„Betonowe štomiki“ a nowy film
Dźensa za tydźeń zahaja so w Budyšinje 635. Wjacławske wiki, pječa najstarše adwentne wiki Němskeje. Na wopytowarjow čakaja lětsa někotre nowosće, kotrež je sej kulturny zarjad města wumyslił.
Budyšin (SN/MWj). Wot 30. nowembra hač do 23. decembra chce něhdźe 90 wikowarjow a gastronomow swoje twory na Wjacławskich wikach poskićeć. Wosebitostka budźe wot 7. do 9. decembra, hdyž přeproša na srjedźowěkowske wiki prěni raz w saněrowanej rozwalinje mnišeje cyrkwje. Dalša nowosć je, zo pokazaja štwórtk, 6. decembra, woblubowanu bajku wo popjelawce. Tydźeń pozdźišo změja na Hłownym torhošću tak mjenowanu apres-ski-party. A posledni štwórtk wikow budźe potom klasikar „Die Feuerzangenbowle“ widźeć.
Smjertna njedźela abo njedźela wěčnosće w nowembrje je poslednja ...
Zabiwacy argument
Při Budyskej Serbskej wěži předewzaće BSB z durinskeho ...
Twarja nowe spjatnišćo w Radworju
Krótkopowěsće (23.11.18)
Nowy rozmołwny rjad
Drježdźany. Sakski ministerski prezident Michael Kretschmer (CDU) zahaji dźensa wječor w Drježdźanskej cyrkwi Třoch kralow nowy rjad rozmołwow. Pod hesłom „Ze sobu rěčeć! – Wobydlerska dźěłarnička“ chce sej wón časćišo z ludźimi mysle wuměnjeć. Tajke rozmołwy su we wšěch sakskich wokrjesach, Lipsku, Drježdźanach a Kamjenicy, planowane.
Žane přidatne pjenjezy załožbje
Drježdźany. Namjet frakcije Lěwicy w Sakskim krajnym sejmje, Załožbje za serbski lud přidatnu inflacisku ratu 120 000 eurow płaćić, je zwrěšćił. Kulturny wuběrk krajneho sejma je wčera namjet we wobłuku wuradźowanja wo naćisku dwójneho etata 2019/2020 wotpokazał. Lěwica chcyše, zo Sakska tak dynamizaciju załožbowych pjenjez nastorči.
Z wobrotom zdwórliwosće
Přeprošeja na reje
Budyšin. Na rejwanski wječor přeprošatej rozmołwne koło Budyski kraj a Lipšćanska skupina Serbska reja jutře, 23. nowembra, we 18 hodź. do Budyskeje Röhrscheidtoweje bašty. Poriki su runje tak witane kaž samostejacy. Lipšćenjo předstaja serbske reje a so wjesela, hdyž zajimcy sobu rejuja. Dale budźe składnosć rozmołwy a bjesady. W barje Röhrscheidtoweje bašty poskićeja napoje a přikuski. Zastup je darmotny.
Přesadźuja namakanki
Budyšin. Přichodne zjawne přesadźowanje namakankow wotměje so wutoru, 27. nowembra, wot 16.30 hodź. w delnim foyeru Budyskeje radnicy. Hižo hodźinu do toho móža sej zajimcy poskićene wěcy wobhladać. Přesadźować chcedźa mjez druhim kolesa za žony a muži kaž tež hórske kolesa. Dale w poskitku budu laserowy měrjenski nastroj, časniki, drasta a wjele dalšeho. Štóž chce sej z toho něšto zdobyć, ma to na městnje zapłaćić a dyrbi nimo toho personalny wupokaz sobu měć.
Prěni dźěl darow je po puću
Seniorojo ze Šwicarskeje na wopyće we Łužicy byli
„Witajće k nam do Łužicy“ rěkaše hesło jězbneho předewzaća Vivat kultura ze St. Gallena za minjenu njedźelu, jako wopyta dwaceći seniorow ze Šwicarskeje – zwjetša bywši předewzaćeljo – Łužicu, zo bychu so tež ze Serbami zeznajomili. Hižo na jězbje z Drježdźan do Budyšina informowaše Jurij Łušćanski hosći wo stawiznach, kulturje, dźensnišim žiwjenju a narodnych stykach. Dr. Manfred Thiemann wodźeše jich na to po starym měsće hač na Mikławšk a rozłoži jim wosebitosće historiskeho města. Wosebje zajimowachu so wopytarjo za medije a dwurěčne kubłanje, ale tež za hospodarstwo regiona.
„W Šwicarskej wšak mamy wjacore rěčne regiony a narodnu mjeńšinu Retoromanow. Tohodla bě runje za nas jara zajimawe, štož smy we Łužicy wo Serbach zhonili“, praji nawoda jězbneho předewzaća Christoph Hug. Na dźesaćdnjowskej jězbje wopytachu šwicarscy wulětnikarjo w Lipsku a Drježdźanach předewšěm muzeje a koncerty. Minjenu njedźelu wječor dožiwichu w Drježdźanskej Křižnej cyrkwi Johannesa Brahmsowy „Němski rekwiem“.
Policija (22.11.18)
Dom so dospołnje wupalił
Chróst. Wulku wěcnu škodu načinił je woheń, kiž bě w nocy na srjedu w jednoswójbnym domje w Chrósće pola Wulkeje Dubrawy wudyrił. Jako 38lětny krótko do połnocy domoj přińdźe, jemu płomjenja hižo napřećo sapachu. Najebać prócowanja wjace hač 70 wobornikow z dwanaće jězdźidłami so dom dospołnje wupali. 38lětny so snadnje zrani.
