Krótkopowěsće (31.07.19)
Wjelki znowa aktiwne
Šunow. Wjelki su wčera stadło wowcow pola Šunowa nadpadnyli a 20 z nich morili. To rozprawjeja wjacore regionalne medije. Dalše 20 skoćatow bu zranjene a tójšto ze 150 wowcow wopřijaceho stadła je z pastwy ćeknyło. Mjeztym pak móžeše je wobsedźer zaso popadnyć. Hač bě jedyn wjelk sam abo cyła črjóda stadło nadpadnyła, njeje jasne.
Něhdźe połsta bjezdźěłnych wjac
Budyšin. We wobłuku Budyskeje dźěłoweje agentury je nětko snadnje wjac ludźi bjez dźěła hač w juniju. Wo tym informowaše dźensa dopołdnja medijowa rěčnica zarjada Berit Kasten. Z cyłkownje 16 923 bjezdźěłnymi je jich w juliju 53 wjac. Aktualna kwota bjezdźěłnosće wučinja šěsć procentow. Za lochce wjetšu bjezdźěłnosć mjenuje agentura „sezonalne přičiny“ a zo přizjewja so wjele młodostnych po zakónčenju šule abo wukubłanja bjezdźěłnych.
Za strowotu hromadźe dźěłać
Policija (30.07.19)
Dróhi a pincy pod wodu stali
Worklecy. Njewjedra a sylnych zliwkow dla wołachu wčera wječor na wjacorych městnach wohnjowych wobornikow wo pomoc. Po informacijach Wojerowskeje centralneje dispatchernje bu we Worklecach ratarski statok zapławjeny. W Biskopicach, Porchowje a w gmejnje Ralbicy-Róžant dyrbjachu wobornicy wodu z pincow klumpać. W Kulowskej lěsnej kupjeli dyrbješe młodźinska redakcija Radija Satkula tamnišu staciju bičwolejbuloweho turněra dočasnje skónčić. Na někotrych městnach naměrichu wjace hač 50 litrow dešća na kwadratny meter.
Kontejner zapalili
Mały Wjelkow. Po wšěm zdaću wjele časa a mało rozuma mějachu njeznaći, kotřiž su minjenu njedźelu připołdnju na Wulkodubrawskej dróze w Małym Wjelkowje kontejner za trjebanu drastu a tři wotpadkowe sudobja za staru papjeru zapalili. Wohnjowi wobornicy woheń zhašachu. Škoda wučinja 2 000 eurow.
Awto rozdrapane
Njepřećahnu pjenjez dla
Za lěto móhli prěni zajimcy w Nowym Miłorazu twarić započeć
Slepo (AK/SN). Nowy Miłoraz sewjernje Slepoho su nětko wotkrywać započeli. „Zakład za to stej brunicowy plan z lěta 2014 a přesydlenske zrěčenje z měrca 2019. Hač do awgusta 2020 budu ležownosće medijam přizamknjene, tak zo móža zajimcy potom twarić. Hač do kónca lěta 2024 ma přesydlenje wotzamknjene być“, podšmórny Thomas Penk wot LEAG minjeny pjatk w Slepom.
Ze symboliskim prěnim zarywom su wotkryće noweje štwórće zahajili. Martin Klausch wot LEAG, Miłoraski wjesny předstejićer Enrico Kliemann a Slepjanski wjesnjanosta Reinhard Bork (CDU) su buk sadźili. Do zemje połožichu sudobjo z nowinami z dnja podpisanja přesydlenskeho zrěčenja a chroniku Miłoraskich podawkow wot lěta 2006.
Raz archeologa być
Kamjenc. Přichodny prózdninski poskitk za dźěći wotměje so w Kamjenskim Muzeju zapadneje Łužicy štwórtk, 1. awgusta. Tam chcedźa wobdźělnikam rozłožić, kak archeologojo dźěłaja a kak je zemja před něšto tysac lětami wupadała. Při tym póńdźe wo wurywanske dźěła runje tak kaž wo wědomostne wobdźěłanje namakankow. Zarjadowanje wotměje so wot 14 do 15.30 hodź. Wobdźělenje płaći tři eura na wosobu. Zajimcy njech přizjewja so pod telefonowym čisłom 0 35 78 / 78 83 10.
W młynje pokazaja filmy
Čorny Chołmc. Po wjacorych lětach přestawki zwaža so w Čornochołmčanskim Krabatowym młynje lětsa prěni raz na filmowe nocy. Te wuhotuja zhromadnje z organizatorami Drježdźanskich filmowych nocow při Łobju. W Čornym Chołmcu pokazaja wot zajutřišeho hač do 1. septembra dohromady 17 filmow. Prěni budźe štwórtk wot 21 hodź. film „Gundermann“ wo znatym spěwytwórcu Gerhardźe Gundermannje. Nazajtra w samsnym času předstaja pask „Aladdin“.
Zanjesu twórby Bacha
Předawanišćo tež zetkanišćo było
Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo rady k bjesadźe zetkawachu. W našej lětnjej seriji na něhdyše wjesne wobchody dopominamy.
Dźensa: Miłoćicy (9)
W Miłoćicach z jeho něhdźe 200 wobydlerjemi mějachu hižo 1926 mały wobchod z kolonialnymi tworami. Nimo tworow za wšědnu potrjebu běštej w Šěrakec domje tež póst a wjesna korčma, hdźež měješe hač do 20 wosobow městno. Hana Šěrakowa posłužowaše kupcow hač do lěta 1967, a činješe to hač do poslednjeho dnja w narodnej drasće. Jeje syn Beno załoži sej małe transportne předewzaće a wožeše spočatnje filmowu techniku, zo móhli sej ludźo na wsach filmy wobhladać. Hač do 1987 wobstarowaše jeho mandźelska Marja póstowe naležnosće za wjesnjanow. 20 lět do toho pak bě Hana Šěrakowa wobchodźik zawrěła. Konsum na to dalše zastaranje přewza a je přechodnje pola Alberta Delenczka mału předawarnju zarjadował.
Poprawom tele dny nihdźe do dowola jězdźić njetrjebaš. Wšako so ...
Wo přichodźe žiwjenja na wsach diskutowali
Njebjelčicy (JK/SN). „Wutworić na wsach přijomne wuměnjenja za dobre a wnučkam kmane žiwjenje, je nadawk za cyłu towaršnosć a rozdźělne politiske nahlady přesahowacy nadawk.“ To rjekny Njebjelčanski wjesnjanosta Tomaš Čornak (CDU) k zahajenju zarjadowanja sakskeje SPD wčera wječor w Njebjelčicach. Zhromadnje ze zapósłancom krajneho sejma Haraldom Baumannom-Hassku stej zapósłanča Europskeho parlamenta, ratarska politikarka Maria Noichl, a kandidatka Budyskeho wokrjesa za Sakski krajny sejm Katrin Michel (wšitcy třo SPD) wo tym rěčałoj, kak hodźeli so na wsach runohódne žiwjenske poměry wutworić. Při tym dźěše politikarjam w prěnim rjedźe wo to, što scyła wupraja zapřijeće wnučkokmanosć a što wočakuja wjesni wobydlerjo za to wot politiki.
Krótkopowěsće (30.07.19)
Kandidatow namjetować
Budyšin. Zwjazkowe předsydstwo Domowiny namołwja sakske župy, towarstwa a zwjazki, zapodać kandidatne namjety za wólby Rady za serbske naležnosće Sakskeje na dobu 2019–2024. Namjety maja hač do 15. awgusta do Domowinskeho zarjeda dóńć. Dalše informacije su wozjewjene na internetnej stronje www.domowina.de/hsb/aktualnosce.
Komolka ministerce Ernst pisała
Choćebuz. Kathleen Komolka ze staršiskeje iniciatiwy za wučbu serbšćiny je braniborsku ministerku za kubłanje, młodźinu a sport Brittu Ernst (SPD) wo wosobinsku rozmołwu do wólbow prosyła. Komolka chce ministerce rozłožić staw peticije wo zachowanju wučby a jej přepodać lisćiny podpismow a komentary. Dalša tema ma być perspektiwa serbskeho šulskeho postajenja.
Nowy šef centruma DEBAG
Frontalnje do štoma zrazył
Awtorka čita
Budyšin. Přichodne zarjadowanje Budyskeho kluba wuchowarjow rěče wotměje so jutře, wutoru, we 18 hodź. w Budyskim hosćencu „Sprjewina pensija“. Tam budźe awtorka Annelies Schulz z hosćom. Wona čita z manuskripta swojeho romana „Holunderzeit“. Hosćo su kaž stajnje lubje witani. Zastup je darmotny.
Na wopyće w měsće
Budyšin. We wobłuku swojeho wólbneho boja chce kandidat SPD za wólby Sakskeho krajneho sejma Harald Baumann-Hasske jutře, wutoru, hromadźe ze zapósłanču Europskeho parlamenta Mariju Noichl Budyšin wopytać. Wot 9.30 do 12.30 hodź. budźetaj wobaj w žónskim centrumje na Karla Marxowej 7. Maria Noichl poda swój wid na aktualne połoženje Europy a wotmołwja tohorunja na prašenja wopytowarjow. Zajimcy su tuž wutrobnje witani. Mjez druhim chcedźa wo tym rěčeć, hač je čłonstwo w EU za ludźi w Hornjej Łužicy scyła wažne abo nic.
Wosebity poskitk zwěrjenca
