Policija (20.06.19)
Pokuta a dypk za sutanje
Porchow. Po njezbožu nimaja nimo jěducy šoferojo wobdźělene jězdźidła abo samo wosoby filmować abo fotografować. To wěstaj nětko tež šoferaj, kotrajž běštaj wčera rano nimo wobchadneho njezboža na awtodróze A 4 pola Porchowa jěłoj a je z handyjom nahrawałoj. Wobrotniwi policisća napołožichu jimaj pokutu 100 eurow a dypk w Flensburgu.
Wobswět dokładnje wobkedźbuje
Zo by žoraw dale w suchim stał
Wobydlerjo Koslowa su w zašłosći časćišo z iniciatiwami za swoju wjes na so skedźbnili. Nětko zwoprawdźeja woni dalši projekt, wo kotrymž su hižo wjacore lěta rozmyslowali.
Koslow (JK/SN). Wjesny domicil „K žorawjej“ je Koslowčanam hižo tójšto lět spodobna městnosć zetkawanja. Tam su w zašłosći hižo někotryžkuli podawk zhromadnje woswjećili. Wjesnjenjo so tuž dołho njedlijachu a přimachu so gratu, jako rěkaše dom wobnowić a rozšěrić. W swójskej iniciatiwje zahajichu přitwar swojeho kulturneho srjedźišća. Za to prócowachu so wo spěchowanske srědki z programa Leader, kotrež jim po 75 procentach přizwolichu.
Petra Wowčerkowa, kotraž so w spěchowanskich naležnosćach derje wuznawa, je cyłkowne spěchowanje 32 000 eurow organizowała. 10 000 eurow Koslowčenjo sami zwjedźechu, štož su sej w běhu nimale dźesać lět nazběrali. Tak dołho hižo so z myslu noša swój wjesny dom powjetšić a wobnowić. Twarske dźěła derje postupuja a hruby twar je nimale zakónčeny.
Swjatočny raz z družkami
Wuznawanje katolskich křesćanow na swjedźenju Božeho ćěła
Baćoń (SN/MWj). Wysoki swjedźeń Božeho ćěła su dźensa tež w serbskich katolskich wosadach dostojnje swjećili. Wón je nimo hód, jutrow a swjatkow sobu najwažniši cyrkwinski podawk lěta, z kotrymž kemšerjo wuznawaja, zo wěrja do Jězusa Chrystusa jako přitomneho w přežohnowanym woblatku. W dołhich procesionach ćehnjechu wěriwi po Božej mši z cyrkwjow k wonkownym wołtarkam, kotrež běchu na tradicionalnych městnach natwarjene. Puć k nim bě na mnohich městnach z mejkami wupyšeny, nimo toho su mjeńše družki a dalše dźěći pisane kćenja kwětkow na puć słali. Zdźěla mějachu wobydlerjo swoje domy z cyrkwinskej a serbskej chorhoju wupyšene. Procesiony přewodźachu zwjetša wosadni dujerjo.
Naměsto z nowym pomnikom
Dwěle wostanu
Krótkopowěsće (20.06.19)
Rada chce šulerjow podpěrać
Drježdźany. Sakska krajna staršiska rada je šulerjam za jich klimowu konferencu sobotu w Lipsku połnu podpěru přilubiła. Pozadk je pospyt 14lětneje šulerki, krajnej šulerskej radźe wobdźělenje na konferency zakazać. Chwatnu próstwu wo to na Drježdźanskim zarjadniskim sudnistwje bě šulerka stajiła, kotruž zastupuje prawiznik Joachim Keiler, wicepředsyda AfD w Sakskej. Sudnistwo dotal hišće rozsudźiło njeje.
Myto přichoda do Łutow
Drježdźany. Łutowska firma Witrinowy a škleńcotwar Reier tzwr je Myto přichoda 2019 Drježdźanskeje rjemjeslniskeje komory dobyła. Sakski ministerski prezident Michael Kretschmer (CDU) a prezident komory Jörg Dittrich staj je dźensa we wobłuku jeje lětnjeho swjedźenja přepodałoj. Witriny z Łutow wuhladaš na přikład w Pariskim Louvre.
Lěkarske zastaranje so polěpša
W nuzowym padźe maja dosć wody za hašenje
Łazk (aha/SN). Puć Při Klóšterskej wodźe we Łazku je Ralbičanske wohnjowa wobora minjeny pjatk zaraćiła. Na zbožo pak njebě so ničo stało. Wobornicy su tam hydrant, kotryž bu při wobnowjenju puća před lětomaj připrawjeny, přizamknyli a wupruwowali. Dotal dyrbjachu w nuzowym padźe wodu za hašenje pak z hata brać – štož je w zymje, hdyž je zamjerznjeny, wobćežne a čas rubjace – pak ze zdaleneho hydranta na kromje wsy do směra na Ralbicy.
Po přizamknjenju staj Křesćan Janca a woborny nawoda Joachim Měrćink kontrolowałoj, hač tam woda za hašenje w dosahacej měrje ćeče. A wobaj zwěsćištaj, zo tomu tak je. Tank hašenskeho awta móžachu tuž z 2 000 litrami wody napjelnić. Runočasnje přepruwowachu, hač dosaha ćišć, hdyž dyrbja z awta při hawariji wodu brać. Wobsedźerjo łukow smědźachu so tuž nad njewočakowanym „dešćom“ wjeselić.
Wot šibjeńcy k wotpočnišću
Nowe městno za přestawku při statnej dróze S 111
Nowe Błohašecy (CS/SN). Najwyše městno statneje dróhi S 111 mjez Budyšinom a Hodźijom pola Nowych Błohašec rěka w ludźe Šibjeńca. Hdźež je dźensa parkowanišćo z předawanišćom zakuskow, su něhdy woprawdźe ludźi wotprawili. W zwisku z twarom kolesowanskeje šćežki podłu statneje dróhi je krajny zarjad za dróhotwar a wobchad lipowy rondel na wonym městnje sporjadkował, mały schód natwarił a wjacore lipy sadźił.
Hodźijske domizniske towarstwo je sej předewzało na tymle městnje prawe wotpočnišćo wuhotować, hdźež móhli kolesowarjo pozastać a so wo stawiznach městna wobhonić. Tam dźě maš wulkotny wuhlad na hórski rjećaz na juhu. Minjene tydźenje nastajichu tam blido a ławce kaž tež informaciske tafle. Na dwěmaj z nich widźiš panoramu krajiny z mjenami horow. Dalšej tafli informujetej wo stawiznach wotprawnišća a wotpočnišća. Přełožk za serbskorěčnu taflu je dr. Sonja Wölkowa ze Serbskeho instituta wobstarała.
Policija (19.06.19)
Jeli a telefonowali
Budyšin. Najebać krute abo mobilne rěčenske připrawy a byrnjež pokuta wot 60 na 100 eurow zwyšena była, mnozy šoferojo při jězdźenju přeco hišće swój handy wužiwaja a z nim telefonuja abo w socialnych medijach surfuja. Tak su zastojnicy awtodróhoweje policajskeje direkcije předwčerawšim dopołdnja na A 4 pola Budyšina wodźerja nakładneho awta kaž tež třoch šoferow wosobowych awtow lepili, kak jěducy handy w ruce dźerža a telefonuja. Woni dóstanu nětko list, zo maja pokutu płaćić.
