźer, francoski koncern Alstom, je minjeny pjatk wotpowědne kupne zrěčenje podpisał. Kaž z Parisa zdźělichu, su za němsku železnisku spartu Bombardier cyłkownje 5,5 miliardow eurow zapłaćili, štož je trochu mjenje, hač bě poprawom wotpohladane. W Němskej je cyłkownje 9 000 sobudźěłaćerjow wot změny potrjechenych, něhdźe 2 000 z nich na Budyskim a Zhorjelskim stejnišću.
Sakski strowotniski zarjad je na nowše rozšěrjenje afriskeje swinjaceje mrětwy w Zhorjelcu reagował a minjeny štwórtk nowe postajenja wozjewił. Zhorjelski krajny rada Bernd Lange (CDU) žada sej mjeztym dalšu podpěru ze stron Zwjazka a Europskeje unije.
Zhorjelc (SN/BŠe). Wot pólskeje mjezy sem so afriska swinjaca mrětwa w Zhorjelskim wokrjesu dale wupřestrěwa. Po tym zo su prěni pad loni 31. oktobra blisko Krušwicy zwěsćili, je jich mjeztym 19 dopokazanych. Sakski strowotniski zarjad zdobom na najnowše wuwića reaguje. Wšako běchu zahinjene inficěrowane skoćo tež zwonka pasma wohroženja namakali. Škitne a wohroženske pasma su minjeny štwórtk tuž přiměrili. Za plahowarjow swini we wotpowědnej kónčinje płaća wosebite postajenja, kotrež je Zhorjelski wokrjes na swojej internetnej stronje wozjewił. Tež hajnicy maja wukaz sćěhować, kotrež w jednotliwych conach kołowokoło namakanišćow płaća. Hońtwa tam tuchwilu žana móžna njeje. Ludźo, kotřiž so ze swojimi psami wuchodźuja, smědźa je jeno za powjazom měć.