Budyšin (CK/SN). W twarjenjach Budyskeje agentury za dźěło dyrbi so wohnjoškit bytostnje polěpšić, kaž posudk fachowcow wujewja. Za to su wobšěrne twarske dźěła trěbne. Šef agentury Thomas Berndt tele dny rjekny, zo dyrbja alarmowe připrawy dospołnje ponowić, za čož dyrbja w kóždym běrowje a na chódbach wjerchi wotkryć. „W twarjenjach maja tohorunja wohnjoškitne sćěny natwarić, zo njemóhł so kur wšudźe wupřestrěwać“, Berndt wuswětli. Za přidatny ćěkanski puć dyrbja swisle jednoho z domow přetwarić. W zwisku z twarskimi dźěłami je nimo toho trjeba, špundowanja ponowić a garažu w pincy saněrować. Kóšty budu so po dotalnym trochowanju w jednocyfrowym milionowym wobłuku pohibować. „Nowotwar by hišće dróši był“, Thomas Berndt zwurazni.
Orchester policije wobkradnyli
Wojerecy. W nocy na wutoru su so njeznaći we Wojerecach do pućowanskeho busa zadobyli. Při tym jednaše so wo bus orchestra ukrainskeje policije. Hudźbnicy su tuchwilu na turneji a koncertowachu we Wojerecach. Z busa zhubichu so ec-kartka, nawigaciski nastroj a awtowe radijo. Při tej składnosći su paduši tež hišće klarinetu sobu wzali.
Budyšin. Komorny hudźbny wječor „Moja archa Horni Hajnk“ změje jutře, pjatk, w 19.30 hodź. hornjoserbsku premjeru w Röhrscheidtowej bašće Serbskeho ludoweho ansambla. Hudźbnicy Hanka Tiedemann (fleta), Bettina Witke (husle) a Helfried Knopsmeier (cello) jako Trio con moto rozestajeja so zhromadnje z dźiwadźelnikom Měrkom Brankačkom z knihu Jurja Brězana.
NSLDź wita na prapremjeru
Budyšin. NSLDź předstaji swoju nowu němskorěčnu inscenaciju „Łužiske kwartěry abo Rus w pincy“ prěni raz jutře w 19.30 hodź. na hłownym jewišću. Hru je Lipšćanski awtor Ralph Oehme spisał a doby z njej wubědźowanje „Łužicy 2017“, kotrež běchu Statne dźiwadło Choćebuz, Nowe jewišćo Zły Komorow a Budyske Němsko-Serbske ludowe dźiwadło loni wupisali.
Sadowcy šćěpić wuknyć
Njebjelčicy. W darmotnym kursu móžeće sobotu, 10. měrca, wot 9.30 do 12.30 hodź. w Njebjelčanskim gmejnskim zarjadnistwje nawuknyć, kak hodźa so sadowcy prawje šćěpić. Zajimcy njech přizjewja so pod telefonowym čisłom 03578/ 301 006.
Do dźěłarnje pohladnyć
Přidatna podpěra
Drježdźany. Za šulerjow z ćežkeho socialneho wobswěta ma so na sakskich šulach přidatny poskitk pod hesłom „Teach First Deutschland“ wuwiwać. Sobudźěłaćerjo maja wot šulskeho lěta 2018/2019 jako wosoby dowěry a přidatna móc wučerjow w spěchowanskej a fachowej wučbje podpěrać. Tak maja woni dźěći a młodostnych indiwiduelnje nawjedować. Zdobom přewjedu swójske zwonkašulske projekty.
Gabriel: Njebudu w knježerstwje
Berlin. Dotalny wonkowny minister Němskeje Sigmar Gabriel (SPD) njebudźe nowemu zwjazkowemu knježerstwu přisłušeć. Wo tym staj jeho komisariski předsyda SPD Olaf Scholz a přichodna stronska předsydka Andrea Nahles informowałoj, pisa Gabriel dźensa na komunikaciskej platformje Twitter. Wón budźe jenož hišće zapósłanc.
Wažne dróhi spěšnišo twarić
Chrósćicy (SN). Domowinska župa „Michał Hórnik“ a Rěčny centrum WITAJ přeprošatej wšitke dźěći, jich staršich, dźědow a wowki na zhromadne swójbne popołdnjo njedźelu, 11. nalětnika, do Chróšćanskeje „Jednoty“. Michał Cyž a „jolka-dźěći“ zarjadowanje w 15 hodź. zahaja. Po tym maja hosćo składnosć, so na wšelakich stacijach wupruwować na přikład při paslenskich a sportowych zaběrach, při šminkowanju, při wuknjenskich a kompjuterowych hrach abo při krosnowanju. Zubnej lěkarce Katka Baierowa a Christina Hozyna informujetej wo strowych zubach a prawym rjedźenju. Samo małe eksperimenty čakaja.
Starši a dźěći móža so tohorunja z fachowču za strowe zežiwjenje Raphaelu Wićazowej rozmołwjeć a sej nazhonjenja wuměnjeć. Němsko-Serbske ludowe dźiwadło přeprosy na improwizaciju a hraće małych scenow. Pola Michała Cyža móža sej trochu starše dźěći roboter natwarić. Ludowe nakładnistwo Domowina poskići serbske dźěćace knihi. Wo ćělne derjeměće budźe postarane.
Ćežke mašiny kradnyli
Pomorcy. Njeprošeny wopyt mějachu minjeny kónc tydźenja w jednym Pomorčanskim zawodźe. Zawčerawšim rano dyrbjachu sobudźěłaćerjo zwěsćić, zo běchu so tam njeznaći zadobyli. Z dźěłarnje pokradnychu paduši pjeć ćežkich mašinow za wobdźěłanje drjewa. Jich hódnotu trochuje wobsedźer na něhdźe 8 000 eurow. Kaž policija zdźěli, su skućićeljo lědma slědy zawostajili, štož wobdźěłanje pada poćežuje.
Kulow (AK/SN). W Mučowje, Salowje a Koćinje podpěruje město Kulow twarske předewzaća. Z nimi su so měšćanscy radźićeljo tele dny na swojim posedźenju zaběrali. W Mučowje jedna so wo wobtwarjenski plan „Při jamowej železnicy“. K njemu měještej wodowy zarjad Budyskeho krajnoradneho zarjada a Sakske krajne zarjadnistwo rěčnych zawěrow kritiske přispomnjenja. Te pak móžeše architekturny běrow rozrisać wotwažujo zapodate stejišća.
W Salowje zdźěłuje město wobtwarjenski plan za Cyhelerski puć. „Tam je so nam poradźiło tři twarske ležownosće wutworić“, rozłoži nawoda měšćanskeho twarskeho wotrjada Stephen Rachel. Po jeho słowach je we wsy jara ćežko, twarske ležownosće namakać. Swobodne městna mjez statokami jich wobsedźerjo často njepředadźa, dokelž rezerwuja je za swoje wnučki a prawnučki.
Budyšin. Nachwilnje změnjene su wotewrjenske časy Budyskeho Serbskeho domu. Wón je wot póndźele do štwórtka stajnje wot 6.30 do 16 hodź. a pjatk wot 6.30 do 14 hodź. přistupny. Wustajeńca „Domizna“ je dale přistupna přez Serbsku kulturnu informaciju wot póndźele do pjatka stajnje wot 10 do 16.30 hodź.
Mosćik na mału kupu
Worklecy (SN). Wulku a mału kupu Worklečanskeho kupoweho hata ma bórze drjewjany mosćik zwjazać. Tuchwilu steji wón w Sprjejcach w gmejnje Sprjewiny Doł. Dokelž tam dwanaće metrow dołhu a 2,6 metrow šěroku drjewjanu konstrukciju hižo njetrjebaja, móže ju Worklečanska gmejna darmotnje přewzać. Jeničce wo transport dyrbja so sami starać, rěkaše na posedźenju gmejnskeje rady. Z mostom na mału kupu chcedźa płoninu hata turistisce wožiwić.
Swobodni wolerjo so zetkali