Maja zetkanišćo generacijow
Wulka inwesticija zmóžnja towarstwam najlěpše wuměnjenja
Hamor (CK/SN). Jako wulki dźeń pomjenowa wjesnjanosta Achim Junker (CDU) zawčerawšim wotewrjenje noweho zetkawanskeho centruma w Hamoru. Horni poschod twarjenja, w kotrymž stej zakładna a swobodna srjedźna šula zaměstnjenej, ma wotnětka towarstwam jako domicil słužić a so nimo toho za zarjadowanja wužiwać. Zo so tam młodźi a starši ludźo zetkawaja, je wotpohlad. Socialneho dźěłaćerja jako organizatora zhromadnych akcijow pak njezměja. To dyrbja kubłanišći a towarstwa rjadować. „Štožkuli pak so tu čini, smy rady pódla“, rjekny nawoda swobodneje srjedźneje šule Ralph Berthold.
Lětsa kasowy kredit trjebali
Njeswačanska gmejna chce swój niski niwow zadołženja dale dodźeržeć. Tuchwilu su z něhdźe 270 eurami na wobydlerja daloko pod sakskim přerězkom, kaž na zašłym posedźenju gmejnskeje rady rěkaše.
Njeswačidło (JK/SN). Wot sakskeho knježerstwa přilubjena lětna pjenježna podpěra 70 000 eurow k spěchowanju wjesneho ruma je za lěto 2018 do Njeswačidła dóšła. Podpěru płaća wjesnym komunam wotnětka hač do lěta 2020. Městam a gmejnam je přewostajene, što z pjenjezami činja, maja pak so pozitiwnje na hospodarsku situaciju komuny wuskutkować a dyrbja je na dobro wobydlerjow nałožić. Komornica Liliane Wetzko je gmejnskim radźićelam na minjenym posedźenju tučasnu hospodarsku situaciju gmejny rozłožiła. Činješe to jara dokładnje a přeswědči jich wo tym, zo je spomóžne dale zlutniwje hospodarić. Na jednym z přichodnych posedźenjow chcedźa so radźićeljo dojednać, za čo přidatne srědki nałoža, štož njebudźe lochko. Wšako maja dosć městnow, hdźež jich w gmejnje črij tłóči.
Po maćernym dowolu ma Marjana Dietrichowa w Ralbicach wot ...
Nimamy tu trajneho přebytka
Nětko nazymu, hdyž so přiroda poněčim na wotpočink hotuje, myslimy tež my ludźo časćišo hač hewak na zachodnosć žiwjenja. Lětsa wšak smy dožiwili přewšo krasne lěćo, prózdninarjam a dowolnikam k wjeselu. Tak mějachu w kupjelach rekordne ličby wopytowarjow. Ratarjo, rybarjo a mnozy dalši porno tomu su pak pod wulkej horcotu a ekstremnej suchotu ćerpjeli.
Wšo to je mjeztym zabyte. Dešć njeje jenož wochłódźenje přinjesł, ale zemja je so zaso napiła, byrnjež deficit lěća zdawna hišće wurunany njeje. Nětko w času kermušow ludźo jenož njeswjeća, ale so tež za Bože dary z polow a zahrodow dźakuja. Byrnjež ratarjo lětsa mjeńše abo wjetše žnjowe straty měli, njetrjeba nichtó z hłodom tradać.
Hladanske słužby jara wužadane
Po wšej Łužicy zastaruja hladanske słužby starych abo chorych ludźi doma. Wobjed woža jim socialne słužby na skazanku. Ludźo su dale a starši a trjebaja pomoc. Kónc lěta 2015 bě jich po cyłej Němskej 2,9 milionow ludźi, kotřiž běchu na podpěru pokazani. Něhdyša idylka wo starcomaj na wuměnku, wo kotrejuž so dźěći a wnučki staraja, zda so wusonjena być. Nawopak: Ličba tych, kotrychž ambulantnje zastaruja, je dźeń a wjetša. Nimale třećinu něhdźe třoch milionow hladanja potrěbnych doma zastaruja (staw 2015). Na jednym boku nochcedźa starši ludźo do starownje abo hladarnje. Na druhim boku dóstawa hladanske zawěsćenje za domjace zastaranje wjace spěchowanja. Přiwšěm je to wulke wužadanje za hladanske słužby. Wone dyrbja fleksibelne być a maja přiwšěm najmodernišim standardam hladanja wotpowědować.
Přesydlenju přihłosowali
Slepo (CK/SN). Jednohłósnje přihłosowała je Slepjanska gmejnska rada na wčerawšim posedźenju zakładnemu zrěčenju za přesydlenje Miłoraza. Wo tym běchu měsacy dołho jednali. Sčasami hrožeše zrěčenje samo zwrěšćić, skónčnje pak so tola na kompromis dojednachu. A tón radźićeljo wčera schwalichu.
Wothłosowanje wo samsnym zrěčenju je porno tomu wječor do toho w Miłorazu zwrěšćiło, dokelž někotři čłonojo Trjebinskeje gmejnskeje rady bjez zamołwjenja na posedźenje přišli njeběchu. „Tajke zadźerženje njewotpowěduje winowatosćam gmejnskeho radźićela“, rjeknyštaj Slepjanski wjesnjanosta Reinhard Bork (njestronjan) a jeho Trjebinski kolega Waldemar Locke (CDU). Wonaj so Slepjanskim radźićelam za rozsud dźakowaštaj. Wobydlerjo Miłoraza běchu sej póndźelu konsekwency žadali. Po sakskim gmejnskim porjedźe pak njesmě wjesnjanosta ani porok ani pokutu wuprajić. To smě jenož gmejnska rada.
Hančik nawoda
Krótkopowěsće (24.10.18)
Kandiduje za prezidij CDU
Drježdźany. Sakski ministerski prezident Michael Kretschmer a předsyda sakskeje CDU kandiduje na zwjazkowym zjězdźe unije spočatk decembra w Hamburgu za prezidij strony. To je krajne předsydstwo CDU póndźelu wječor wobzamknyło a wčera wo tym informowało, kaž powěsćernja dpa piše. Kretschmer požada so wo naslědnistwo bywšeho zwjazkoweho nutřkowneho ministra Thomasa de Maizièra.
Wo wotsunjenju jednali
Budyšin. Sakske wyše zarjadniske sudnistwo w Budyšinje je dźensa wo wotsunjenju Libyčana jednało. Próstwa ćěkanca na azyl bu před wjace hač dwěmaj lětomaj wotpokazana. Na to bě předchłostany, dźensa 22lětny skoržił. Wobdźěleny bě wón tež na rozkorach mjez młodymi ćěkancami a Němcami w septembrje 2016 na Budyskich Žitnych wikach. Z rozsudom liča jutře.
Tołmačerjo na šulach
Policija (23.10.18)
Paduch awta pěši ćeknył
Porchow. Hišće prjedy hač wobsedźer pytny, zo je něchtó jeho BMW pokradnył, su jón policisća wčera rano na awtodróze A 4 zwěsćili. Dźewjeć lět stare jězdźidło bu do toho w bayerskim Hofje pokradnjene. Zhromadna wobsadka zwjazkoweje a sakskeje policije chcyše jězdźidło při Ohornskej wotbóčce zadźeržeć a kontrolować. Šofer pak přikaz ignorowaše a smaleše do směra na Zhorjelc. Při Porchowskej wotbóčce wón awtodróhu wopušći, jězdźidło wotstaji a pěši ćekny. Wjacori policisća za njeznatym tež z pomocu helikoptera pytachu, njemějachu pak žadyn wuspěch. W awće zwěsćichu, zo bě zamk skóncowany. Po kriminalnotechniskim přepytowanju smě sej wobsedźer swój BMW zaso wotewzać.
Wopytaja plahowarnju rybow
Korzym. Přichodne zarjadowanje Křesćansko-socialneho kubłanskeho skutka wo strowym zežiwjenju zaběra so jutře, srjedu, w 19 hodź. z wosebitymi rybami kaž pangasius a tilapa, kotrež w Hornjej Lužicy plahuja. Wosebitosć je, zo wotměje so wječor direktnje w Korzymskich akwakulturach tzwr. Tam budu sej wobdźělnicy produkcisku městnosć wobhladać móc a tójšto wo plahowanych rybach zhonja. Nimo toho jim kuchinski šef Ramnowskeho hrodu Axel Göber někotre recepty přeradźi. Zajimcy njech přizjewja so pod telefonowym čisłom 035796/ 97 115.
Na zjawny přednošk
Budyšin. Serbski institut přeprošuje na zjawny přednošk dr. Fabiana Kaulfürsta jutře, srjedu, w 19 hodź. do bašty Serbskeho ludoweho ansambla. Wón porěči němsce wo temje „Zwukowe dataje k němsko-delnjoserbskemu słownikej jako zakład za rozestajenje z delnjoserbskej ortoepiju“.
Kniha a jubilej
