Mjeńše wsy trjebaja lěpši zwisk
Łaz (AK/SN). W zjawnym bliskowobchadźe trjeba 15 wsow Łazowskeje gmejny dobre busowe zwiski. To podšmórny wjesnjanosta Thomas Leberecht (CDU) na wčerawšim posedźenju gmejnskeje rady. Předewšěm mjeńše wsy dyrbja porjadny busowy zwisk měć. Tuchwilu zdźěłuje Budyski wokrjes nowy koncept busowych čarow, při čimž chce Łazowska gmejna swoje přeća sobu zapřijeć. Za to schadźuja so zamołwići wokrjesa a města Wojerec přichodne tydźenje k wjacorym rozmołwam. Při tym chcedźa na jednym boku wo konkretnych busowych zastanišćach rěčeć, ale tež wo jednotliwych busowych čarach.
Pytaja wosebite dopomnjenki
Stróža (SN/MWj). Na wosebite wašnje chce zarjadnistwo biosferoweho rezerwata Hornjołužiska hola a haty hromadźe z domizniskim towarstwom Radiška dopomnjenki wobydlerjow z časa dźěćatstwa wokoło Hućiny, Stróže a Olbaskeho jězora zachować. Za to zarjaduja pjatk a sobotu, 24. a 25. januara, w Stróžanskim šulskim muzeju „Korla Awgust Kocor“ kónctydźenske zetkanje w znamjenju stawiznow a stawizničkow. Jeho wuslědki zapřijmuja potom do ponowjenja přirodoweje wučbneje šćežki „Hućinjanske haty a Olba“.
Kaž sobudźěłaćerka zarjadnistwa biosferoweho rezerwata Susanne Bärisch zdźěli, maja za nowy koncept přirodoweje wučbneje šćežki wosobinske dopomnjenki a anekdoty wobydlerjow z Hućiny, Stróže, Zubornički a blišeje wokoliny wažnu rólu hrać. Fota abo na přikład najlubši karpowy recept su tohorunja witane. Wšitke stawiznički a wobrazy chcedźa zezběrać, wobdźěłać a po móžnosći prawje wjele z nich na nowych informaciskich taflach předstajić.
Wobydlerjo sobu rozsudźeja
Wojerecy (AK/SN). Po lońšich a lětušich nazhonjenjach chcedźa we Wojerecach tak mjenowany wobydlerski hospodarski plan dołhodobnje dale wjesć. Za to wupraja so mjez druhim měšćanski radźićel Uwe Blazejczyk, kiž je zdobom nawoda za to zamołwiteje wodźenskeje skupiny. „Wobydlerjo so na rozsudach we Wojerecach rady sobu wobdźěleja, tohodla dyrbjeli z etatom pokročować“, wón podšmórny.
Namjety, pjenjezy z tohole wosebiteho etata w měsće a w jemu přisłušacych wsach nałožić, kotrež je wjac hač sto zajimcow na njedawnej dźěłarničce w forumowej žurli Wojerowskeje Łužiskeje hale rozjimało, sahachu wot ponowjenja murje w Parku Jürgena von Woyskeho hač k tomu, postajić dwaceći informaciskich taflow wo kulturnohistoriskich pomnikach města. Hač do přichodneje póndźele móža wobydlerjo hišće wothłosować, za kotre naprawy měli pjenjezy z wobydlerskeho etata wužiwać. Wot měrca potom chcedźa projekty zwoprawdźeć.
Krótkopowěsće (22.01.20)
Počesća Kurta Biedenkopfa
Drježdźany. Ze swjedźenskim zarjadowanjom w Drježdźanskej cyrkwi Našeje knjenje chce Konrada Adenauerowa załožba přichodnu wutoru politikarja unija Kurta Biedenkopfa počesćić, kiž tón dźeń 90. narodniny swjeći. Na zarjadowanje wočakuja tež zwjazkowu kanclerku Angelu Merkel (CDU). Křesćanski demokrat Biedenkopf bě wot lěta 1990 do 2002 ministerski prezident Sakskeje.
Dwě stejnišći poskićiło
Choćebuz. Město Choćebuz je Zwjazkowej centrali za politiske kubłanje dwě stejnišći – při nastawacym Wuchodnym jězoru abo na arealu bywšeho jastwa na Budyskej dróze – poskićiło, hdźež móhła wona nowy fachowy wobłuk wutworić, kaž wčera z radnicy rěkaše. Zwjazkowy zarjad chce nowy wobłuk za transformaciske procesy zarjadować, pak w Choćebuzu pak w Halle nad Solawu.
Na Dnju susodow so wobdźělić
Policija (21.01.20)
Bjez dowolnosće a zawěsćenja
Wojerecy. Skóncowana prědnja lampa je njedźelu we Wojerecach policiju pohnuła, na Einsteinowej Opel kontrolować. Při tym so wukopa, zo šofer žadyn njeznaty njebě. Nimo toho zo awto 35lětneho docyła zawěsćene njebě, muž žanu jězbnu dowolnosć njeměješe, a awtowe papjery wón zastojnikam tež žane pokazać njemóžeše. Za to bě wodźer Opela do swojeje jězby drogi brał, štož zastojnicy z testom zwěsćichu.
Wjeršk regiona sobu wobohaćić
Pančicy-Kukow (SN). Klóšterski a swójbny swjedźeń Budyskeho wokrjesa njeje mjeztym jeničce tradicija, ale zetkanišćo syłow ludźi z cyłeje Sakskeje. Lětsa wotměje so wjeršk z nadregionalnym připóznaćom w klóštrje Marijinej hwězdźe w Pančicach-Kukowje 21. junija. Abatisa Gabriela Hesse a Budyski krajny rada Michael Harig (CDU) přewozmjetaj wospjet patronat. Hač do 29. februara móža so zajimcy za podawk na internetnej stronje Křesćansko-socialneho kubłanskeho skutka Sakska z.t. Miłoćicy pod www.csb-miltitz.de přizjewić.
Kmótaj kaž tež zarjadowarjo, ke kotrymž słušeja gmejna Pančicy-Kukow, CSB a Sakski krajny kuratorij wjesny rum z.t. so hižo nětko na wulku ličbu wustajerjow a hosći wjesela. Namołwjene su tuž towarstwa, kulturne skupiny a wikowarjo, so za swjedźeń požadać a tak k bohatemu kulturnemu, kulinariskemu a informatiwnemu dnjej přinošować.
Miła zyma pomha termin dźeržeć
Ptačokwasny program za dźěći
Kamjenc. Serbski ludowy ansambl přeproša wšitke dźěći a dalšich zajimcow na swoje premjerne předstajenje „Zabyty ptači kwas“. Prěnjej razaj pokazaja jón jutře, srjedu, 22. januara, we 8.30 a w 10.30 hodź. na žurli Kamjenskeho hotela „Město Drježdźany“. Dalše předstajenje budźe pjatk, 24. januara, w 10 hodź. w Lubijskej wikowej hali.
Wo stawiznach hwězdnow
Budyšin. Štó je hwězdno Wulki wóz pomjenował? Wotmołwy na tajke a dalše prašenja wokoło hwězdow a njebja dóstanu młodźi hobbyjowi astronomojo jutře, srjedu, w Budyskej šulskej hwězdarni. Wot 19 hodź. wěnuja so tam wosebitosćam a stawiznam hwězdnow, kotrež su tuchwilu na zymskim njebju widźeć. Zastup płaći na wosobu tři eura, potuńšene dwaj euraj. Zajimcy njech so prošu pod tel. čo. 03591/ 7 60 71 26 abo z mejlku pod přizjewja. Dalše informacije pod www.sternwarte-bautzen.de
Z policistom so rozmołwjeć
Wěc z klumpami njespokoja
Gmejnska rada wotpowědnej zrěčeni z LEAG wobzamknyła
Trjebin (AK/SN). Přesydlenje wobydlerjow, kotrež su wot wuhloweje jamy Wochozy (Nochten) potrjechene, je w dalokej měrje wotzamknjene. Su to předewšěm wobydlerjo we wobłuku Trjebina-Za Goru (Trebendorf-Hinterberg). To potwjerdźi wjesnjanosta Waldemar Locke (CDU) na posedźenju gmejnskeje rady spočatk januara. Z jeničkim napřećiwnym hłosom wobzamkny wona zrěčenje wo wotkryću Trjebina za 1. wotrězk Wochožanskeje jamy a tak mjenowanu wuměnu ležownosćow mjez koncernom LEAG a gmejnu Trjebin. Wotkrywanske dojednanje w detailu rjaduje, kotre płoniny, dróhi, chódniki a dalše wobłuki ma LEAG gmejnje přepodać. Wone twori wažny zakład dołhodobneje prawniskeje wěstoty za wobaj bokaj. Z postupowanjom sćěhuje gmejnska rada poručenje wuběrkow.
10 000 eurow za projekty
W Budyšinje móža sej ludźo wulke přeća spjelnić. Při tym pak dźe wo zwoprawdźenje zjawnych přećow. A za to ma sprjewine město wobydlerski fonds 10 000 eurow.
Budyšin (SN). Snano pobrachuje w bydlenskej štwórći ławka, na kotrejž móhli wobydlerjo sedźo bjesadować. Abo woni njejsu hišće ženje w bydlenskej štwórći swjećili. Nětko je składnosć, to změnić. Próstwa měšćanskemu zarjadnistwu hač do 29. februara wo pjenježnu podpěru so wudani. Budyske měšćanske zarjadnistwo přewostaja ze swojeho etata, kotryž bu před třomi lětami zarjadowany, tež lětsa 10 000 eurow. Pjenjezy su myslene za naležnosće, kotrež su na dobro wobydlerjow.
