Terminy zapodać
Budyšin. W nowym lěće ma zaso nasćěnowa młodźinska protyka wuńć, kotruž wosebje serbskim młodźinskim klubam a dalšim młodźinskim cyłkam wudźěla. Terminy za swjedźenje a zarjadowanja, kotrež su w lěće 2018 předewšěm za młodźinu zajimawe, hodźa so hač do kónc nowembra pod zapodać. Młodźinska protyka je zhromadny projekt socialneho teama Rěčneho centruma WITAJ, kubłanskeje referentki Domowiny a młodźinskeho towarstwa Pawk.
Rozprawja wo wuchowanju
Budyšin. Přichodne stajne blido Budyskeho zwjazka CDU jutře, srjedu, w 19 hodź. w Budyskej piwarni zaběra so z prašenjom, kak móže jednotliwc něšto wuskutkować. K tomu witaja tam Heinricha Schleppersa, kiž je ze swojim angažementom parnu lokomotiwu před dwórnišćom wuchował.
Serbske blido w stolicy
Berlin. W hosćencu Einstein Kaffee na Friedrichowej 206 w Berlinje wotměje so štwórtk, 9. nowembra, w 16 hodź. přichodne Serbske blido.
„Fast food“ wjelkam?
Za dwurěčnosć sensibilizowani
Po premjerje před lětomaj wotmě so wčera w Budyšinje pod hesłom „Łužica a serbska identita“ druhe fachowe schadźowanje wjesnjanostow a měšćanostow serbskeho sydlenskeho ruma Budyskeho wokrjesa.
Budyšin (SN/MWj). Spóznać w swojej komunje hódnotu zjawneje dwurěčnosće a sej wuwědomić, što hodźi so w tym nastupanju polěpšić, bě jedyn ze zaměrow fachoweho schadźowanja wjesnjanostow a měšćanostow serbskeho sydlenskeho ruma Budyskeho wokrjesa. W Röhrscheidtowej bašće zetka so wjace hač 20 zastupjerjow gmejnow a městow, mjez druhim wyšej měšćanostaj Wojerec a Budyšina, wjesnjanosća Chrósćic, Njeswačidła, Kubšic, Hodźija a Malešec kaž tež zastupjerjo komunalnych serbskich dźěłowych kruhow.
Krótkopowěsće (07.11.17)
Złoto gmejnje Rěčicy
Drježdźany. Sakski minister za wobswět Thomas Schmidt (CDU) je wčera w Drježdźanach Rěčicy z mytom European Energy Award w złoće wuznamjenił. Dwurěčna komuna Zhorjelskeho wokrjesa je jedna z dźesać, kotrež počesćichu za skutkowny škit klimy. Wot lěta 2012 su w Rěčičanskej gmejnje z lokalnym spěchowanskim programom mjez druhim 41 domow energetisce saněrowali a tak jich eficiencu zwyšili.
Zwyša zastaranski pjenjez
Budyšin. W dźěćacych dnjowych přebywanišćach, kotrež su w nošerstwje města Budyšina, ma so staršiski pjenjez zwyšić. Přičina toho su přiběrace zawodne kóšty a zastaranski kluč. Tuchwilne přiměrjenje móže městu a staršim dać planowansku wěstotu w moderatnym ramiku za dwě lěće. Maja-li starši tři dźěći w zastaranju, njetrjebaja za třeće dźěćo ničo płaćić.
Znowa wustajeńca w Stróži
Policija (06.11.17)
Transporteraj pokradnyli
Nadźanecy. W času wot minjeneho pjatka popołdnja hač do soboty dopołdnja zadobychu so njeznaći na teren rjemjeslniskeho zawoda w Nadźanecach pola Budyšina, hdźež garažowe wrota namócnje wočinichu. Z garaže su zamknjenej běłej transporteraj typa Ford Transit z čisłom BZ-MB 1408 resp. BZ-MB 1607 sobu wzali. Cyłkownu hódnotu awtow trochuje jeju wobsedźer na něhdźe 30 000 eurow. Hač su z firmy hewak hišće něšto pokradnyli a kelko škody je při zadobywanju nastało, njemóže policija hišće rjec. Kriminalni technikarjo wjacore slědy zawěsćichu. Za jězdźidłomaj nětko mjezynarodnje pytaja.
Stajne blido Zelenych
Kamjenc. Přichodne stajne blido Kamjenskeho regionalneho Zwjazka 90/Zelenych wotměje so jutře, wutoru, w 19 hodź. w Kamjenskim hosćencu „La Piazza“ na Zwingerowej. Jako hosća wočakuja předsydu personalneje rady sakskeho statistiskeho zarjada Thila Börnera. Wón porěči mjez druhim wo statistice jako wažnym instrumenće za politiku a towaršnosć.
Wopominaja Hanku Šěrcec
Hórki. Na Hanku Šěrcec, katolsku Serbowku židowskeho pochada, spominaja štwórtk, 9. nowembra, w 17 hodź. z wopomnjenskej nutrnosću w Hórkach při kopolaku-plesternaku. Wšitcy su wutrobnje přeprošeni.
Přednošuje wo stawiznopisu
Budyšin. Stawizniska sekcija Maćicy Serbskeje přeproša štwórtk, 16. nowembra, w 19.30 hodź. na dalše zarjadowanje do Budyskeho hosćenca „Wjelbik“. Tam přednošuje Alexander Pólk na temu „Wuwiće serbskeho stawiznopisa w NDR-skim času“. Młody serbski stawiznar, bydlacy w Budyšinje, předstaji wuslědki swojeho masterskeho dźěła, kotrež je lětsa na Techniskej uniwersiće Drježdźany wotzamknył. Přednošk budźe w serbskej rěči, zastup darmotny.
Porokuja pobrachowacu čakarnju
Tři nowe čakanske budki za busowe zastanišća Hodźijska gmejna za klětu planuje. Za Nowe Błohašecy tajka předwidźana njeje. Runje tam pak by wona nuznje trěbna była.
Hodźij (CK/SN). W Čornecach a Čěškecach chce Hodźijska gmejna klětu nowu busowu čakarnju natwarić a tu w Spytecach ponowić. Tole předwidźi naćisk hospodarskeho plana, z kotrymž so gmejnscy radźićeljo na swojim zašłym posedźenju zaběrachu. Gmejna tak swój zaměr dale wjedźe, po móžnosći w kóždej ze swojich 32 wsow čakansku budku stajić. „To pak njewoznamjenja, zo kóžde zastanišćo tež třěchu dóstanje“, rozłoži André Laue z techniskeho zarjada gmejny na naprašowanje SN. Dotal maja 31 čakarnjow w 26 wjeskach. „Je twarić a hladać je naš stajny nadawk“, praji sobudźěłaćer zarjadnistwa. Nowe budki płaća zwjetša z gmejnskeje kasy. Za tu w Spytecach dóstanu w zwisku z nowej kolesowanskej šćežku podłu statneje dróhi S 111 přiražku Sakskeje.
Sernjany a Porchow w planje
Hospodarski plan zaměroweho zwjazka za wopłóčki při Klóšterskej wodźe bě w druhej połojcy oktobra zjawnje wupołoženy. W nim je tójšto ličbow a faktow, kotrež móhli zajimować.
Wudwor (AK/SN). Zaměrowy zwjazk za wopłóčki Při Klóšterskej wodźe (AZV) ma za hospodarske lěto 2018 dwě ćežišći. „Jónu ma so hladanje wobstejacych připrawow zaručić. Zdruha matej so wjesnej syći w Sernjanach a Porchowje rozšěrić. Tak so runočasnje dołhodobne wućeženje wodočisćernjow w Ralbicach a Porchowje polěpši.“ Takle rěka w hospodarskim planje, kotryž bě wot 16. hač do 24. oktobra zjawnje wupołoženy. Po wšěm zdaću 14. nowembra chcedźa jón zastupjerjo AZV přisłušacych gmejnow wobzamknyć.
Zaměrowy zwjazk liči klětu z minimalnym dobytkom 2 350 eurow. Riziko při planowanju su wotwožowanje wopłóčkoweho błóta, staroba techniskich připrawow a stupace energijowe kóšty. „Tele rizika dyrbimy pomjenować. Zdobom pak smy winowaći ze srědkami zlutniwje wobchadźeć“, praji sobudźěłaćer AZV Jan Mikel. Wot wobstejacych kreditow chcedźa klětu 214 000 eurow wotpłaćić.
Prěni raz bě Njebjelčanski młodźinski klub minjeny pjatk na ...
Krótkopowěsće (06.11.17)
Bjez serbskeho zastupjerja
Kamjenica. Antje Feiks je nowa krajna předsydka sakskeje Lěwicy. Wona je so ze 104 hłosami přećiwo kontrahentej Andréjej Schollbachej (75 hłosow) na krajnym zjězdźe kónc tydźena w Kamjenicy přesadźiła. Serbski kandidat za krajne předsydstwo Hajko Kozel njedósta trěbnu wjetšinu hłosow. Dale zwrěšći namjet serbskeje Lěwicy, serbskopolitiskeho rěčnika krajneho předsydstwa we wosebitej jednotliwej wólbje wuzwolić. 64 procentow delegatow jón wotpokaza.
Z twarožkom w stolicy
Berlin/Koćina. Koćinski Krabatowy mlokowy swět je so wčera na twarožkowych wikach „Cheese Berlin 2017“ w němskej stolicy prezentował. Mjez druhim móžachu wopytowarjo we wikowanskej hali 9 twarožk z kirbsowymi zornjatkami woptać, kotryž je jednaćel Tobias Kockert poskićał. „Móžachmy so z druhimi twarožkarnjemi wuměnjeć a spóznachmy, zo móžemy pódla nich wobstać“, wón rjekny.
Dale wulkoměsto
