Kulow (AK/SN). Meblowy zawod Maja w Brěžkach smědźa rozšěrić. Za to je Kulowska měšćanska rada srjedu zelenu swěcu dała. Jednohłósnje bě wona trěbnu 6. změnu wobtwarjenskeho plana za Brěžčanske přemysłownišćo wobzamknyła. Tak móže Maja nětko swój zawod wo 4,9 hektarow rozšěrić.

Brěžčanska meblowa twornja trjeba płoninu za swój přichodny wonkowny skład. „Tak pomjeńšimy ličbu transportow a zdobom poćežowanje dróhow wulkich a ćežkich Lkw-jow dla“, rozłoži nawoda twarskeho zarjada Stephen Rachel. Na płoninje móža tohorunja twarjenja za produkciju a skład nastać. „Z wulkej hordosću nas napjelnja, zo mamy ze zawodom Maja sylny hospodarski faktor w Brěžčanskim přemysłowym parku“, wuswětli Stephen Rachel a potwjerdźi „smy hordźi, zo mamy tajkeho wulkeho dźěłodawarja tu na městnje. Ze zawodom Maja hižo wjacore lěta spomóžnje hromadźe dźěłamy.“

Twornja Maja přewozmje planowanske kóšty za zdźěłanje noweho wobtwarjenskeho plana. Tak nima město Kulow žanežkuli wudawki w naležnosći. Nětko chcedźa nošerjow zjawnych zajimow a wobydlerjow do planowanja zapřijeć.

Lětušu serbsku rozprawu podała

Choćebuz. Swoju lětnu rozprawu je społnomócnjena za serbske naležnosće města Choćebuza Ana Kosacojc-Kozelowa předwčerawšim na posedźenju tamnišeje zhromadźizny měšćanskich zapósłancow podała. Jedyn dypk rozprawy bě wuradźowanje wyšeho měšćanosty Holgera Kelcha (CDU) ze Serbskim sejmom w měšćanskim domje.

Předstaja „Serbski rekwiem“

Ketlicy. Generalka za předstajenje „Serbskeho rekwiema“ Korle Awgusta Kocora pod nawodom Lubijskeho cyrkwinskeho hudźbneho direktora Christiana Kühny budźe póndźelu w 19.30 hodź. w Ketličanskej cyrkwi. Twórba zaklinči potom njedźelu, 10. nowembra, w 16 hodź. na samsnym městnje. Zastupne lisćiki online rezerwować je móžno pod adresu .

Porokuje přechwatanosć

Rakečanska ewangelska srjedźna šula wobsteji dźesać lět

Markus Henninger je nawoda Rake­čanskeje Pawołskeje šule. Pochadźacy z Kamjeneje chodźeše wón w Rakecach do šule a studowaše w Dortmundźe wučerstwo. Nawróćiwši so do Sakskeje skutkowaše najprjedy w Budyšinje a Malešecach. Wot wšeho spočatka je wón­ z projektom Pawołska šula zwja­zany a ju wot jeje druheho lěta wobstaća nawjeduje. Lětsa swjeći ewangelska srjedźna šula w swobodnym nošer­stwje dźesatu róčnicu wobstaća. Měrćin Weclich je so z Markusom Hennin­ge­rom rozmołwjał.

Kajka je struktura Pawołskeje šule?

M. Henninger: Mamy kóžde lěto wjace hač 150 šulerjow wot 5. do 10. lětnika. Tež jako swobodna šula poskićamy realne a hłowne zakónčenje. Smy jednoča­rowe kubłanišćo ze šěsć rjadow­njemi. 15 wučerjow pola nas skutkuje, zdźěla połnje, zdźěla jenož někotre hodźiny, hdyž su w druhich šulach zasadźeni. Přisłušamy Ewangelskemu šulskemu towarstwu Budyskeho wokrjesa.

Zwotkel šulerjo pochadźeja?

Annegret Bensch je mějićelka Rakečanskeho wobchoda, w kotrymž bě filiala „Quelle“ zaměstnjena. Dźensa poskića wikowarka nimo drasty pućowanske jězby do cyłeho swěta.

Rakecy (SN/mwe). Hižo při załoženju Rakečanskeje Pawołskeje šule je překupča Annegret Bensch kubłanišćo z jednotnej drastu zastarała. Mjez druhim su to čerwjeny T-shirt a krótke čorne cholowy za spor­towu wučbu. „To bě wurazne přeće wjetšiny staršich, zo jich dźěći wšitke w samsnej drasće do šule chodźa. Tak móža so město markoweje garderoby skerje z wukonami w šuli profilować“, wona podšmórnje. „To měło wšudźe tak być“. Při naličenju lěpšin tajkeho rozsuda mjenuje wona nimo mjezsobneho a často bolostneho njetrjebawšeho wuhraća mjez šulerjemi rańše zdrasćenje. „To njetrjebaja dołho přemyslować, kak woblečeni woni do šule du.“ Wot njeje wobstarana a na předań poskićena šulska drasta je poprawom powołanska drasta, mjez druhim z hoteloweje branše.