Procedury zjednorić
Pančicy-Kukow (SN/JaW). Sakski nutřkowny minister Roland Wöller (CDU) je nazhonił, zo je w gmejnach zarjadniskeho zwjazka Při Klóšterskej wodźe serbšćina žiwa rěč. Takle zjima předsyda zarjadniskeho zwjazka Měrko Domaška wčerawši wopyt ministra w Pančicach-Kukowje. „W našich pjeć gmejnach njeje serbskosć jenož na značkach čitajomna, ale móžeš ju wšědnje dožiwić“, rjekny Domaška po rozmołwje ministra z wjesnjanostami čłonskich komunow a sobudźěłaćerjemi zarjada.
Wobnowjeja kružny wobchad
Specifika NSLDź bóle zapřijata
Němsko-Serbske ludowe dźiwadło Budyšin (NSLDź) ma nowe zawodne wustawki. Wone rjaduja dźiwajo na specifiku domu dokładnišo hač dotal zasadźenje „naměstnicy za serbske dźiwadło“. Budyski wokrjesny sejmik je je na swojim posedźenju 25. junija wobzamknył. Nowe zawodne wustawki NSLDź su wot 1. septembra płaćiwe.
Budyšin (SN/at). Budyske dźiwadło je po cyłej Němskej jeničke profesionalne dwurěčne jewišćo. Zo by so to w zawodnych wustawkach domu hišće jasnišo jewiło, su wokrjesni radźićeljo hromadźe ze zarjadnistwom a zamołwitymi NSLDź nimale štyri lěta płaćiwe tuchwilne wustawki předźěłali. Kaž přisłušna přirjadnica krajneho rady Birgit Weber před nowinarjemi rjekny, su to wudospołnjenja we wzajomnym zajimje.
Krótkopowěsće (26.07.18)
Pawšalu bórze přepokazuja
Drježdźany. Dźensa nabywa zakoń płaćiwosć, kotryž rjaduje komunalnu pawšalu maksimalnje 70 000 eurow kóždej sakskej gmejnje. Wužiwanje srědkow je wólne, hodźa so za inwesticije abo zarunaja swójske srědki za spěchowane inwesticije. Kaž sakske ministerstwo za financy zdźěla, připokazanki bjezposrědnje přichodne dny přepokazuja. Knježerstwo chce tak komuny na kraju skrućeć.
Satelity za Galileo dospołne
Kourou. Europska swětnišćowa organizacija ESA je wčera z francoskeho Kourouwa najprjedy poslednje štyri satelity za europski satelitowy nawigaciski system Galileo do swětnišća třěliła. Z nětko 26 satelitami su techniske wuměnjenja date, zo hodźi so prěni tajki ciwilny system wot spočatka 2019 za globalnu nawigaciju wužiwać. Ameriski GPS je kaž ruski Glonass a chinski Beidou wojerski system.
Nadróžny ćah w Čěskej Šwicy
Nadźija na sprawne dołhodobne šansy
Młody Afghaničan ma wulki cil: Chce so z prawiznikom stać
Jeho zakónčace pruwowanja wobstejachu z třihodźinskeho pisomneho a ze štyrihodźinskeho ertneho dźěla. Za kurs němčiny po rěčnym certifikaće B2 je so Jome Khan Saidi na Budyskej ludowej uniwersiće zašłe měsacy chětro poćił. „Pruwowanja njeběchu lochke“, rozłoži 19lětny Afghaničan w domje za ćěkancow na Wojerowskej Thomasa Müntzerowej. „Dyrbiš běžnje rěčeć móc a list ze znajmjeńša 150 słowami pisać.“ W swojim přikładźe pisaše Jome list sportowemu towarstwu. W nim prošeše wo informacije k poskitkam cyłka.
W ertnym pruwowanju kładźechu pruwowarjo wosebje wulku wažnosć na korektne wurjekowanje. Samo dialekty měješe pruwowanc rozeznawać. Jome běše so intensiwnje na pruwowanja přihotował. W jeho rjadowni bě 23 ćěkancow wšelakeho pochada, na přikład ze Syriskeje, z Irana, Pakistana, Afghanistana, Uzbekistana, Čečenskeje a tež z Indiskeje. „Běchmy dobra rjadownja bjez konfliktow. To mje wězo jara zwjeseli“, praji 19lětny, kotryž je mjeztym dołhu odyseju zakónčił.
Hižo jako ćěšenk sobu ćeknyć dyrbjał
Policija (25.07.18)
Žitnišćo so paliło
Póckowy. Něhdźe w 14.45 hodź. paleše so wčera mjez Smělnej a Póckowami žitnišćo. 48 kameradow wohnjowych woborow z Póckowow, Smělneje, Biskopic a Wjazońcy bě płomjenja na něhdźe pjeć hektarow wulkim zahonje njeposrědnje při S 120 zhašało. Kak je so žitnišćo zapaliło, hišće jasne njeje. Fakt je, zo su tam w samsnym času młóćili.
Woheń w sušerni wudyrił
Rózbork. W Rózborku je so wčera popołdnju w drjewopředźěłanskim zawodźe paliło. Po dotalnych dopóznaćach je woheń w sušerni wudyrił. Něhdźe 50 kameradow sydom wohnjowych woborow płomjenja zhašachu.
Miłočenjo při haće swjećili
Trawu sykli a zdónk rozrězali
Rychwałd (FAG/SN) Rychwałdźenjo móža so woprawdźe kóžde lěto ze swojim swjedźenišćom a kupjelu k wjesnemu swjedźenjej widźeć dać. To je wulkotny ansambl, kotryž móže lědma druha wjes w tutym regionje skićeć. Zo bychu tajki hladany areal prezentowali, dyrbja čłonojo wjesneho a młodźinskeho kluba, kameradojo wohnjoweje wobory kaž tež mnozy dalši pilni wobydlerjo wjele prócy nałožować. Wosebje do 44. wjesneho swjedźenja mějachu wjacore dźěłowe zasadźenja.
Z wulkej miniplaybackowej show kaž kóžde lěto a před 20 lětami minjenu sobotu Rychwałdski swjedźeń zahajichu. K tomu sej hižo lěta wjednica pěstowarnje Bärbel Kramer ze swojim mustwom kłobuk na hłowu staja. Potom jenož w kubłanišću njezwučuja, ale tež starši ze swojimi pjerachami doma wšelake hudźbne sceny přeńdu. Čim bóle so wšitcy wjeselachu, zo bě lětuši wustup znowa nimoměry wuspěšny.
Kino w młynje wupadnje
Čorny Chołmc (SN/mwe). Kino pod hołym njebjom tež lětsa, kaž hižo před lětomaj planowane, w Krabatowym młynje w Čornym Chołmcu njebudźe. Zarjadowanje wot 2. do 5. awgusta, w 21 hodź., pak přeco hišće w interneće w kalendrje młyna steji. Kaž wčera wozjewjene, pak to z „organizatoriskich přičin“ njebudźe. Jednaćel Krabatoweho towarstwa Tobias Čižik na naše naprašowanje zdźěli, zo su z tym mjez druhim falowace wuměnjenja kaž trěbne pjenjezy wina. Tuž njemóža so mjez druhim trěbne a předrohe techniske nastroje wobstarać. Kaž Čižik dale rjekny, „běchu tež druhe wobstejnosće ćežke“, a doda: „Smy połneje nadźije, zo kino klětu nachwatamy a našim swěrnym fanam rjane dožiwjenje zmóžnimy.“
Tikety wot 1. awgusta dróše
Budyšin (SN/mwe). We Wobchadnym zwjazku Hornje Łobjo (VVO), kotryž busowe linije tež w Budyskim wokrjesu zasadźuje, budu jězdźenki wot 1. awgusta dróše. „Płaćizny přerěznje wo 2,1 procent stupaja, wostanu pak potom za znajmjeńša dwě lěće stabilne“, w nowinskim wozjewjenju VVO rěka. Jako přičinu mjenuje nowinski rěčnik Christian Schlemper stupace kóšty za energiju.
Patzelt znowa we Łužicy
Biblioteka čitarjam cyle bliska
Spočatk awgusta poda so Budyska jězdna knihownja zaso na puć
Kamjenc/Budyšin (SN/mwe). „Lětuše knižne lěćo słuša k najwuspěšnišim zańdźenych lět. Za nje je so wjace hač sto 11- do 16lětnych zapisało. Mjez nimi su šulerjo Budyskeho Serbskeho gymnazija, Worklečanskeje a Ralbičanskeje wyšeje šule kaž tež dźěći swobodneje ewangelskeje šule z Wóslinka“, wjednica Kamjenskeje biblioteki w Lessingowym domje Marion Kutter Serbskim Nowinam praji. Ze spěchowanskimi srědkami Sakskeje je knihownja za něhdźe tysac eurow sobu najnowše němske knižne wudaća za młodźinu nakupiła. Štóž z wobdźělnikow knižneho lěća w běhu tuchwilnych prózdnin tři title přečita, dóstanje wot sakskeho kultusoweho ministerstwa certifikat. „Wobdźělnicy maja knihi posudźować a do čitanskeje logoweje knihi zapisać. Někotři wučerjo dobrowólny čitanski wukon samo z dobrej censuru mytuja, štož je spočatk noweho šulskeho lěta mnohim wulkotny pohon“, tak Marion Kutter. 24. awgusta knižne lěćo w Kamjencu ze zarjadowanjom, na kotrež budu tež serbscy šulerjo přeprošeni, zakónča.
