Krótkopowěsće (25.01.18)
Wabja za jězorinu
Drježdźany. Turistiski zwjazk Łužiska jězorina chce kónc tydźenja na Drježdźanskich pućowanskich wikach za přebytk w krajinje jězorow wabić. Zdobom předstaja tam nowy „Jězorinowy magacin“. Nimo poskitkow za aktiwny dowol wabja z industrijnej kulturu w najwjetšej wot čłowjeka wutworjenej jězorinje Europy. Tež wo přenocowanskich móžnosćach budu wobšěrnje informować.
Zhorjelsku turbinownju njespušća
Davos. Słowa šefa koncerna Siemens Joewa Kaesera na kromje swětoweho hospodarskeho foruma wčera w šwicarskim Davosu skrućeja nadźiju mjez sobudźěłaćerjemi Zhorjelskeje turbinoweje twornje, kotraž je wot zawrěća wohrožena. „Njespušćimy Zhorjelc. Budźemy ludźom tam pomhać, damy jim přichod.“ Kaeser drje hišće njewě kak, jedyn puć pak namaka.
SGB ze slěbrom a bronzu
Kolesowarka so ćežko zraniła
Předstaja nowu protyku
Budyšin. Nowa hornjołužiska domjaca protyka 2018 steji w srjedźišću přichodneho zarjadowanja w Budyskej Smolerjec kniharni, a to jutře, štwórtk, w 19.30 hodź. Z hosćom budźetaj tam dr. LarsArne Dannenberg a Jan Bergmann. Wonaj předstajitaj swoje Kinsporske nakładnistwo Via Regia a jeho knižny poskitk. Wotnětka wuchadźa w nakładnistwje Hornjołužiska domjaca protyka, kotruž bě do toho wjele lět dr. Frank Stübner w swojim Budyskim nakładnistwje Lusatia wudawał.
Porěča wo ludowej basnicy
Policija (24.01.18)
Dobry čuch měli
Koparska legenda přińdźe na wopyt
Kamjenc (SN). Po poradźenej lońšej premjerje z Gertom Zimmermannom a Eduardom Geyerom wotměje so lětsa dalša Kamjenska koparska rozmołwa. Poboku woblubowaneho reportera „Zimmija“ budźe tónraz Hans-Jürgen „Hansi“ Kreische. Wón je woprawdźita legenda kopańcy we wuchodnej Němskej. Z mustwom NDR wudoby sej na olympiskich hrach 1972 w Mnichowje bronzu a sta so z Dynamom Drježdźany pjeć króć z mištrom a doby jónu pokal. To drje su najlěpše wuměnjenja, wěcywustojnje a zabawnje wo kopańcy porěčeć.
Rozmołwne zarjadowanje wotměje so štwórtk, 1. měrca, w 19 hodź. w Kamjenskim měšćanskim dźiwadle. Zastupne lisćiki dóstanu zajimcy w běrowje Zapadołužiskeho koparskeho zwjazka na Pfortenowej hasy 3 w Kamjencu (tel. 03578/ 35 31 215). Zastup płaći za dorosćenych dźesać eurow. Dźěći hač do staroby 14 lět maja z přewodom dorosćeneho darmotny zastup.
Liča z wotměnjatym lětom
Njeswačenjo hotuja so nětko na wulki jubilej wsy
Njeswačidło (JK/SN). K zazběhej swojich lětušich posedźenjow zaběrachu so radźićeljo gmejny Njeswačidło wčera z wobłukowymi ličbami za hospodarski plan 2018. K tomu poda komornica Liliane Wetzko krótki, ale naročny přehlad. Dokelž so lětsa w Sakskej tójšto zakonjow a předpisow nastupajo hospodarjenje změni, budu je tež při nastajenju gmejnskich planow wobkedźbować dyrbjeć. Wjesnjanosta Gerd Schuster (CDU) wuchadźa tuž z toho, zo trjebaja lětsa něšto wjace časa doskónčny plan nastajić. Při planowanju dyrbja zdobom wobkedźbować, zo maja tež hišće zahajenskej bilancy za lěće 2014 a 2015 zhotowić a doskónčnje tež hišće wotstronjenje škodow wulkeje wody z lěta 2013 wotličić. Za to wšak wšitke přizwolene spěchowanske srědki dóšli njejsu. Na komornicu a jeje sobudźěłaćerki tuž tójšto dźěła čaka. Přiwšěm su radźićeljo dosć optimistiscy, zo změja zaso wurunany plan. Kaž woni hižo wědźa, dóstanu trochu wjace inwestiwnych a klučowych připokazankow. Přichodne lěta pak tele připokazanki tak wobšěrne njebudu.
Wobjězdka najwjetši problem
Hdyž dyrbja do posedźenja Radworskeje gmejnskeje rady přidatne stólčki přinjesć, je jasne, zo chcedźa naležnosć wobjednawać, kotraž mnohich wobydlerjow zajimuje.
Radwor (SN/MkWj). Tema, kotraž jenož Radworčanow njezaběra, jewješe so wčera wječor skerje na kóncu dnjoweho porjada: wutwar křižowanišća při Radworskim kěrchowje. Hnydom pjeć dróhow tam na so trjechi – puć na Radworsku nawjes runje tak kaž dróhi do Łupoje, Kamjeneje, Lutobča a Boranec. Hižo dlěje wo tym rozmysluja, tónle strašny dypk přetwarić a wobchadne połoženje polěpšić. Nětko dyrbi wšitko jara spěšnje hić. Sakski krajny zarjad za dróhotwar a wobchad je gmejnje připowědźił, zo móže přetwarjeć započeć a zo projekt z 90 procentami spěchuje. Za to pak dyrbjachu radźićeljo dojednanje ze wšitkimi wobdźělenymi wotzamknyć: z krajom, z krajnoradnym zarjadom a nic naposledk ze zaměrowym zwjazkom za wopłóčki. Hižo w februaru chcedźa twarske dźěła wupisać a potom spěšnje započeć.
Runja mnohim druhim městnam je tež w Spalach z wašnjom, zo tam jako ...
Njetrjebawši scenarij
Třěleja nětko wjace dźiwich swini
W Němskej dotal pady afriskeje swinjaceje mrětwy znate njejsu. Tuž njejsu tež w Budyskim wokrjesu žane wobmjezowanja přikazane. To rěka, zo njetrjebaja ludźo swoje psy za powjaz wodźić.
Budyšin (SN/mwe). Kaž Budyski krajnoradny zarjad na naprašowanje SN wobkrući, njetrjebaja so tudyši wobydlerjo tuchwilu starosćić, zo jich afriska swinjaca mrětwa (ASP) dosćehnje. Wšako za čłowjeka, psy a kóčki strach natyknjenja njewobsteji. Zo pak móže so chorosć mjez dźiwimi swinjemi jara spěšnje wupřestrěć, njeje žane potajnstwo. Wot toho potrjechene móhli tež domjace swinje być, kotrež bychu hladarjo w padźe ASP po tysacach morić dyrbjeli.
