Do rěznistwa so zadobyli
Wojerecy. Wokoło hodownych swjatych dnjow běchu so njeznaći na Wojerowskej Hasy Ziolkowskeho do rěznistwa zadobyli a pokradnychu tam třicyfrowu sumu pjenjez. Na to přepytachu tež rumnosće susodneje pjekarnje a načinichu wěcnu škodu něhdźe 4 000 eurow.
Pod wliwom drogow z awtom jěł
Brětnja. Zawčerawšim dopołdnja su policisća w Brětni na B 97 šofera Peugeota zadźerželi. Při kontroli woni zwěsćichu, zo bě 25lětny pod wliwom drogow po puću.
Budyšin. „Dwurěčnosć je cool“, z tymle hesłom so we Łužicy za to wabi serbšćinu wuknyć. Prašenje za tych, kotřiž so na jednym z dosć rědkich kursow serbšćiny wobdźěleja, je: Hdźe móžeš nimo toho hišće swoje wobmjezowane kmanosće nałožować? W rozmołwje z maćernorěčnymi Serbami sej to mnozy zwjetša njezwěrja. We wjele kónčinach serbskeho sydlenskeho ruma bohužel njeje samozrozumliwe, zo so w zjawnosći serbuje. Tuž dyrbiš aktiwnje za serbskorěčnymi rumami pytać. Tajki namakaš we wšelakich rozmołwnych kołach, kaž su na přikład ewangelske ,Bjesady a druhe skupiny. Ale tež Stajne serbske blido w Budyšinje tajku móžnosć skići. Wone wotměwa so nimale kóždu póndźelu w hosćencu ,,Alter Bierhof“, a to wot 18.30 hač do něhdźe 20.30 hodź.
Wojerecy (AK/SN). Město Wojerecy dyrbi za financowanje dźěćacych dnjowych přebywanišćow w swobodnym nošerstwje přidatnje 900 000 eurow nałožić. Tole běchu měšćanscy radźićeljo po wobšěrnym stejišću šulskeho a socialneho měšćanosty Thomasa Dellinga (SPD) hižo w nowembru wobzamkli. Přiznał bě Delling zanjechanja zarjadnistwa a skomdźenja swobodnych nošerjow. Za to zasadźeny sobudźěłaćer města dyrbješe mjeztym wučbu z toho sćahnyć a hić.
Kónc lěta wróćo zhladuješ a dopominaš so rady na wulkotne dožiwjenja. Wosebite wjerški, skedźbnjace na wjelelětne stawizny, su jubilejne zarjadowanja a swjedźenje. Na wosebitu róčnicu móžachu Pěskečenjo lětsa zhladować.
Pěskecy (aha/SN). Druhi swjaty dźeń hód po nyšporje so Pěskečenjo dopominachu, zo maja swoju kapałku mjeztym 25 lět. Wot 1992 je tele městno duchowne srjedźišćo wsy.
Hižo w NDRskim času zrodźichu někotři wjesnjenjo ideju, sej kapałku natwarić. Jich předstawy pak tehdy wězo wotpokazachu, a hakle po přewróće po jutrach 1991, dóstachu twarsku dowolnosć. Agilny kwartet– Jan Smoła, Beno Pólk, mjeztym njeboh Beno Lipič a Jan Matka – přewza nawod twarskich dźěłow, organizatoriski wotběh kaž tež zasadźenje ćěslow a mulerjow. Wšědnje dźěłajo a kóždu sobotu wužiwajo natwarichu nahladny Boži dom. Cyła wjes je při twarje po swojich mocach pomhała. Mějićeljo lěsow běchu darmotnje trěbne drjewo přewostajili, a w NDRskim času za twar konsuma přihotowany material bu sobu wužiwany.
Miłoraz (AK/SN). Rudi Krauz a Hans-Joachim Klei zasadźataj so za to, Miłoraz njewotbagrować. „Miłoraz ma so zaso ze žiwjenjahódnej wsu stać“, podšmórnje krajinowy moler Hans-Joachim Klei. Wonaj sej samo žadataj tež lěsy, pola a zahony wokoło wsy znowa zarjadować. „Wobkedźbować maja so při tym dalokož móžno stare wobsydstwowe poměry. Nastać ma zaso syć dróhow a pućow kaž tež dalša infrastruktura“, měnitaj wuměnkarjej z Rownoho a Běłeje Wody.
Na diskusiju z FUEN
Berlin. Federalistiska unija europskich narodnych mjeńšin (FUEN) přewjedźe klětu spočatk februara wosebity medijowy forum. 1. a 2. małeho róžka zaběraja so zajimcy z temu „Politika a medije za mjeńšiny: informacija, syć, komunikacija“. Forum je wusměrjeny na aktualne temy w mjeńšinowej politice. Diskutować budu zastupjerjo politiki kaž tež němskich a mjezynarodnych medijow.
Liča z wjetšim wunoškom
Picnjo. Delnjołužiscy rybarjo a hatarjo su z lětušim rybjacym lětom spokojom a liča samo z wjetšim wunoškom hač loni. Kaž Braniborski krajny rybarski zwjazk informuje, móhli rybarjo lońši wunošk 609 tonow na 650 tonow stopnjować. Pozitiwnje běchu so lětnje dešće wuskutkowali. Naprašowanje za rybu je runje nětko do silwestra wulke. Płaćizna na kilo wosta na lońšim niwowje.
Wjace žiwidłow za Caritu
Budyšin (SN). Dokelž maja mnozy sobudźěłaćerjo wobchadneho zwjazka Hornje Łobjo (VVO) na proze do noweho lěta dowol, poruča VVO wosebitu hotline. Telefonisce su přistajeni serwisoweho teama silwester a Nowe lěto wot 10 do 18 hodź. pod čisłom 0351 852 65 55 docpějomni, zo bychu ludźi wo busach a ćahach informowali. Infohotline VVO je hewak wotydźenja wot 7 do 19 hodź., sobotu, njedźelu a dalše swjate dny wot 8 do 19 hodź. docpějomna.
Gospelowy chór na turneji
Budyšin (SN). Pjaty króć je chór „The Gospel People“ lětsa w zymje na wulkej turneji po cyłej Němskej. Z wuběrnymi a wusahowacymi hłosami zahorjeja spěwarjo publikum přeco zaso ze swojim poselstwom. Tak chce sydomčłonska ameriska gospelowa skupina ze swojej hudźbu w času njewěstosće ludźom tróšku nadźije spožčić. Na to móža so fanajo tež w Budyšinje wjeselić. Pjatk, 29. decembra, wot 20 hodź. poskići chór něhdźe dwuhodźinski program jazza a soula w Marje-Marćinej cyrkwi.