Krótkopowěsće (25.07.19)
ZVON zwyši płaćizny
Budyšin. Wot 1. awgusta maja ludźi wjace pjenjez za busowy abo ćahowy tiket na terenje Zaměroweho wobchadneho zwjazka Hornja Łužica-Delnja Šleska ZVON zapłaćić. To bě ZVON hižo w decembrje wyšich kóštow za sprit, personal a narunadłow dla wobzamknył. Tak stupa płaćizna za dnjowy tiket w terenje ZVON wot dotal 12 na 13,50 eurow.
Chcedźa dialog wuwabić
Choćebuz. „Ći tamni smy my – wobrazy disonantneje towaršnosće“ rěka fotowa wustajeńca, z kotrejž wěnuje so Braniborski krajny muzej za moderne wuměłstwo aktualnym towaršnostnym konfliktam. Chcedźa tak dialog mjez „Zmištrujemy to“ a „My smy lud“ wuwabić. Wustajeńcu wotewru 16. awgusta w Choćebuskim muzeju Dieselkrafwerk.
Murja z nowym mjezwočom
Busowe dwórnišćo bórze wužiwaja
Znaty zawod by swoju zamkarnju rady rozšěrił
Pančicy-Kukow (SN/MWj). Runje za čas žnjow maja sobudźěłaćerjo zawoda za ratarsku techniku BayWa w Pančicach-Kukowje ruce połne dźěła. Wodnjo a w nocy wobsteji nětko zasadźenska hotowosć. Hdyž so při dźěle na polu traktor abo syćomłóćawa skóncuje, dyrbja ju zamkarjo tak spěšnje kaž móžno sporjedźeć. „Jenož hdyž mašina funguje, wona ratarjej pjenjezy přinjese“, wě Steffen Müller. Hromadźe z dalšimi witaše regionalny nawoda BayWa za wuchodnu Saksku a južnu Braniborsku njedawno zapósłancow Sakskeho krajneho sejma Alojsa Mikławška a Marka Šimana (wobaj CDU), jako wonaj we wobłuku swojeje kóždolětneje kolesowanskeje jězby po swojimaj wólbnymaj wokrjesomaj tež w Pančicach-Kukowje pozastaštaj.
Policija (24.07.19)
Skućićela lepili
Budyšin. We wčerawšich rańšich hodźinach wobydler Budyskeje Mättigoweje policiju informowaše, zo bě runje wobkedźbował, kak so njeznataj do awta zadobudź spytataj. Jednoho ze skućićelow zastojnicy hišće na městnje lepichu, tamny ćekny. W nachribjetniku 39lětneho Georgičana namakachu wěcy, kotrež běchu po wšěm zdaću pokradnjene. Wokno Opela, z kotrymž so wón runje zaběraše, bě rozbite. W bliskosći wuhladachu štyri awta, do kotrychž bě so něchtó na podobne wašnje zadobył. Hač běštaj to 39lětny a jeho komplica, dyrbja nětko zwěsćić. Georgičana nachwilnje zajachu.
Lěpše wuměnjenja sportowcam
Kulowske sportowe towarstwo zwoprawdźa nětko projekt, za kotryž běchu ideju hižo před pjeć lětami zrodźili. Za njón su wčera zakładny kamjeń połožili.
Kulow (AK/SN). Hač do kónca lěta natwari Kulowske sportowe towarstwo Módro-běli nowe socialne twarjenje bjez barjerow. W nim budu nuzniki, płokarnja a sušernja za trikoty kaž tež skład za bule a sportowe nastroje. Małe pódlanske twarjenje budźe dźěłarnja. „Nowotwar je dawno trěbny“, podšmórny twarski nawoda Udo Popjela wčera při połoženju zakładneho kamjenja. Stare twarjenje pochadźa z 1950tych lět. W nim běchu nuzniki kaž tež tepjenje často skóncowane. Wopytowarjo dyrbjachu zwjetša nuzniki towarstwoweho hosćenca wužiwać. Popjela je studowany twarski inženjer a bě wot 1994 do 2014 Kulowski měšćanosta. W tym času je twar towarstwoweho domu 1998, sportnišća z wobswětlenjom 2006 a přihladowarskeje tribuny 2011 sobu přewodźał. Dźensa angažuje so čestnohamtsce jako twarski nawoda, tak zo towarstwu žane wudawki za inženjerske dźěła njenastanu.
Rybarsku šulu chcedźa ponowić
Planowana twarska naprawa bywšeho kubła ma tež politisku přičinu
Rakecy (UM/SN). Saksku Krajnu rybarsku šulu w Rakecach chcedźa wot nalěća 2021 wobšěrnje saněrować. Zarjadnišćo w twarskim kompleksu bywšeho Rakečanskeho knježeho kubła ma po informacijach Statneho zawoda imobilijowy a twarski management (SIB) tójšto njedostatkow. Serbske Nowiny projekt předstajeja.
Kotry wuznam ma šula?
Z modernej techniku so zeznajomili
Ze zjawnej zahrodu šulerjam wobswět serbsce zbližić (3)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim lětnim serialu Serbskich Nowin wam projekty předstajamy.
Při Budyskim Mikławšku je zjawna zelowa zahroda, hdźež móže kóždy, kiž chce, swoje rostliny zesadźeć a zela šćipać. Je to idyliski róžk stareho města, hdźež namakaš měr w přirodźe. Runje tajkele něšto přeje sej tež Robert Krawc z Budyšina. We wobłuku wubědźowanja „Čiń sobu!“ doby před krótkim myto, tak zo móže swój projekt zwoprawdźić. „Před dlěšim časom hižo zwěsćich, zo maš w Budyšinje lědma hišće šulske zahrody, hdźež šulerjo rostliny sadźeja a so wo nje staraja“, wón rozprawja. „Jako pytaše mój přećel Florian Kaulfürst njedawno zahrodku w měsće, mějachmoj ideju, zhromadnje natwarić zjawnu zahrodu, kotraž ma być dwurěčnje popisana.“
Krótkopowěsće (24.07.19)
Twarske dźěła so dlija
Pančicy-Kukow. Hinak hač spočatnje planowane njebudźe pjekarnja w klóštrje Marijinej hwězdźe w Pančicach-Kukowje hač do kónca awgusta hotowa. Kaž zdźěli dźěłarnja za zbrašenych, ke kotrejž pjekarnja słuša, so twarske dźěła dlija. Tuchwilu njemóža hišće rjec, kak dołho dźěła w pjekarni hišće traja. To samsne přitrjechi za kofejownju a přechod do klóšterskeje zahrody.
We warjenskej bitwje
Mainz. We warjenskej show ZDF „Die Küchenschlacht“ je tón tydźeń Lubina Ješkec mjez mjezy-finalistami. Póndźelu přeswědči wona ze serbskej kwasnej poliwku a twarohowymi kulkami, wčera z aprikozowym tykancom a waflu. Najpozdźišo pjatk budźe jasne, hač zaćehnje z Chelna pochadźaca Serbowka a w Mnichowje skutkowaca kosmetikarka do finala najlěpšich šěsć hobbyjowych kucharjow.
Skóržba wotpokazana
Policija (23.07.19)
Transporter pokradnyli
Wojerecy. Tójšto škody načinichu njeznaći minjene dny na Radskej dróze we Wojerecach. Kaž bu hakle zawčerawšim znate, pokradnychu hižo w nocy na 11. julij transporter typa Mercedes Sprinter. Tři lěta stare jězdźidło bě něhdźe 30 000 eurow hódne. Nakładowane měješe wone wjacore kašćiki ze specialnym gratom w cyłku něhdźe 20 000 eurow. Za awtom z čisłom F-BG 2253 policija nětko mjezynarodnje pyta.
