K wobornikam pohladać
Budyšin. Na swój tradicionalny dźeń wotewrjenych duri přeprošuja Budyscy wohnjowi wobornicy jutře, srjedu, do hłowneje gratownje w Strowotnej studni. Wot 10 hodź. móža sej zajimcy hašenske a dalše jězdźidła wobornikow wobhladać. W 11 hodź. prezentuja młodźi wobornicy swoje kmanosće. A wot 12 hodź. poskića k wobjedu woblubowanu hrochowu poliwku. Mali wopytowarjo móža skakanski hród wužiwać, při molowanju kreatiwni być a z hašenskim jězdźidłom sobu jěć. Dorosćenym budźe zwučowanska wěža přistupna, kotraž skića rjany wuhlad na město.
Nalětni swjedźeń
Čorny Chołmc. K zazběhej nalěća wuhotuja w Čornochołmčanskim Krabatowym młynje srjedu, 1. meje, wot 11 hodź. nalětni swjedźeń. Na wopytowarjow čaka pisany kulturny program z hudźbu a rejemi. Jón wuhotuja Wojerowski wobydlerski chór, Chróšćanscy muzikanća, Krabatowa drastowa skupina a Łužiscy dujerscy muzikanća. Wo ćělne derjeměće postaraja so mjez druhim ze swojimi woblubowanymi plincami a z grilowanymi chłóšćenkami z Domanic burskeho statoka z Hózka.
Knižna premjera
Při wiću stary recept zeznali
Dźensa wječor na mnohich městnach wuhladamy, kak wjesnjenjo w dobrej zhromadnosći chodojty pala. Do toho su hižo meju stajeli. Hajenje tohole rjaneho nałožka je wšak w předpolu z wjele dźěłom zwjazane.
Dobrošicy (aha/SN). Po tym zo su so w Dobrošicach loni po 65 lětach rozsudźili zaso meju stajić a mjetać, je to wosebje tež mjez staršimi wobydlerjemi dobry wothłós našło. Iniciatoram bě samozrozumliwe, wozrodźeny nałožk dale hajić. Hižo minjenu sobotu je so wosom muži a runje telko dźěći podało do lěsa mjez Lišej Horu a Łomskom po hałžki za wěnc a girlandu wokoło meje. Z dowolnosću wobsedźerja lěsa Jana Wjesele narězachu dźesać měchow hałžkow. Marko Dźisławk kedźbowaše a radźeše, kotre hałzy smědźa wot šmrěkow wotrězać, bjez toho zo by to štomej škodźało.
Dyrbi to być?
Krótkopowěsće (30.04.19)
Wałporne wohenje budu
Budyšin/Zhorjelc. Móžny zakaz wałpornych wohenjow suchoty dla je z blida. Po dešću zašłych dnjow njewidźi Budyski wokrjesny wohnjowy mišter Manfred Pethran přičiny, je zakazać. Mjeztym su njeznaći wjac hač 21 hromadow w Zhorjelskim a Budyskim wokrjesu dočasnje wotpalili, zdźěli Zhorjelska policajska direkcija. Mjez druhim je so w Hrubjelčicach, Kanecach, Malešecach a Złyčinje paliło.
Akciski tydźeń zahajeny
Drježdźany. Z wjacorymi zarjadowanjemi su dźensa akciski tydźeń „Zhromadne šule w Sakskej – Dlěje zhromadnje wuknyć“, kiž traje hač do 5. meje, zahajili. Wobdźělene su na tym tež Wojerecy, Kamjenc a Žitawa. Dotal předleži 33 815 podpismow, trěbne je 40 000. Zaměr iniciatiwy je, zo dźěći dlěje zhromadnje wuknu a njetrjebaja so po 4. lětniku rozsudźić, hač du na gymnazij abo nic.
Wudrjeńca zaso přistupna
Młodźi Brětnjenjo rejowali a nałožki předstajili
Budyšin (ML/SN). Žurla Budyskeho Serbskeho muzeja bě ćichu sobotu popołdnju z něhdźe 150 hosćimi přepjelnjena, kotřiž přewšo zajimowani hodźinski program Serbskeho rejwanskeho towarstwa z Brětnje sćěhowachu. Štyri pory młodźinskeje rejwanskeje skupiny a wosom staršich a młódšich rejowacych dźěći we Wojerowskej narodnej drasće so publikumej z temperamentnymi a lóštnymi ludowymi rejemi a ze serbskimi jutrownymi nałožkami předstajichu. Młodej holcy z wulkimaj karanomaj w ruce zwobrazništej chodźenje po jutrownu wodu. Jutrownu póndźelu wopytaja mótki hač do dwanaće lět kmótry a kmótow a dóstanu jutrowne dary. Dźakowachu so po tym ze serbskimi a němskimi hrónčkami.
Tři nowosće k jubilejej
Ze štomom, winom a wustajeńcu 25. sezonu w klóšterskej zahrodźe zahajili
Pančicy-Kukow (SN/MWj). Tři winowe pjenki rostu wot wčerawšeho w klóšterskej zahrodźe w Pančicach-Kukowje. Wone běchu jedna z nowosćow, z kotrymiž tam wčera lětušu sezonu zahajichu. Něhdźe 450 ludźi so po derje hladanym zelenišću rozhladowaše. Je to hižo 25. sezona, kotruž wčera zahajichu. Kaž kóžde lěto sadźichu tež tónraz štom lěta, štož je lětsa dołhošiškaty wjaz (Flatterulme). Mjeztym zo činjachu to před lětami hišće při pućiku w Lipju, su nětko hižo wjacore štomy při klóšterskej muri nasadźene. Wčera přimaštaj so tam abatisa Gabriela Hesse a zapósłanc Sakskeho krajneho sejma Alojs Mikławšk (CDU) gratu.
Policija (29.04.19)
Kolesa wotšrubowali a pokradnyli
Biskopicy. Wot sydom nowych wosobowych awtow su njeznaći w nocy na sobotu w Biskopičanskim awtowym domje kolesa wotšrubowali a je pokradnyli. Pod awta połožichu plesternaki, kotrež běchu z dwora zwutorhali. Škoda wučinja něhdźe 28 000 eurow.
Při skale rostliny měnjeć
Miłoćicy. Njebjelčanska gmejna, towarstwo za zachowanje mnohotnosće wužitnych rostlin a towarstwo Kamjenjak přeprošuja na dalšu rostlinsku měnjensku bursu, kotraž wotměje so zajutřišim, srjedu, wot 14 hodź. při Miłočanskej skale. Tam móža wopytowarjo swoje samoćahnjene rostlinki z druhimi měnjeć abo je prosće wotedać. W 14 hodź. přednošuje Thomas Noack wo permakulturje a powjedźe hosći po zahrodźe, kotraž je pod tymle aspektom nastała.
Kak čłowjesce wostać?
Budyšin. We wobłuku wuměłstwoweho projekta „Swětło pozbudźa“ wotměje so srjedu, 1. meje, w 19.30 hodź. w zawodźe Kupke & Partner na Budyskej Njekowej 143 přednošk pod hesłom „Socialna wučba 4.0 – kak móžemy w času digitalizowanja čłowjesce wostać“. Heinrich Wullhorst z Duisburga zaběra so z prašenjom, hdźe su centralne towaršnostnopolitiske wužadanja našeho časa za digitalnu transformaciju a kotry wuznam ma katolska socialna wučba za tele wužadanja. Slěduje diskusija.
Koncertuja w cyrkwi
4 500 wopytowarjow na wikach
Stróža (CS/SN). Přirodowe wiki na dworje zarjadnistwa biosferoweho rezerwata Hornjołužiska hola a haty w Stróži so zawčerawšim znowa jako wopytowarski magnet wopokazachu. Hižo połdra hodźiny do wotewrjenja prěni wopytowarjo takrjec před durjemi stejachu. Woni so tež wot trochu dešća wottrašić njedachu. Scyła bě woda tónraz centralna tema němsko-serbskich přirodowych wikow. Pjeć wosobow wopřijaca dźiwadłowa skupina z čłonami z Lubija a Budyšina předstaji kruch wo potajnstwach Sprjewje, wo jeje třoch žórłach a wo hobru Sprjewniku.
