Rjemjesło młodych wabi
Drježdźany/Budyšin (SN/at). Rjemjesło wabi: 254 młodych žonow a muži je hač do 31. julija w Budyskim wokrjesu wukubłanske zrěčenje z rjemjeslniskim zawodom podpisało. Na to skedźbnja Drježdźanska rjemjeslniska komora a zwěsća, zo je w regionje lětsa runje telko šulskich wotchadnikow swoje powołanske wuwiće w rjemjesle zahajiło kaž loni. To běše ličba podpisanych wukubłanskich zrěčenjow kónc julija tohorunja 254.
Po słowach hłowneho jednaćela mjenowaneje komory Andreasa Brzezinskeho „pokazuje prěnja mjezybilanca, zo je rjemjesło młodym ludźom atraktiwne“. Doskónčne hódnoćenje budźe hakle móžne, hdyž wšitke zrěčenja předleža. „Zawody dale kmanych požadarjow pytaja.“ Najwoblubowaniše wukubłanske powołanje w Budyskim wokrjesu je wozydłowy mechatronikar. Dwě žonje a 27 muži je nětko wuknu. 59 žonow a 195 muži je wotpowědne zrěčenje podpisało, štož wotpowěduje žónskej kwoće mjez nowymi wučomnikami někak 23,2 procentow.
W online-bursy www.hwk-dresden.de/ einfachmachen poskićeja firmy hišće 300 wukubłanskich městnow w rjemjesle.
W měsće na probu bydlić
Zhorjelc (dpa/SN). Měšćanske eksperimenty nastupajo přetwar Zhorjelca steja w srjedźišću tamnišeho lětušeho salona myslerjow. Kaž Leibnizowy insitut za ekologiske wuwiće rumow (IÖR) wčera zdźěli, zetkaja so 13. a 14. septembra zastupjerjo wědomosće a praksy w měsće nad Nysu, zo móhli sej prěnje nazhonjenja z projekta „Město na probu – bydlić a dźěłać w Zhorjelcu“ wuměnjeć. Hižo wot januara poskićeja tam wćipnym z Němskeje, ale tež wukrajnikam, bydlić a dźěłać w Zhorjelcu na wobmjezowany čas štyrjoch tydźenjow. Dotal je 21 domjacnosćow – poriki a swójby z dźěćimi – žiwjenje w měsće wupruwowało. Projekt je za samostatnych runje tak kaž za swobodnje skutkowacych mysleny.
Wosebje młodźi ludźo čuja so z eksperimenta narěčani. Tak bě dotal wjac hač połojca wobdźělnikow 30 do 39 lět stara. Často pochadźeja woni z wjetšich městow a dźěłaja w kreatiwnych abo wuměłskich powołanjach. „Z pomocu wědomostneho naprašowanja na kóncu přebytka dóstawamy nowe dopóznaća za měšćanske wuwiće Zhorjelca a přirunajomne města“, wuswětla rěčnica IÖR Heike Hensel.
Konflikty wody dla budu přiběrać
Kak dale z wodu w regionje? Pod tutym hesłom je njedawno nawoda sakskeho zarjada za rěčne zawěry Sprjewje a Nysy Sebastian Fritze z Budyšina we wobłuku zjawneho čitanskeho cyklusa „Łužiske rozmołwy wo wodźe“ na Braniborskej techniskej uniwersiće wo přichodnych problemach jězorow a rěkow přednošował.
Choćebuz (GW/SN). Ćopliša a sušiša – klima we Łužicy je so minjene sto lět jasnje přeměniła. Z mnohimi ličbami a diagramami je diplomowy geologa Sebastian Fritze, kiž hižo wot lěta 1998 w sakskim zarjedźe za rěčne zawěry Sprjewje a Nysy skutkuje, to wobkrućił, štož tež normalny čłowjek pomału pytnje. Temperatura přiběra – wosebje w lěsach – a mnóstwo dešća woteběra.
Na tarifowe zrěčenje so skónčnje dojednali
Kamjenc (SN/JaW). Sobudźěłaćerjo Kamjenskeho baterijoweho zawoda Accumotive dóstanu wot klětušeho wjace mzdy. Kaž dźěłarnistwo IG metal dźensa zdźěla, stej so wčera dźěłarnistwo a wjednistwo zawoda w Lessingowym měsće po něhdźe połdra lěta trajacych jednanjach na to dorozumiłoj, přewzać sakske płoninowe tarifowe zrěčenje metaloweje a elektroindustrije. „Dźensa je wosebity dźeń za cyłu wuchodnu Saksku“, hódnoćeše wuspěch nawoda jednanjow a prěni społnomócnjeny IG metal we wuchodnej Sakskej Jan Otto.
Za sobudźěłaćerjow Kamjenskeho zawoda Deutsche Accumotive, kotryž je stoprocentna wotnožka awtotwarca Daimler, to rěka, zo změja hač do lěta 2021 stoprocentowsku mzdu po mjenowanym tarifje a tak wot noweho lěta 200 do 600 eurow měsačnje wjac w kapsy, pisa dźěłarnistwo. Dale płaći dźěłodawar přistajenym jónkrótnje 1 000 eurow. Krok po kroku zwyša tež dowol na 30 dnjow wob lěto. Nimo toho chcedźa přichodnje hodowny pjenjez płaćić.
Ćahi njejězdźa
Kamjenc/Kinspork (UM/SN). Sakska měšćanska železnica je w minjenej nocy wobchad dospołnje a bjez připowědźenja zastajiła. Nimo čarow we wuchodnych Rudnych horinach je tež zwisk mjez Kamjencom resp. Kinsporkom a Drježdźanami potrjecheny. Sta pasažěrow čakachu podarmo na nastupišćach. Ani předewzaće same ani wobchadny zwjazk Hornje Łobjo (VVO), w kotrehož nadawku ćahi mjez Łužicu a sakskej stolicu jězdźa, njeběštej dźensa dopołdnja nastupajo dokładniše rozjasnjenje docpějomnej.
Zjawnoprawniskemu sćelakej MDR předleži po swójskim podaću zdźělenka Sakskeje měšćanskeje železnicy, w kotrejž předewzaće zastajenje wobchada mjez druhim ze „špatnym stawom trasow“ wopodstatni: „Masiwne wegetaciske škody su w minjenych lětach prawidłownje kolizije ćahow a tak deficit wjacorych milionow eurow wuskutkowali. Wot lěta 2014 je sydomměstnowa suma stratow nastała, kotraž likwiditu Sakskeje měšćanskeje železnicy jako předewzaće srjedźneho stawa masiwnje wobćežuje.“
Lětnje cholowy a t-shirty požadane
Tajku domiznu chcyli tež měć
Wučomnicu kaž ju móže sej serbske nakładnistwo jenož přeć: „Powšitkownje so zajimuju za nakładowanje, wosebje pak tute městno mje wabješe. Wšako je Ludowe nakładnistwo Domowina jeničke serbske nakładnistwo. Chcych wědźeć, kak serbskorěčna literatura nastanje, na kotre wašnje so cilowe skupiny narěča a tak dale. Tu sy zamołwity, zo so serbska rěč dale dawa. A to mam za wažny nadawk“, rozłožuje Jadwiga Šnajdrec.
Dwurěčnje popisane stejnišća
Zažniši kónc milinarnjow wobličili
Lěto 2038 je komisija za rozrost, strukturnu změnu a dźěło zwjazkoweho knježerstwa kónc wudobywanja brunicy poručiła. Studija Załožby Rosy Luxemburg nětko zwěsća, zo móhli hižo w lěće 2035 poslednju łužisku wulkomilinarnju wot syće wotpinyć.
Wučomnicy maja nowe šansy we Łužicy
Wojerecy (JoS/SN). Wojerowska Towaršnosć za wu- a dalekubłanje (GAF) je posledni dźeń wukubłanskeho lěta 2018/2019 pjeć wučomnikow po wuspěšnym pruwowanju do powołanskeho žiwjenja rozžohnowała. Tónkróć přewjedźechu zarjadowanje w mjeńšim kruhu, wšako běchu so mnozy hižo do prózdnin abo na dowol podali.
Rozžohnowanje bě přiwšěm dostojne. Wučomnicy móža so tuž nětko powołansce dale wukmanjeć, na přikład w Zwjazkowej woborje abo na studiju.
Nawoda wobłuka wukubłanje pola GAF Kay-Uwe Schollmeier je młodostnym gratulował, prajo: „Sće pilni byli a powołanje nawuknyli. Z wuspěšnymi pruwowanjemi njejsće swoje wukubłanske zawody přesłapili.“ Wšitcy běchu z docpětymi wukonami spokojom a chcedźa w zawodźe wostać. Jenož jedyn wotchadnik je so w druhim předewzaću požadał.
