Koncertuja na druhim městnje
Radwor. Swój lětni koncert přewjedźe Radworski chór Meja njedźelu, 30. junija, w chłódku štomow na farskej zahrodźe při Radworskej cyrkwi, nic kaž hewak před Starej cyrkwičku. Wot 15.30 hodź. poskića swačinu. Koncert započnje so w 16 hodź. Nimo Mejanow wuhotuje program chór Svatobor z čěskeho městačka Sušice južnje Plzenja. Wón přijědźe prěni raz do Łužicy. Wječor wuklinči ze zhromadnym spěwom a bjesadu.
Twarja parkowanišćo
Wojerecy. Při tak mjenowanym zarjadniskim parku na Pforzheimskim naměsće we Wojerecach su tele dny parkowanišćo wutwarjeć započeli. Hač do kónca oktobra maja tam 104 městna za wosobowe awta, tři městna za awta zbrašenych, šěsć městnow za caravany a dwě městnje za busy nastać. Dale nastaja tam 17 sćežorow za wobswětlenje a nasadźa 30 štomow. Dohromady nałoža za parkowanišćo wjace hač 580 000 eurow.
Z Afriki na wopyće w Hornjej Łužicy
Stróža (SN). Wobydlerjam a hosćom biosferoweho rezerwata Hornjołužiska hola a haty je minjene dny snano wulka ličba wulkich pisanych mjetelow napadnyła. Su to wóstowe kadźency abo wóstowe mjetele (Distelfalter), kotrež wot Afriki hač do Skandinawiskeje leća a w Hornjej Łužicy pozastanu. „Tajku wulku ličbu wóstowych mjetelow hižo dźesać lět wobkedźbował njejsym“, rozprawja ranger a znajer insektow w biosferowym rezerwaće Mario Trampenau.
Je to dyrdomdejske pućowanje, na kotrež so překasancy nastajeja. Wone startuja w zymje w Sudanje abo Etiopiskej, zo bychu na arabsku połkupu lećeli. Tam je lětsa nalěto skrótka pusćina kćěła, dokelž bě dosć dešća. Mjetele móžachu tam tuž swoje jejka njesć, a nowa generacija je so wuwiła. Ta lećeše dale na Bliski wuchod, Turkowsku a na Balkan a dósta so skónčnje k nam.
Boršć kulturne herbstwo?
Město Kamjenc prócuje so wo wosebity titl za swój najznaćiši swjedźeń
Kamjenc (UM/SN). Za něšto tydźenjow budźe zaso tak daloko, zo wotměje so w Kamjencu tradicionalna Boršć. Po historiskich podawkach w 15. lětstotku, jako po legendźe běłe zdrasćene dźěći husitske wójsko pohnuchu Kamjenc zalutować, wuwi so měšćanski swjedźeń, kotryž drje je ze swojej tradicionalnosću a ze swojimi krutymi ritualemi jónkrótny. To je po měnjenju měšćanskeho zarjadnistwa dosć přičiny, zo měli Boršć na lisćinu imaterielneho kulturneho herbstwa přiwzać.
Załožili su nětko dźěłowu skupinu, wobstejacu ze zastupjerjow swjedźenskeho komiteja a měšćanskeho zarjadnistwa, kotraž ma wotpowědnu próstwu zdźěłać a ju hač do kónca oktobra sakskemu ministerstwu za wědomosć a wuměłstwo zapodać. Nimo historiskich pozadkow a dźensnišeje praksy dyrbja fachowej posudkaj wot njewobdźěleneju wosobinow přidać. Na to zaběraja so z tym konferenca kultusowych ministrow, němska komisija UNESCO a zwjazkowy społnomócnjeny za kulturu. W najlěpšim padźe móhli Boršć hižo kónc lěta na lisćinu přiwzać.
Wjedro wšěm wulke wužadanje
Štóž runje dowol nima, tón ma tele dny chětro horce wjedro znjesć. Hač w běrowje, nakładnym awće abo na twarnišću – čłowjek so lědma wjeseli, hdyž je hižo dopołdnja 30 stopnjow a wjace.
Rakecy (aha/SN). Horcoće wosebje wustajeni su twarscy dźěłaćerjo, kotřiž maja nimo toho hišće ćežke ćělne dźěło zmištrować. Dźěłaćerjo Hórčanskeje Wehnertec firmy mějachu předwidźane, parkowanišćo před Rakečanskim nakupowanišćom asfaltować. To pak při tuchwilnych temperaturach móžno njeje. Tohodla so najprjedy hinašim hłubokotwarskim dźěłam wěnuja, kaž nawoda zawoda Ronald Thote rozłoži. Po jeho słowach smědźa dźěłaćerjo hižo připołdnju dźěłać přestać a nadhodźiny brać.
Kulowski ćěsla Milan Šefer swojim dźěłaćerjam do transportera kašćik wody staji, prjedy hač na twarnišća wotjědu. Woni drje su jara rozdźělne wjedro zwučeni, přiwšěm spytaja na třěchach nic runje tam dźěłać, hdźež so słónco staja.
Prěnje twarske nadawki přepodali
Pančicy-Kukow (SN/MWj). W běrowowym twarjenju zarjadniskeho zwjazka Při Klóšterskej wodźe w Pančicach-Kukowje su nětko w poslednjej horcej fazy přihotow na energetiske saněrowanje domu. Z nim chcedźa po wšěm zdaću spočatk awgusta započeć. Na wčerawšim poslednim posedźenju zastupjerjow pjeć sobustawskich gmejnow nachilaceje so wólbneje doby přepodachu twarskim firmam prěnje nadawki. To su hłownje te, kotrež dyrbja jako prěnje zwoprawdźić.
Tuchwilne njewšědnje horce wjedro mnohich ludźi poćežuje. Štóž ...
Tuchwilne njewšědnje horce wjedro mnohich ludźi poćežuje. Štóž pak ma doma něšto drobneho skotu a trjeba w zymje nimo syna tež wotawu, tón tele dny wužiwa a nětko druhi raz swoje składy napjelnja. Wčera pozastachmy pola Wićazec w Šunowje, kotřiž runje wotawu dźěłachu. Foto: SN/Maćij Bulank
Krótkopowěsće (26.06.19)
Maja šansu na alternatiwnu šulu
Běła Woda. Kaž regionalna wotnožka Sakskeho krajneho zarjada za šulu a kubłanje připowědźa, móh-li Swobodnu alternatiwnu šula w Běłej Wodźe wotewrěć. Hdyž iniciatorojo hač do 28. junija zarjadej pobrachowace podłožki zapodadźa, móža hač do 9. awgusta přizwolenje dóstać. Wot noweho šulskeho lěta je za 1. lětnik dotal 16 dźěći přizjewjenych.
Nowy Staršiski list wušoł
Budyšin. Serbske šulske towarstwo je swój mjeztym 48. staršiski list wudało. Tema serbsko- a němskorěčneje brošurki je strowe zežiwjenje. Nimo fachoweju přinoškow dr. Uty Libšoweje a dipl. oec. Kathi Dittrichoweje rozprawja Janina Wjeselina wo tym, kak doma jědźa. Zapřijate su rozprawy ze žiwjenja Ralbičanskeje, Wotrowskeje, Chróšćanskeje a Wotrowskeje pěstowarnje. Dźěći móža na dwěmaj stronomaj wumolować a hódać.
Mjenje rozwodow w Čěskej
Policija (25.06.19)
Z nožom do muža kłół
Budyšin. Ze strašnym zranjenjom ćěła skónči so wčera připołdnju rozestajenje mjez mužomaj na Budyskej Serbskej hasy. Dotal njeznaty muž je tam wjacore razy do 33lětneho kłół a na to ćeknył. Zranjeneho dowjezechu do chorownje. Policija za skućićelom pyta.
„Mały Muk“ na jewišću
Budyšin. Serbske dźěćace dźiwadło při NSLDź předstaji jutře, srjedu, hru „Mały Muk“, a to w 10 hodź. na hłownym jewišću Němsko-Serbskeho ludoweho dźiwadła.
Na čitanje do „Wódneho muža“
Malešecy. Župa „Jan Arnošt Smoler“ a Domowinska skupina Malešecy přeprošatej štwórtk, 27. junija, w 14 hodź. na čitanje Křesćana Krawca we „Wódnym mužu“ w Malešecach. Awtor čita ze swojeje knihi „Das Ende vom Paradies“. Čitanje zarjaduje so do slěda župnych zarjadowanjow k wozrodźenju serbšćiny w Malešanskej kónčinje. Zastup je darmotny.
