Krótkopowěsće (06.12.18)
Komuny měli financy skrućić
Drježdźany. Sakski zličbowanski zarjad je komuny namołwjał, zo bychu swoje financy dale skrućili. Mnohe z nich dołh swojich jadrowych budgetow hižo wjacore lěta pomjeńšeja, je pak trjeba tónle kurs dale wjesć, rjekny šef zarjada Karl-Heinz Binus dźensa w Drježdźanach. Dokładny přehlad wo komunalnym dołhu pak zličbowanski zarjad nima.
Branšowy dźeń w Budyšinje
Budyšin. Předewzaća tekstilneje branše zepěraja so na sobudźěłaćerjow z wukraja, wuchadźa z wčerawšeho zarjadowanja tekstilneje a drastoweje branše w Budyskim załožerskim a technologiskim centrumje. Žadaja sej tuž spěchowanske programy za integraciju ludźi kaž tež dalše zawjazowanje němskich zarjadow. Na wuchodźe Němskeje je w branši něhdźe 16 000 ludźi přistajenych.
Towarstwam a iniciatiwam
Njewšědna wojerska kapałka w Chrósćicach
Před 100 lětami skónči so Prěnja swětowa wójna – z wjace hač 15 milionami mortwych dotal najkrawniša w stawiznach čłowjestwa. W němskich wójskach – předewšěm w sakskim a pruskim – wojowachu tež tysacy Serbow na bitwišćach na zapadźe a wuchodźe Europy. Jeničce katolski serbski kraj zhubi w surowym boju wulkomocow wjacore sta swojich synow. Hižo krótko po wójnje rozsudźi so tuž tež we Łužicy wjele gmejnow a wosadow, stajić swojim padnjenym pomniki, zo njebychu na jich mjena zabyli. Jedyn z prěnich w serbsko-katolskich gmejnach bě – mjeztym wotstronjeny – Radworski pomnik w meji 1919; bórze slědowachu Miłoćicy a Wotrow (1920), Jawora, Wudwor a Njebjelčicy (1921) kaž tež Jaseńca a Worklecy (1922). Tež Swinjarnja, Kukow a Šunow stajichu swojim padłym swójske pomniki.
Jónkrótne wuwzaće
Policija (05.12.18)
Bjez dowolnosće z awtom po puću
Budyšin. Dokelž při wotbočenju z Wojerowskeje na Schliebenowu swoje jězdźidło wokomik w horšći njeměješe, je 20lětny wodźer BMWja póndźelu w Budyšinje policiji napadnył. Jako zastojnikaj za nim jědźeštaj, stupi młody muž na płun a spyta do směra na Židow a Ćemjercy ćeknyć. Na Ćemjerčanskim puću jeho skónčnje zadźeržeštaj. Tam so wukopa, zo 20lětny scyła žanu jězbnu dowolnosć njeměješe. Nimo toho namakachu w jeho awće titku z běłej maćiznu. Drogowy test pola njeho pak bě negatiwny.
Kak wulki měł parlament być?
Běła Woda (AK/SN). Na swojim zašłym posedźenju zaběrachu so čłonojo Běłowodźanskeje měšćanskeje rady mjez druhim z prašenjom, hač měł so parlament wot 22 na 18 radźićelow pomjeńšić a hač njemóhli tak zaměrnišo dźěłać. „Naše město dale wobydlerjow zhubja. Kónc lěta 2017 mějachmy jich hišće 16 348. Na to měli reagować“, podšmórny radźićel Andreas Friebel z frakcije Klartext w swojim namjeće. Hižo nětko su posedźenja radźićelow lědma raz połnoličbne, dokelž někotři pobrachuja. Andreas Friebel tuž měni, zo měli móžnosće, kotrež sakski gmejnski porjad skići, nałožować. Wón namjetuje, měšćansku radu na 18 čłonow pomjeńšić. To by, tak Friebel dale argumentowaše, tohorunja „přinošk ke konsolidaciji měšćanskich financow było. Mnohostronskosć měnjenjow by tež w pomjeńšenej měšćanskej radźe zaručena była.“
We Wěteńcy znowa škotowali
Po dobrym wothłosu loni wotmě so minjenu sobotu znowa škotowy turněr we Wěteńcy. Mikławš Zahon je sej młódšich kaž tež staršich přećelow zbliska a zdaloka přeprosył, zo bychu najlěpšich kartyplacarjow ze swojich rjadow zwěsćili. Wubědźowali su so wo pućowanski pokal. Cyłkownje wobdźěli so 22 lubowarjow škota.
Po tym zo bě po prěnim kole z 21 wobdźělnikami dobyćer wječora z 1 827 dypkami hižo nimale wěsty, popřachmy sej přestawku z ćopłym přikuskom. Nalada při rozmołwje a wosebje napjatosć na wuslědk druheho koła w běhu wječora widźomnje přiběraše. 22. hrajerjej, kiž so hakle druhemu kołu přidruži, přiznachu přerězk dypkow prěnjeho koła ze šwarnymi 1 008 dypkami. W prěnim kole bě so za sydom blidami ze stajnje třomi škotowarjemi 36 hrow wotměło. W druhim kole rozrjadowachu so hrajerjo na štyri blida ze stajnje štyrjomi a na dwě blidźe z třomi hrajerjemi.
Wočakowanja so njespjelnja
Spěšny internet w zarjadniskim zwjazku wšitcy njedóstanu
Chrósćicy (JK/SN). Tójšto dwělow, prašenjow a wobmyslenjow nastupajo projekt k wutwarej spěšneho interneta w Budyskim wokrjesu wujasni wčerawše informaciske zarjadowanje předewzaća Telekom a Budyskeho krajnoradneho zarjada w Chróšćanskej „Jednoće“. Wulke přeće wobydlerjow, přichodnje ze spěšnosću hač do 50 megabitow na sekundu w interneće surfować móc, drje so njespjelni. To bě zdobom wotmołwa zamołwiteho Telekom na prašenje wjacorych wobydlerjow, kotřiž naprašnik za přizamk na spěšnu škleńčnonićowu syć dóstali njeběchu. Wšitcy ći, tak rjekny regionalny manager Sten Pinkert, maja hižo zakładne zastaranje z minimalnej spěšnosću 30 Mbit/s zaručene. Dalši wutwar njehodźi so spěchować a njeje wobstatk tučasneho projekta. Najebać to pak dóstanu tež woni wo něšto spěšniši internet přez wobstejace koporowe kable. Wutwarić chcetej Telekom a ENSO syć ze škleńčanymi nićemi jenož tam, hdźež njebě dotal hišće móžno, ze znajmjeńša 30 Mbit/s w interneće po puću być.
Kołolět nad wokrjesom dobyła
Wopłóčkowy kanal skoro dotwarjeny
Z aktualnym stawom němsko-serbskeho šulskeho centruma je so Slepjanska gmejnska rada wčera wospjet zaběrała. To pak njebě jenički twarski projekt, kotryž we wsy tuchwilu maja.
Slepo (CK/SN). Po tydźenje trajacych wokołopućach za wobchad twara wopłóčkoweho kanala w Slepom dla je projekt nětko w dalokej měrje dotwarjeny. Wo tym informowaše nawoda twarskeho zarjada gmejny Steffen Seidlich wčera gmejnskich radźićelow na jich posedźenju. Młynski puć a Zawodowy puć stej hač na małe zbywace dźěła hotowej, wotrězk na Měrowej je hižo asfaltowany. Dźensa chcyše tam krajny zarjad za dróhotwar a wobchad pruwować, hač je wšitko w porjadku. Potom su jenož hišće markěrowanja na puću trěbne. „Planowane je, Měrowy puć pjatk wobchadej přepodać“, Seidlich připowědźi.
