Policija (02.01.18)

Dienstag, 02. Januar 2018 geschrieben von:

Woheń wulku škodu načinił

Běła Woda. Wšo druhe hač měrliwy spočatk noweho lěta dožiwichu wohnjowi wobornicy wčera rano w Běłej Wodźe. Krótko po 6 hodź. wołachu jich k hašenju wohenja na Jabłóńskim puću. Tam bě so z dotal njeznateje přičiny najprjedy nakładowane drjewo palić započało. Pozdźišo­ přeskočichu płomjenja na susodnu garažu. Nimo Běłowodźanskich wobornikow běchu tohorunja jich kolegojo z Wuskidźe zasadźeni. Garaža so do­społnje wotpali, runje tak dwě jězdźi­dle w njej. Wobornikam drje so poradźi zadźěwać, zo płomjenja na susodny by­dlenski dom přeskoča. Nastata horcota pak wuskutkowa tež na nim wěcnu škodu. Kelko to dokładnje bě, njeje hišće zwěsćene. Na zbožo so nichtó zranił njeje.­ Fachowc ma nětko přičiny wohenja přepytować.­ Najskerje bě so silwesterski praskotak do drjewa zabłudźił. Dalše pře­pytowanja je kriminalna policija pře­wzała.

Kamjenc (SN/MWj). Předsydstwo Kamjenskeje Černobylskeje iniciatiwy je na posedźenju předewzaća za dźěćacu akciju 2018 wobzamknyło. Dokelž su w Běłoruskej hišće mnohe dźěći wot wuskutkow atomarneje katastrofy potrjechene, chcedźa klětu znowa skupinu na wočerstwjenski přebytk do Kamjenca přeprosyć. Za to pytaja nětko hóstnych staršich, kotřiž móhli w lěću jedne abo dwě dźěsći w starobje dźewjeć do 13 lět tři tydźenje w swójbje hospodować. Mali hosćo přijědu po wšěm zdaću 4. junija. Zaměr je, znajmjeńša za 15 dźěći hóstnych staršich namakać. Wodnjo staraja so wo nje w towarstwowym domje na Fichtowej, wječor a kónc tydźenja su wone w swójbach. Zajimcy měli so najpozdźišo hač do kónca januara pod telefonowym čisłom 03578/ 304 404 přizjewić.

Nimo toho přebywa w awgusće dwaceći na diabetes schorjenych běłoruskich dźěći ze štyrjomi přewodźerjemi w towarstwowym domje Kamjenskeje iniciatiwy. Tam so wone wočerstwja a nawuknu, kak dyrbja ze swojej chorosću wobchadźeć. Tónle běłorusko-němski projekt je po wšej Němskej jónkrótny.

Hudźba a meditacija w cyrkwi

Dienstag, 02. Januar 2018 geschrieben von:

Mjeztym 14. raz je Baćońska wosada posledni dźeń lěta 2017 na silwesterski koncert do swojeje wosadneje cyrkwje Jězusoweje wutroby přeprosyła. Wopytowarjow w nimale połnje wobsadźenym Božim domje witaše wosadny farar Gerat Wornar. Wosebitosć kóždolětneho wječora je, zo jón lajscy wuměłcy na wysokim niwowje wuhotuja. Tak je Alexander Pólk (naprawo) na pišćelach twórby Bjarnata Krawca, Jana Pawoła Nagela a dalšich komponistow hrał. Jemu asistěrowała je Marka Pólkowa (srjedźa). Jako solistka wustupi Hilža Zyndźina (nalěwo). Terezija Kubašec (njeje na wobrazu) přednjese někotre k rozmyslowanju pohnuwace meditaciske teksty. Foto: Feliks Haza

Trjebaja wjace městna za běrowy

Dienstag, 02. Januar 2018 geschrieben von:

Zarjadnistwo města Budyšina dźěła hižo­ dlěši čas pod přewuskimi rumnostnymi wuměnjenjemi. To ma so w lěće 2018 změnić, štož pak so wšitkim­ w měšćanskej radźe njelubi.

Budyšin (CK/SN). Za 170 000 eurow chce město Budyšin twarjenje na Kotołskej tak přetwarić, zo móža tam běrowy zaměstnić. Tuchwilu wužiwaja dom za registraturu. W twarjenjach měšćanskeho zarjadnistwa je wokomiknje 177 dźěłowych a 13 wukubłanskich městnow. Po słowach­ Christopha Kaspera z wobstejacymi kapacitami móžno njeje, wšitkim žadanjam dźěłoweho a strowotniskeho škita wotpowědować. Nawoda hłowneho zarjada měšćanskeho zarjadnistwa skedźbnja mjez druhim na zakonske postajenja k škitej přichodnych maćerjow.

Chór Meja zaso koncertował

Dienstag, 02. Januar 2018 geschrieben von:

Tradicionalne pohodowne zarjadowanje dobry wothłós žnjało

Radwor (CRM/SN). Pisany a wotměnjawy hodowny koncert poskići minjeny pjatk chór Meja na Radworskej wjesnej žurli. Charakteristiske za tele tradicionalne zarjadowanje najstaršeho serbskeho spěwneho ćělesa je, zo njesteja na jewišću jenož­ čłonojo chóra, ale tež dalši kulturnje aktiwni. Tónraz překwapichu šulerjo z někotrymi basnjemi. A činjachu to k wjeselu připosłucharstwa z hłowy, štož jim publikum z wosebitym přikleskom honorowaše.

Zajima zbudźi tohorunja pišćałkowe duwo ze Sofiju Hančikec a Hanu Nukec. Na gitarje hraješe Milena Wowčerjec. Tak so zdobom na to pokaza, kak wažnu rólu za wuměłski dorost hraje tu wokrjesna hudźbna šula, w kotrejž mali a trochu wjetši wuměłcy na instrumentach hrać wuknu.

Wosebity hósć wječora bě Měrćin Weclich. Jako jara nazhonity entertainer zaspěwa wón někotre ze swojich woblubowanych songow, zdobom so Kukowčan sam instrumentalnje přewodźeše. Tak zdoby sej młodych kaž tež staršich wopytowarjow za sebje a swoje wuměłstwo.

Krótkopowěsće (02.01.18)

Dienstag, 02. Januar 2018 geschrieben von:

Lětsa chcedźa dołh wotpłaćić

Hory. Gmejna Halštrowska Hola dyrbi lutować. Loni drje je 700 000 eurow dołha wotbyła, přiwšěm ju wotpłaćowanja poćežuja. Zo by Vattenfallej přewjele płaćene dawki wróćić móhła, dyrbješe gmejna před lětomaj 1,7 milionow eurow kredita wzać, z kotrymž so hišće bědźa, praji wjesnjanosta Dietmar Koark (CDU). Lětsa chcedźa zbytk dołha wotpłaćić.

Zarjadnistwo zjednoćene

Kamjenica/Budyšin. Z nowym lětom je Sakski krajny zarjad za šule a kubłanje swoje dźěło zahajił. Wyši krajny zarjad zjednoća dotalne Sakske kubłanske agentury, mjez nimi Budysku. Nawod zarjada ze sydłom w Kamjenicy přewozmje dotalny direktor kubłanskeje agentury Ralf Berger. Jeje dotalne stejnišća, tak tež Budyske, dale wobsteja. Zjednoćić ma so kubłanske zarjadnistwo.

Wjelk a pos so dale měšatej

Zběraja pjenjezy za chude dźěći

Freitag, 29. Dezember 2017 geschrieben von:
Sobu jako prěni běchu hwězdni spěwarjo Wojerowskeje katolskeje wosady swjateje swójby srjedu w radnicy Wojerowskeho wyšeho měšćanostu Stefana Skoru (CDU) wopytali a sej pjenježne dary wuprosyli. Farar Peter Paul Gregor je spěwarjow přewodźał. Lětsa zběraja woni pjenjezy za chude dźěći w Indiskej. „Z pomocu darow chcemy tam šule a projekty podpěrać“, farar Gregor podšmórny. Foto: Martina Arlt

Policija (29.12.17)

Freitag, 29. Dezember 2017 geschrieben von:

Špihele awtow wobškodźeli

Wojerecy. Po hodownych swjatych dnjach dožiwichu wjacori wobsedźerjo wosobowych awtow njelubu překwapjenku. Njeznaći běchu na wšelakich městnach we Wojerecach kaž tež w susodnym Ćisku a w bliskich Wulkich Ždźarach wot awtow škleńcu wonkownych špihelow wotstronili. Potrjechene běchu jězdźidła typow Mercedes Benz, Škoda a BMW. Dokładny wobjim škody drje hišće zwěsćić njemóžachu, po wšěm zdaću pak jedna so wo znajmjeńša 2 000 eurow. Zo móhli skućićelow namakać, prosy policija wobydlerjow wo pomoc. Štó je we Wojerecach na Schweitzerowej, Lilienthalowej a Armstrongowej kaž tež w Ćisku a we Wulkich Ždźarach podhladne jězdźi­dła abo wosoby widźał? Pokiwy přijimuja pod telefonowym čisłom 03571/ 46 50.

Partnerske zrěčenje ze šulu podpisali

Freitag, 29. Dezember 2017 geschrieben von:

Posledni šulski dźeń do hód zetkachu so wuknjacy­ Kulowskeje wyšeje šule „Korla Awgust Kocor“ po třećej hodźinje w sportowej hali, a to k tradicionalnemu dohodownemu spěwanju. Lětsa pak bě wšo tróšku hinaše. Po tym zo instrumentalna skupina zarjadowanje zahaji, podpisachu nawodnica kubłanišća Ines Lešowa, zamołwići Drježdźanskeje Industrijneje a wikowanskeje komory (IHK) a zastupjerjo zawodow partnerske zrěčenje. Jednaćel kubłanskeho wobłuka IHK Torsten Köhler zwurazni swoje wjeselo, zo Kulowske kubłanišćo ze zawodami a firmami styki wudźeržuje. Su to energijuzastaranske předewzaće Čorny Halštrow, Kulowska meblownja Maja, twornja za produkciju klimowych kompresorow w Nadróznej Hrabowce a kupnica Netto. Zaměr partnerskeho zrěčenja je, zo so Kulowscy šulerjo w mjenowanych zawodach za wukubłanskimi městnami rozhladuja. Kulowski měšćanosta Markus Posch (CDU), kiž bě hósć na hodownym spěwanju, aktiwity šule wita a je podpěruje.

Awto najwjetša inwesticija była

Freitag, 29. Dezember 2017 geschrieben von:

Pančicy-Kukow (SN/MWj). Dwaj podawkaj běštej w lěće 2017 za gmejnu Pančicy-Kukow wosebje wurjadnej. Tak su jako najwjetšu inwesticiju lěta kupili nowe wohnjowoborne awto typa TLF 3 000, rjekny wjesnjanosta Markus Kreuz (CDU) na posedźenju gmejnskeje rady w swojej lětnej bilancy. Za nowe awto wuda gmejna něhdźe 250 000 eurow, z toho dósta 117 000 eurow spěchowane. Wosebitosć je, zo je to prěnje nowe hašenske jězdźi­dło za Pančičansko-Kukowsku woboru po přewróće, kotrež gmejnje słuša. Dotalne awto typa Iveco běchu spočatk 90tych lět wot katastrofoweho škita wo­krjesa přewzali, wone tež dźensa hišće Zwjazkej słuša. Swój W50 běchu něhdźe w samsnym času trjebany wot Wojerowskeje wobory přewzali.

Tamny wurjadny podawk bě, jako schwalichu gmejnje Pančicy-Kukow wopon. Tajki dotal scyła hišće njemějachu.

Po lońšim prěnim wotrězku su lětsa druhi wotrězk puća Při Młónčiku dotwarili. Dalše twarnišćo mějachu na Kimbarku, hdźež su prěni twarski wotrězk zwoprawdźili. W zwisku z twarom noweho mosta nad Klóšterskej wodu so poradźi, dźěl Póstoweho puća asfaltować.

Serbska debata

Neuheiten LND