Wandalojo po puću byli

Łuh. Njeznaći su so Nowe lěto na areal wětrnika we Łuze zadobyli. Tam zwočinjachu wšitke durje, kaž policija informuje. Dale wobškodźichu płót a zapusćichu cyłu ležownosć. Policija dale zdźěla, zo po prěnim přehledźe po wšěm zdaću ničo njepobrachuje. Při­wšěm nasta škoda něhdźe 3 500 eurow. Kriminalna policija pad přepytuje.

Prózdnu hródź zapusćili

Kołwaz. Tež w Kołwazu (Kohlwesa) w Bukečanskej gmejnje su wandalojo zachadźeli. Woni zapusćichu prózdnu hródź, hdźež rozbichu 29 woknow. Škoda wučinja něhdźe 300 eurow. Policija prosy swědkow wo pomoc.

Budyšin (SN/mwe). Wot 1. januara 2020 płaća nowe zakonje a rjadowanja. Naje­bać lěpšinu, zo stupa minimalna mzda wot 9,19 na 9,35 eurow na hodźinu, maja so wobydlerjo tež na podróšenja nastajić. Tak budu mnozy wodźerjo awtow hłubšo do móšnje sahnyć dyrbjeć. Za čłonow ADAC płaći zakładny tarif město dotal 49 nětko 54 eurow. Čłonstwo Plusa stupa wo dźesać na 94 eurow. A nowy premijowy tarif wučinja 139 eurow. Za jědnaće milionow šoferow změni so typowa klasa, a to ma wuskutki na přinošk za zawě­sćenje­ jězdźidła. Nowopřizjewjene awta­ njesmědźa wjace hač 95 gramow wu­storka CO2 na kilometer měć.

Gmejna Łaz ma sakski komunalny plan dwurěčnosće za pozbudźacy

Łaz (AK/SN). Gmejna Łaz zběra prěnje dobre nazhonjenja při zwoprawdźenju sakskeho komunalneho plana za dwurěčnosć. To podšmórnje wjesnjanosta Thomas Leberecht (CDU) w swojim faciće za lěto 2019. „Zwoprawdźić dwurěčnosć na gmejnskim teritoriju program enormnje wolóža. Mnohe projekty, kotrež dyrbjeli hewak na lisćinje cyle dozady storčić, móžemy nětko přewjesć“, wón bilancuje. „Tak móžachmy dwurěčne popisanje pućnikow na wubranych dróhach našich wjeskow, na přikład we Łazu, Koblicach, Mortkowje, Šćeńcy a we Wulkich Ždźarach, hižo zrealizować. Přichodnje změja gmejnski zarjad kaž tež wjesnjanosta nowe wizitki k dispoziciji – němsce a serbsce popisane. Naš domizniski kurěr smy tohorunja předźěłali, tak zo ma wón z přełožkami hłownych nadpismow nowy dwurěčny charakter dóstać.“

Nowe słužbne jězdźidła budu we Łazowskej gmejnje wotnětka dwurěčnje němsce a serbsce popisane. Tež při wólbnych wozjewjenjach móže komuna dźěło přełožowarjow dosahajcy honorować.

Nimale 150 wobydlerjow Bóščanskeje gmejny je nowolětny dźeń zhromadnje pućowało. Mjeztym třeći króć měješe čestnohamtski wjesnjanosta Stanij Ryćer­ (Bóščanske rjemjesło) za hwězdne pućowanje wotežki w rukomaj. Jemu­ poboku běchu mnozy pomocnicy, předewšěm gmejnscy radźićeljo.

Bóšicy (SN/MiR). „Z třećim pućowanjom smy zahajili tradiciju, kotruž lěto wob lěto wjace ludźi wužiwa“, rjekny Stanij Ryćer. „Tež klětu je přewjedźemy. Bychmy so jara wjeselili, bychu-li přichodnje ludźo z druhich gmejnow z nami zhromadnje pućowali. Móža so cyle jednorje přidružić skupinam we wsach a tak prěni dźeń lěta ze znatymi přebywać abo cyle jednorje aktiwni być.“ Sami sej zajimcy na cil dóńć njemóža. Wšako jenož kruh organizatorow wě, na kotrym městnje so wšitcy doskónčnje zetkaja.