Budyšin. Zakónčace wodźenje po wosebitej wustajeńcy Reginy Herrmann „Dźěl wote mnje“ budźe njedźelu, 14. oktobra, w 15 hodź. w Budyskim Serbskim muzeju. Přehladka pokazuje mnohostronskosć wuměłče, kotraž so nimo serbskeje tematiki tež z kulturami a nabožinami swěta zaběra. Jeje wušiknosć spóznawaš w kóždej jednotliwej tekstilnej plastice. Na wodźenju porěči wuměłča tež wo swojim žiwjenju a tworjenju. Wězo móža wopytowarjo twórby kupić.

Pytaja požčonki za wustajeńcu

Łaz. Spěchowanske towarstwo zetkanišća Dom Zejlerja a Smolerja organizuje lětušu adwentnu wustajeńcu wo modelach wohnjowobornych jězdźidłow. Za to pyta stare a nowe, wulke a małe modele hašenskich a dalšich awtow z wotpowědnym přisłuškom. Podpěraćeljo njech přizjewja so wot 22. oktobra hač do 15. nowembra we Łazowskim Domje Zejlerja a Smolerja pod telefonowym čisłom 035724/ 502 56. Wotewrěć chcedźa přehladku 2. decembra. Wona budźe přistupna póndźelu a štwórtk wot 10 do 12 hodź. a wot 13 do 17 hodź. kaž tež we wobłuku Łazowskich adwentnych wikow 15. decembra. Dalše informacije zhonja zajimcy pod www.zejler-smoler-haus-lohsa.de

Z trikom rentnarce wobšudźili

Zhorjelc. Z wumyslenej basničku su nje­znaći zawčerawšim w Zhorjelcu žonje w starobje 89 a 85 lět wobšudźili. W prěnim padźe wuda so muž při telefonje jako znaty jeje syna. Toho su pječa runje w chorowni operowali, dokelž měješe wobchadne njezbožo, na kotrymž bě sam wina. Načinjenu škodu pak dyrbi hnydom narunać. Tuž so cuzy při telefonje prašeše, kelko pjenjez žona w domjacnosći ma. W samsnym času klinkaše při durjach dalši skućićel, kotremuž překwapjena rentnarka štyricyfrowu sumu přepoda. W tamnym padźe wuda so nje­znaty jako policist a powědaše samsnu stawizničku. Tež tu zaso klinkaše, a žona přewostaji wopačnemu policistej ec-kartku a tajne čisło. Na to bu něšto stow eurow wot jeje konta wotzběhnjene.

Hamor (AK/SN). Strach wobchadnych njezbožow na wšelakich ćežišćowych městnach chce Hamorska gmejna bytostnje pomjeńšić. Tole podšmórny wjesnjanosta Achim Junker (CDU) na zašłym posedźenju Hamorskich gmejnskich radźićelow.

Na zetkanju gmejny ze zastupjerjemi policije, Zhorjelskeho krajnoradneho zarjada­ a krajneho zarjada za dróhotwar a wobchad su sej problematiske městna w Klětnom, Delnim Wujězdźe a Hamorje wobhladali a so na wšelake rjadowanja dojednali. Tak su před Klětnjanskej pěstowarnju spěšnosć na 30 km/h redukowali, štož płaći za čas, dołhož je pěstowarnja wočinjena. Na křižowanišću zwjazkoweje dróhi B 156 a statneje dróhi S 108 na kromje Delnjeho Wujězda płaći wotnětka ze wšěch třoch směrow maksimalna spěšnosć 70 km/h. Zo bychu tam rjadowanje předjězby hišće jasnišo wuzběhnyli, připrawja nimo toho přidatne wobchadne znamjenja.

Njebjelčicy (aha/SN). Zo je gmejnska rada Njebjelčic hakle na swojim wčerawšim posedźenju hospodarski plan za lěto 2018 wobzamknyła, wopodstatni wjesnjanosta Tomaš Čornak (CDU) z wjacorymi argumentami. Po jeho słowach njebě lochko na jednym boku lutować z přewostajenymi srědkami, na tamnym boku pak zaručić trěbne inwesticije. Tak gmejna lětsa žane klučowe připokazanki njedóstanje. Dale ma 30 procentow mjenje dochodow z přemysłoweho dawka. Tohodla zwyšichu radźićeljo sadźbu za njón wo dźesać na 400 procentow.

Cyłkowny etat gmejny ma wobjim połdra miliona eurow. Jedna z najwažnišich inwesticijow je za 32 000 eurow derje wuhotowane trjebane wohnjowoborne awto, kotrež Njebjelčanscy wobornicy hišće lětsa dóstanu. Za saněrowanje Lipoweho puća w Njebjelčicach a za jeho wobswětlenje z dźewjeć lampami nałožichu 47 000 eurow, za twar baćonjaceho hnězda při Miłočanskej ­žabje 10 000 eurow. Nimo toho natwa­richu lětsa w Serbskich Pazlicach nowej busowej čakarni. Za naličene inwesticije dóstanje gmejna dohromady něhdźe 150 000 eurow spěchowanje, tak zo zwostanje za nju swójski podźěl 37 000 eurow.