W Běłej Wodźe njejsu wobydlerjo 24. septembra jenož zapósłancow zwjazkoweho sejma wolili, ale tež noweho wyšeho měšćanostu. Kandidat Rico Jung žada sej nětko fairnosć a respekt.
Běła Woda (AK/SN). Přećiwo wuslědkej wólbow wyšeho měšćanosty Běłeje Wody je Rico Jung (njestronjan) jako napřećiwny kandidat amtěrowaceho wyšeho měšćanosty Torstena Pötzscha (Klartext) znaprećiwjenje zapodał. „Za hłownu přičinu mam njedowolene wobliwowanje wolerjow we wólbnym wabjenju“, rěka w znapřećiwjenju. „Zo stej měšćanostka Grodka a Trjebinska wjesnjanostka ze swojimaj wuprajenjomaj knjeza Pötzscha na jeho lětaku podpěrałoj, zrani po mojim měnjenju kaznju neutrality nošerjow hamtskich funkcijow.“ Samsnu kritiku mjenuje Jung nastupajo wólbne wabjenje w Radiju WSW. Tam wabješe nawodnica Běłowodźanskeje zakładneje šule za Torstena Pötzscha. Stat a jeho słužownicy, tak kandidat, njeměli so do wólbow tykać. Nimo toho wón argumentuje, zo bu na Pötzschowym lětaku wosobinsce nadběhowany a difamowany.
Přewjeduja naprašowanje
Miłoraz. W zwisku z předwidźanym přesydlenjom Miłoraza přewjeduje předewzaće Łužiska energija a milinarnje (LEAG) naprašowanje mjez wobydlerjemi. Na informaciskim zarjadowanju wutoru su zamołwići LEAG ludźom detaile rozkładli. Spočatk decembra chcedźa wuslědki potrjechenym předstajić.
List kanclerce napisał
Choćebuz. Po słowach Choćebuskeho Wyšeho měšćanosty Holgera Kelcha (CDU) słuša Łužica hladajo na strukturnu změnu do koaliciskeho zrěčenja. Tohodla je wón list zwjazkowej kanclerce Angele Merkel (CDU) napisał. Na posedźenju hłowneho wuběrka zapósłancow města wčera w Choćebuzu je Kelch přitomnych informował.
W Čěskej najmjenje „chudych“
Praha. Po wozjewjenju statistiskeho zarjada Eurostat bydli w Čěskej republice najmjenje chudych ludźi cyłeje Europskeje unije. Jako „chudźi“ wobhladuja w tym zwisku ludźi, kotrychž dochody su niše hač 60 procentow přerězka w kraju. W Čěskej su to wokomiknje 13,3 procenty wobydlerstwa, mjeztym zo wučinja přerězk za cyłu EU 23,4 procenty.
Tomaš Henčl nowy trenar
Dyrbi měsac nóžkować
Budyšin. Na awtodróze A 4 mjez wotbóčkomaj Budyšin-wuchod a Budyšin-zapad je spěšnosć na 120 km/h wobmjezowana. Hač so tole dodźerži, je policija zawčerawšim dopołdnja kontrolowała. Wjace hač 3 600 jězdźidłow je wot 7 hač do 12.30 hodź. nimo měrjenskeje stacije jěło. 159 šoferow bě spěšnišo hač dowolene po puću. W 110 padach wostanje při poroku. 49 wodźerjow pak měješe wosebje nuznje a dóstanje nětko list, zo dyrbja pokutu płaćić. Najspěšniši bě wodźer wosoboweho awta, kotrehož měrichu ze 174 km/h. Za to změje wón 240 eurow płaćić, dóstanje dwaj dypkaj w Flensburgu a dyrbi měsac nóžkować.
Křesćanska lubosć k blišemu je w Hodźiju nětko na zornowcowej tafli dokumentowana, a z tym tohorunja wotrězk serbskich stawiznow wokoliny.
Hodźij (CK/SN). Wopomnjensku taflu za 140lětne skutkowanje spomóžerskeho domu su minjenu sobotu na Darinskej dróze 3 w Hodźiju wotkryli. Wot 1877 hač do 1941 namakachu tam wosyroćeni a wohroženi hólcy nowe doma. „Zo je tónle dom ze srjedźizny křesćanskeho wobydlerstwa nastał, na to směmy hišće dźensa hordźi być“, rjekny Hodźijski farar Christoph Rummel. Wo druhich so starać je po jeho słowach jedna z najwjetšich hódnotow křesćanskeje etiki.
Ideju za taflu měješe čłon Hodźijskeho domizniskeho towarstwa Klaus Kanzler, kiž so wo zwoprawdźenje projekta zaměrnje prócowaše. Stawizny spomóžerskeho domu su ze 150lětnym diakoniskim dźěłom w Hornjej Łužicy wusko zwjazane. W zwisku z jubilejomaj chce Hodźijske domizniske towarstwo klětu dokumentaciju wudać.
Njeswačidło (JK/SN). K horcej, ale přiwšěm wěcownej diskusiji dóńdźe na wčerawšim posedźenju Njeswačanskeje gmejnskeje rady. Hižo třeći króć běše delegacija Koslowčanow na posedźenje přichwatała, zo by žadanja wjesnjanow, wobnowić a zawěsćić wjesne wobswětlenje kaž tež zaručić wěsty a rjadowany wobchad přez wjes, potwjerdźiła.
Hižo wot apryla wočakuja, haj žadaja sej Koslowčenjo wotpowědne naprawy, kotrež gmejna dotal zwoprawdźić njemóžeše. Po słowach wjesnjanosty Gerda Schustera (CDU) su móžnosće gmejny tuchwilu wobmjezowane. Wjesne wobswětlenje hodźało so jenož přechodnje zaručić. Nastupajo wobchad přez wjes a hubjeny staw dróhi chcedźa tak spěšnje kaž móžno z wokrjesnym zarjadom za wobchad a dróhotwar na městnje wo tym rěčeć, kak móhła so naležnosć na dobro Koslowčanow rozrisać.
„Łokaśina“ CD wudała
Choćebuz. „Serbske spiwy z Błotow“ rěka druha CD, kotruž je Lubnjowska folklorna skupina „Łokaśina“ nětko wudała. Na njej su słyšeć nahrawanja serbskeje redakcije RBB. Paleta saha wot swójskich kompozicijow hač k starym delnjoserbskim ludowym pěsnjam, kotrež su něhdy při přazy spěwali. CD dóstanu zajimcy w župje Delna Łužica a w Lodce w Choćebuskim Serbskim domje.
Wočakowanja přetrjechene
Mišno. Wothłós na wustajeńcu „Pokład nic ze złota. Beno z Mišnja – prěni swjaty Saskeje“ wo biskopje Benje je wočakowanja přetrjechił. Mjeztym je sej přehladku wo japoštole Serbow, w kotrejž su tež eksponaty z Radworja, Budyšina a Wotrowa widźeć, wjac hač 50 000 ludźi wobhladało, rěka z muzeja. Wustajeńca je hač do 5. nowembra přistupna.
Dalše stejnišćo galerije FLOX
Wopity po puću był
Bóšicy. Zastojnicy Budyskeho policajskeho rewěra zadźeržachu zawčerawšim popołdnju na Nowobóšćanskim puću 37lětneho wodźerja Opela. Alkoholowy test pola njeho wunjese, zo měješe wón 2,18 promilow alkohola w kreji. Dale zastojnicy zwěsćichu, zo muž scyła žanu jězbnu dowolnosć njeměješe.
Wodźerka njekedźbowała
Wulke Ždźary. Na zwjazkowej dróze B 96 we Wulkich Ždźarach je njedźelu 52lětna wodźerka motorskeho přepozdźe pytnyła, zo dyrbješe před njej jěducy Peugeot zastać, a do njeho zrazy. Na to suny so awto hišće do Renaulta. Šoferaj awtow a jeju sobujěducej so snadnje zranichu, wodźerka motorskeho pak ćežko.