Socialni dźěłaćerjo na wšěch šulach
Zhorjelc (AK/SN). Wokrjes Zhorjelc swoje prewentiwne młodźinske dźěło zesylnja. To je Elke Drewke, nawodnica młodźinskeho zarjada, na minjenym posedźenju wokrjesneho sejmika připowědźiła. „Hłowny zaměr wostanje, samopostajowane wuwiće dźěći, młodostnych a swójbow zesylnić. Při tym nanojo a maćerje ze swojimi dźěćimi identifikaciju z domiznu ze swojej zamołwitosću za přichod regiona zwjazuja. Nošerjo młodźinskeje pomocy k tomu dźěło wokrjesa podpěruja“, Elke Drewke rozłoži.
Wokrjes dósta lětsa wot swobodneho stata 750 000 eurow jako młodźinsku pawšalu. To wotpowěduje přerězkej minjenych lět. Zdobom je wokrjes swój podźěl na naprawach wot 1,9 milionow eurow w lěće 2016 a dweju milionow loni na nětko 2,2 milionaj powjetšił. „Mamy pjeć planowanskich regionow“, Elke Drewke zdźěli. Cyłkownje 45 połnje přistajenych tuchwilu pola wšelakich nošerjow swobodneho młodźinskeho dźěła skutkuje. W Běłej Wodźe a wokolinje maja 7,25 městnow, w Niskej a wokolinje 6,75, w Zhorjelcu 10,75, w Lubijskej kónčinje a Hornim kraju wosom a w Žitawje a wokolinje 9,75 městnow.
Nowy nawoda
Smječkecy (SN/JaW). Dom swj. Jana w Smječkecach, w kotrymž su duchownje zbrašeni zaměstnjeni, změje noweho nawodu. Wot 1. januara 2019 budźe to Marko Kliman. To wobkrući wón Serbskim Nowinam na kromje sobotneje swjatočnosće k 10lětnemu wobstaću Budyskeho wokrjesa w Budyšinje. Kliman, skutkowacy tuchwilu w Budyskej chorowni we wotdźělu za hladanje nutřkowneje a urologiskeje kliniki, přewozmje zastojnstwo tuchwilneho nawody Smječkečanskeho domu Tadeja Šimana, kiž ma jeho do noweho dźěła zapokazać. Šiman budźe w nadawku nošerja Smječkečanskeje hladarnje zbrašenych Křesćansko-socialneho skutka (CSW) regionalnje a nadregionalnje fachowje dale skutkować.
Kaž Marko Kliman na naprašowanje našeho wječornika wobkrući, ma wón přichodnje wšitke štyri zarjadnišća CSW w Hornjej Łužicy w Smječkecach, Kamjencu, a Budyšinje jako regionalny nawoda zastupować. „Wjeselu so na nowy nadawk. Tu móžu so hišće regionalnišo na dobro našeje dwurěčneje kónčiny zasadźeć“, rjekny wón SN. Zdobom Prawočan wobkrući, zo wostanje dale čestnohamtski wjesnjanosta Chróšćanskeje gmejny.
Hordy na serbske wobydlerstwo
Budyšin (SN/JaW). Wokrjes Budyšin ma nowy imageowy film. Krajny rada Michael Harig (CDU) je jón sobotu na swjatočnosći k 10lětnemu wobstaću noweho wokrjesa w Budyskim Němsko-Serbskim ludowym dźiwadle zjawnosći předstajił. „Hakle tón tydźeń su jón dozhotowili“, zwurazni Harig přitomnym regionalneje a nadregionalneje politiki. Nimo ministerskeho prezidenta Michaela Kretschmera přitomni běchu tež serbskaj zapósłancaj Sakskeho krajneho sejma Marko Šiman (wobaj CDU) a Hajko Kozel (Lěwica), mnozy tuchwilni a bywši hamtscy kolegojo Hariga susodnych wokrjesow, zastupnicy komunow kaž tež zastupnicy kubłanskich zarjadnišćow a serbskich institucijow.
Krótkopowěsće (03.09.18)
Prěni raz ze stejnišćom mjeńšin
Berlin. Frizojo, Danojo, němscy Sintojo a Romojo kaž tež Serbja prezentuja so prěni raz ze zhromadnym stejnišćom na wobydlerskim swjedźenju zwjazkoweho prezidenta Franka-Waltera Steinmeiera 8. septembra w parku hroda Bellevue, kaž mjeńšinowa rada informuje. Zdobom so nadźija tam mnohich přisłušnikow mjenowanych mjeńšin witać móc.
Pjenjezy za kulturu na wsach
Berlin/Drježdźany. Kulturu na wsach wuchoda měli dlěšodobnišo financować, měni jednaćel Kulturneje rady Němskeje Olaf Zimmermann. „Kultura je trajna zaručka dočasneho zastaranja, kaž stej to zastaranje z wodu a milinu abo nadróžny wobchad“, rjekny Zimmermann powěsćerni dpa. Runje před pozadkom prawicarskich tendencow dźe wo to, kulturnu infrastrukturu a kubłanje w regionach zachować.
Rewizija na bloku Q
Film wabi za domiznu
Wojerecy (AK/SN). Z imageowym filmom „Wróćo do domizny“ wabi Wojerowska młodźinska měšćanska rada intensiwnje za zwjazanosć z městom nad Čornym Halštrowom. To podšmórny předsydka towarstwa Marija Skvoznikova wutoru na předstajenju w měšćanskej radźe. Po prěnim lońšim imageowym filmje „Wostać abo woteńć?“ je to nětko druhi wabjenski pask Wojerowskich młodźinskich radźićelow. A tón ma tym, kotřiž su měsće wostali abo so zaso do Wojerec wróća, zmužitosć spožčić. Nowa pjećmjeńšinska dokumentacija, wobswětla bydlenske móžnosće, dźěłowe wiki, hladanje dźěći, infrastrukturu, kulturu a jězorinu. Wona nasta w zhromadnym dźěle z filmytwórcom Benjaminom Kramerom. Słowa jimaja so nimo wyšeho měšćanosty Stefana Skory (CDU) Alex Fietzek z Wojerowskeho bydlenskeho drustwa Žiwjenske rumy, Steffen Markgraf z Wojerowskeje bydlenskeje towaršnosće kaž tež zastupjerjo socialnych zarjadnišćow a wosebje tajcy, kotřiž su so nawróćili.
W zwěrjencu swjeća
Wojerecy. Jedyn z wjerškow lětušich zarjadowanjow k 750. róčnicy prěnjeho naspomnjenja Wojerec je zajutřišim, njedźelu, zwěrjencowy swjedźeń. Tón přewjedu lětsa mjeztym 40. raz. Program skići zabawu za cyłu swójbu. Po wote- wrjenju w 11 hodź. zahudźi Grodkowska dujerska kapała. Wot 13 hodź. porěčitaj nawoda zwěrjenca Eugène Bruins a předsyda zwěrjencoweho towarstwa Karsten Bormann wo nowinkach w coowje. Nimo toho wućehnjetaj wonaj z wulkeje ličby zapodatych namjetow mjena za nowonarodźene kubaske krokodile. Na to wustupitaj šlagrowaj spěwarjej Andreas Holm a Thomas Lück ze swojimi znatymi hitami. W 15 hodź. započnje so dźěćacy program z kuzłarjom, dźiwadłowej skupinu ze Złeho Komorowa a z Wojerowskim karnewalowym klubom.
Za wobchadnu wěstotu
Słónčny časnik w parku klinikuma
Policija (31.08.18)
Starušku při pohrjebnišću wurubił
Běła Woda. Při pohrjebnišću na Běłowodźanskej Georga Beckowej bu zawčerawšim 87lětna žona nadpadnjena a wurubjena. Skućićel čakaše na nju při pódlanskim zachodźe na pohrjebnišćo, pryskaše jej njeznatu maćiznu mjezwoči a wutorhny starušce tobołku. W njej běchu móšeń z něšto pjenjezami, wupokaz a kluče. Dalša žona na pohrjebnišću chwataše jej na pomoc. Přiwołana policija w bliskosći za rubježnikom pytaše, ale jeho tež z pomocu psa njenamaka. Kriminalisća pad dale přepytuja.
Wětrniki tola njepřińdu
Lisćina twarskich projektow w Malešanskeje gmejnje nahladna
Malešecy (CS/SN). Wobydlerjo Rakojd móža wodychnyć. Před jich nosom nětko tola žane milinowe wětrniki twarjene njebudu. To zdźěli wjesnjanosta Matthias Seidel (CDU) na zašłym posedźenju Malešanskeje gmejnskeje rady. Wobydlerka bě so naprašowała, kajki je tuchwilny staw planowanja. Wolóžena wona zhoni, zo je plan wětrnikoweho parka pola Rakojd, kotryž měješe so do regionalneho plana přiwzać, z blida. To woznamjenja, zo bu předwidźany teren jako prioritna kónčina za tónle zaměr šmórnjeny. Wotpohlad, wupisać w regionalnym planje wětrnikowy park, bě mjez wobydlerjemi masiwne protesty zbudźił. Kaž Matthias Seidel rozłoži, móža so wjesnjenjo takrjec Lětońskemu lětanišću dźakować, zo wětrnikowy park do regionalneho plana njepřiwozmu.
Prěni zhromadny wulět
Štóž chcyše minjenu njedźelu přiwuznych abo znatych we Wěteńcy wopytać, tón je tam cyle wěsće podarmo při durjach klinkał. Wjesnjenjo běchu sej mjenujcy zhromadnje wulećeli. Na kóždolětnej zhromadźiznje spočatk lěta, na kotrejž sej wjesne terminy a zamołwitosće wotrěča, zrodźichu woni ideju, tež jónu zhromadny dźeń zwonka wsy zarjadować.
Tak podachu so Wěteńčenjo njedźelu rano z busom do Błótow. Na Lědach zhromadnje powobjedowachu a na dwěmaj wulkimaj čołmomaj dachu so po groblach wozyć a sej wězo tež zhromadnje zaspěwachu. Dalši programowy dypk běše wopyt muzeja pod hołym njebjom na Lědach. Tam zetkachu připadnje swojich susodow-Smječkečanow, kotřiž běchu so samsny dźeń na zhromadny wulět podali. Kajki to připad a zdobom dopokaz, zo knježi na małych serbskich wsach dobra zhromadnosć.
Z pućowanjom podłu Sprjewje Wěteńčenjo swój dźeń w Błótach zakónčichu a sej prajachu, zo njebě to posledni zhromadny wulět. Alena Hiccyna
