Policija (02.03.18)
Přemało widźeli
Rakecy. Hladajo na tuchwilne zmjerzki policisća zawčerawšim w Rakecach kontrolowachu, hač su šoferojo wokna swojeho awta porjadnje wuškrabali. Třo potrjecheni to činili njeběchu. Za to dyrbjachu woni po dźesać eurach zapłaćić. Prjedy hač smědźachu dale jěć, dyrbjachu wokna porjadnje wuškrabać.
Zhromadnje putnikowałoj
Chrósćicy. Kóžde lěto je mać Chróšćanskeje putniskeje hospody Monika Gerdesowa ze swojej přećelku Beatu Gruss po puću na wěstej etapje Jakuboweho puća z cilom Santiago de Compostela. W dźesać lětach stej wot Pólskeje přez Němsku a Francosku hač do Španiskeje dóšłoj, něhdźe 2 000 kilometrow. Wo lońšim puću mjez francoskim Moissac a španiskim Pamplona přednošujetej wonej ze swětłowobrazami jutře, 3. měrca, wot 19.45 hodź. w Chróšćanskej putniskej hospodźe. Hižo w 16 hodź su dźěći přeprošene na serbske dźěćace kino. Zdobom přeproša putniska mać hižo nětko na přidatnje do programa přiwzaty wječor, wusměrjeny cyle na póstny čas, do hospody. Sobotu, 17. měrca, w 19.45 hodź budźe hósć Ludwig Sachsa z Radworja. Pod hesłom „Žórło sylzow“ pokaza wón film a přednošuje wo Israelu.
Archiw a biblioteka přistupnej
Wustawki aktualizowane
Žane jednotne rjadowanje, kak pohrjebnišća a ćěłownje wužiwać
Malešecy (CS/SN). Swoje wustawki za pohrjebnišća na teritoriju gmejny je Malešanska gmejnska rada na swojim zašłym posedźenju aktualizowała. Dokelž běchu popłatki za rowy w lěće 2003 posledni raz postajili, dyrbjachu je nětko aktualnym wobstejnosćam přiměrić. Zdźěla je samo podwojichu, zo bychu znajmjeńša wudawki za reparatury a inwesticije zarunane byli. Radźićeljo njejsu pak jenož wo wysokosći popłatkow diskutowali. Runje tak woni porokowachu, zo njeje žanoho jednotneho rjadowanja za to, wužiwać wšelake pohrjebnišća a ćěłownje. Skónčnje dojednachu so na to, zo měł so do nowych wustawkow wotrězk přiwzać, po kotrymž su nadrobnosće wužiwanja we wjesnych pohrjebnišćowych wustawkach rjadowane. Tomu je dwanaće radźićelow přihłosowało, dwaj běštaj přećiwo tomu a jedyn so hłosa wzda.
Zwiski mjez gmejnomaj pohłubšić
Zawostajenstwo wichora „Friederike“ je hišće na mnohich ...
Krótkopowěsće (02.03.18)
Němska šula ma serbskeho nawodu
Wojerecy. Wyša šula „Na kromje města“ we Wojerecach ma serbskeho nawodu. Kaž město Wojerecy na naprašowanje wobkrući, je tam Joachim Glücklich wot wčerawšeho direktor. Dotalneho nawodu Thomasa Milku běchu před dlěšim časom do kultusoweho ministerstwa w Drježdźanach powołali. Z Hórkow pochadźacy Glücklich je wjacore lěta Ralbičansku wyšu šulu nawjedował a bu 2014 do Zhorjelca přesadźeny.
Wo wupućowarjach zhonili
Slepo. Ze swojeje loni w třećim nakładźe wušłeje knihi „Ufer der Hoffnung“ čitaše Trudla Malinkowa wčera w Slepjanskim Serbskim kulturnym centrumje. Něhdźe 40 wopytowarjow je na zajimawe popołdnjo wo stawiznach wupućowanja Serbow do zamórskich krajow přišło. Tež ze Slepjanskeje kónčiny běchu w 19. lětstotku mnozy wupućowali a w texaskim Serbinje nowu domiznu našli.
Do zawodow pohladnyć
Šulerjo sněhakować nawuknyli
Ze wšědneho šulskeho dnja won do kruteje zymy je sej předwčerawšim 32 šulerjow Radworskeje Serbskeje wyšeje šule „Dr. Marja Grólmusec“ twochnyło, a to na horu do Rugiswalde blisko Neustadta. Dohromady tři dny so tam šulerjo 7. lětnika kóžde lěto w sněhakowanju wuspytuja, při čimž stej jim wučerce ze sněhakowanskim wukubłanjom Diana Wowčerjowa a Corinna Měrćinkowa profesionelnje poboku.
Prěnjej dnjej běchu šulerjo hižo do zymskich prózdnin přewjedli, špatnych sněhowych wuměnjenjow dla pak njemóžachu tam dalši dźeń wostać. To su nětko nachwatali. Wutoru su nětko nimale wšitcy šulerjo hižo samostatnje po horje sněhakowali a na swojej technice filowali. „Tajke dny su šulerjam jara wažna wotměna ke wšědnemu šulskemu dnjej a za zhromadnosć jara wažne. Woni so mjez sobu pohonjeja, so kritizuja a sej na horje pomhaja. Tele nazhonjenja zwonka šulskeho dnja su za šulerjow wulce wužitne“, měni wučerka Diana Wowčerjowa.
Město atraktiwnje wuhotować
Mnohe naprawy we wuwićowym koncepće Wojerec předwidźane
Wojerecy (AK/SN). Město Wojerecy so dołhodobnje na přichod hotuje. Na wutornym posedźenju su měšćanscy radźićeljo dalewjedźenje měšćanskotwarskeho wuwićoweho koncepta wobzamknyli. „Wuslědki wotwažowanja smy swědomiće zadźěłali a mjez druhim na wuwiće sydlišćow dźiwali“, rozłoži nawoda twarskeho wotrjada města Dietmar Wolf. Jako přidatnu naprawu porno naćiskej zapřijachu ponowjenje Łužiskeho naměsta. Dale je předwidźane bywšu sportownju 9. zakładneje šule spotorhać. Tam chce Budyski wokrjes jako nošer powołanskošulskeho centruma Konrada Zusy dalše parkowanske městna za šulerjow a wučerjow připrawić. Po słowach wyšeho měšćanosty Stefana Skory (CDU) chcedźa wobydlerske dźěłarnički zašłych měsacow dale wjesć a runje tak rěčne hodźiny w jednotliwych bydlenskich štwórćach dale poskićeć.
Policija (01.03.18)
Pozdatneho paducha lepili
Wojerecy. Z přikazom zajeća pytaneho muža su policisća zawčerawšim popołdnju při wobchadnej kontroli we Wojerecach lepili. 31lětneho wodźerja wosoboweho awta typa Volvo běchu na Łučanskej dróze zadźerželi. Jako sej jeho personalije bliže wobhladachu a je z přehla- dom w kompjuteru přirunachu, zastojnicy zwěsćichu, zo justica za mužom pyta, dokelž je podhladny ćežkeho padustwa w cwólbje. Muža na to hnydom zajachu a jemu njewočakowanu nowosć zdźělichu.
Čłonojo Bjesadow so zetkaja
Hory (SN). Je hižo z tradiciju, zo přewjeduja serbske Bjesady nalěto dźěłarničku. Wob lěto kóžda z nich samostatnje dźěła. Bjesady wobohaćeja a wožiwjeja serbske žiwjenje we wosadach. Wone organizuja zarjadowanja kaž spěwne wječorki, serbske abo dwurěčne kemše, jutrowne spěwanje abo žiwy adwent. Tak prezentuja a sylnja serbskosć w kónčinach, kotrež su nimale přeněmčene. Bjesady w Bukecach, Hodźiju a Rakecach wobsteja mjeztym wosom lět. Wot 2013 Serbske ewangelske towarstwo jich dźěło podpěruje. Kóžde lěto organizuja dźěłarničku, zo bychu so čłonojo Bjesadow zeznali, sej mysle wuměnjeli a so dale kubłali. Lětsa je prěni raz Bjesada z Horow pola Wojerec hosćićelka.
