Ludźi wobstajnje informować
Chrósćicy (aha/SN). Na štwórtkownej skonstituowacej zhromadźiznje gmejnskeje rady, kotraž wotmě so w gmejnskim a kulturnym centrumje, móžeše Marko Kliman (CDU) po spřisahanju połnoličbne wobdźělenje zwěsćić.
Po wólbach je so zestawa w Chróšćanskej gmejnskej radźe trochu změniła. Mjez nowowuzwolenymi radźićelemi je Dawid Wróbl, kiž serbšćinu dospołnje njewobknježi. Wón pak bě sej hižo na prěnim wuradźowanju z wěcywustojnosću, z přemyslenymi prašenjemi a dobrymi pokiwami swojeje zamołwitosće wědomy. Tak bě sčasami trjeba so problemam dwurěčnje wěnować, štož wjesnjanosta derje wobkedźbowaše. Přiwšěm su kaž dotal na to dźiwali, serbšćinu nałožować.
Premjera wulce poradźena
Na prěni winowy swjedźeń wjele dobreho wothłosa žnjeli
Pěskecy (SN/MWj). Miły lětni wječor, wjele spokojnych wopytowarjow, dujerska hudźba, serbski spěw a wuběrna nalada běchu sobotu přidawki za wulce poradźeny prěni winowy swjedźeń w Pěskecach. Wjace hač 300 wopytowarjow je při tamnišim sportnišću přewšo zabawne hodźiny dožiwiło. Organizatorojo wokoło Křesćana Bejmaka a Bena Buka běchu hromadźe z čłonami Pěskečanskeho sportoweho towarstwa swjedźenišćo z wjele lubosću k detailej přihotowali a mjez druhim z tójšto serbskimi přisłowami w zwisku z winom wupyšili.
Šulerjo so z akciju sami přetrjechili
Sakski akciski dźeń „genialsocial – twoje dźěło přećiwo chudobje“ spočatk julija bě wulki wuspěch, a to z rekordom. 34 000 šulerjow z 287 kubłanišćow je 730 000 eurow nadźěłało.
Budyšin (SN/mwe). „Zajim na našim programje je porno minjenym lětam kaž wočakowane dale přiběrał“, Florian Sievert, programowy sobudźěłaćer „genialsocial“ našemu wječornikej zdźěli. Tuž je so lětsa tež w Hornjej Łužicy wo tójšto wjace šulerjow na akciji wobdźěliło, a to runje tak ze serbskich šulow, kaž z Budyskeho Serbskeho gymnazija. Dorosćacy běchu so w tójšto wjace serbskich rjemjeslniskich firmach, institucijach abo tež domjacnosćach přizjewili, zo bychu tam 2. julija za dobry skutk a něšto mało pjenjez dźěłali. Tež w našej redakciji mějachmy šulerku.
Krótkopowěsće (02.09.19)
Stawizny a podawki 3
Budyšin. Rěčny centrum WITAJ Budyšin je wudał nowu serbsku wučbnicu „Stawizny a podawki 3“. Koncipowany bě material za šulerjow 7. lětnika Serbskeho gymnazija Budyšin. Přełožk je licencne wudaće nakładnistwa Klett. Wučerka na wuměnku Sonja Krječmarjowa je mjenowanu knihu kaž dalšej wučbnicy z toho rjadu zeserbšćiła.
Tkajernja ma přećahnyć
Drjowk. Serbska tkajernja w Drjowku ma po planach města do domu při hrodźe přećahnyć. Tón pak so za muzej njehodźi, rjekny regionalna rěčnica Domowiny Karin Tšukowa, dokelž je tam přemało městna a tež koncept za přetworjenje njepředleži. Jutře chce Drjowkowska měšćanska rada naležnosć rozjimać. Domowina chce wo tym we wuběrku za serbske naležnosće wokrjesa rěčeć.
Ličba wučomnikow stabilna
Kaž w starych časach žnjeli
Nowotwar kubłanišća so poněčim nachila
Slepo (CK/SN). Němsko-serbski šulski kompleks Dr. Marja Grólmusec – wonka je mjeno hižo připrawjene, nutřka na chódbach wuhotuja twarjenje hišće z dwurěčnymi tafličkami. Po třoch lětach twarskeho časa je nowotwar Slepjanskeho šulskeho kompleksa w kónčnej fazy. Hač do kónca oktobra, tak rozłožuje nawoda Slepjanskeho twarskeho zarjada Steffen Seidlich, maja twarske naprawy w cyłku wotzamknjene być. Hač do kónca lěta přewjedu wšitke techniske kontrole, runje tak kaž činja to krajny młodźinski zarjad, hygienowy zarjad a dalše.
Policija (30.08.19)
Pjenjezy kradnyli
Němcy. Do ratarskeho zawoda na Kulowskej dróze w Němcach su so njeznaći w nocy na štwórtk zadobyli. Namócnje wočinichu tam wjacore durje a přepytachu najwšelakoriše kamory. Skónčnje pokradnychu wjace hač tysac eurow. Nimo toho načinichu něhdźe 6 000 eurow wěcneje škody.
Swinjo do awta skočiło
Wojerecy. Na zwjazkowej dróze B 97 bě předwčerawšim wječor 61lětny muž ze swojim Toyotu po puću, jako jemu pola Wojerec blisko noweho kružneho wobchada njejapcy dźiwje swinjo do awta skoči. Šofer so snadnje zrani, je pak so lěkarskeho zastaranja wzdał. Na wosobowym awće nasta něhdźe 8 000 eurow škody.
Z nazhonitymi a nowačkami
Gmejnska rada Pančic-Kukowa skonstituowana
Pančicy-Kukow (SN/MWj). Gmejnska rada Pančicy-Kukow bě wčera jedna z třoch we wobłuku zarjadniskeho zwjazka Při Klóšterskej wodźe, kotraž je so k swojemu konstituowacemu posedźenju zešła. Z dohromady dwanaće radźićelow přisłuša sydom frakciji CDU a pjeć Serbskemu wolerskemu zjednoćenstwu. Wobdźěliło je so wčera dźesać radźićelow, dwaj běštaj zamołwjenaj. Z přitomnych jenož jenički přisahu němsce złoži, wšitcy tamni činjachu to serbsce.
Zaswěća swěčki a smólnicy
Njeswačidło. Woblubowany swjedźeń swětła wotměje so jutře, sobotu, w Njeswačanskim hrodowym parku. Je to mjeztym hižo 24. wječor tajkeho razu. Z něhdźe 3 000 swěčkami a smólnicami wobswětla po ćmičkanju cyły park. We 18.30 hodź. koncertuje Drježdźanska skupina Swing Bell. Po koncerće stej wohnjowa show kaž tež mjeńši wohnjostroj předwidźanej. W hrodowej pincy budu hač do ranja reje a zabawa. Čłonojo kulturneho a domizniskeho towarstwa so na mnohich hosći wjesela.
Modla so kadiš
Budyšin. Lětuša modlitwa kadiš za zamordowanych Budyskeje židowskeje wosady je njedźelu, 1. septembra, w 17 hodź. na židowskim pohrjebnišću na Mužakowskej dróze. Mužojo njech njezabudu na čapku.
Swjeća jubilej wsy
Zubornička. Składnostnje 600lětneho wobstaća Zubornički přewjedu tam jutře wjesny swjedźeń. Wot 10 hodź. změja pisany program za młódšich a staršich. Jedyn z wjerškow budźe w 15 hodź. zetkanje mopedow typa Simson.
Hotuja so na dalše wubědźowanje
Miłoćicy (JK/SN). Po lětušich komunalnych wólbach w meji je so nowowuzwolena Njebjelčanska gmejnska rada wčera w Miłoćicach skonstituowała. Spočatnje wjesnjanosta Tomaš Čornak (CDU) radźićelow spřisaha. Wšitcy činjachu to w serbšćinje z dodawkom „Z Božej pomocu“. Mjez nowymi dwanaće radźićelemi su tři žony.
Jako prěnje mějachu wuzwolić zastupowaceho wjesnjanostu. Pěskečan Křesćan Žur, kiž bě zastojnstwo wjele lět wukonjał, njebě k wólbam hižo nastupił. CDU jako najsylniša frakcija w parlamenće namjetowaše Tomaša Klara. Dokelž dalšich namjetow njebě, wuzwolichu jeho za přichodneho zastupowaceho wjesnjanostu gmejny Njebjelčicy. Dale wuzwolichu radźićeljo pjećoch ze swojich rjadow do hłowneho a šesćoch do techniskeho wuběrka. Tež dweju zastupjerjow gmejny do zhromadźizny zarjadniskeho zwjazka Při Klóšterskej wodźe su wčera wuzwolili.
