Ćeknyć ničo njepomhało

Běła Woda. Kedźbliwy wobydler je za­wčerawšim w Běłej Wodźe pomhał, ćeknjeneho zawinowarja wobchadneho njezboža lepić. Wón bě wobkedźbował, kak wodźer Opela do parkowaceho Renaulta zajědźe, skrótka wulěze a so na to zaso wotsali. Swědk pak awtowe čisło zawinowarja policiji zdźěli. Zastojnicy jeho tež spěšnje lepichu a zwěsćichu na jeho awće škody, kotrež wopisanju wobydlerja wotpowědowachu.

Muchi stejachu zaso raz w srjedźišću posedźenja Radworskeje gmejnskeje rady. Wobydlerjo Drobow pola Minakała, kotrymž su wone mjeztym hotowa kwakla, nadźijeja so pomocy gmejny.

Radwor (SN/MkWj). Njebě to prěni króć, zo so wobydlerjo Drobow a wokolnych wsow hóršachu, zo so z muchami bědźa, kotrež so w rojach jewja. Sčasami je tak zlě, zo njemóžeš wonka ničo wjace jěsć a pić, dokelž su wone faktisce wšudźe. Tež w domach muchi na sćěnach a wjerchach z hromadami sydaja. Najwjetši problem pak je, zo poprawom nichtó tak prawje­ njewě, zwotkel wone su. Hižo dlěši čas tukaja ludźo na recyclingowu připrawu w Drobach.

Město Wojerecy zdźěłuje strategijowu papjeru a projektnu skicu

Wojerecy (AK/SN). Na strukturnej změnje we Łužicy ma so město Wojerecy konkretnje a dołhodobnje wobdźělić. To podšmórny wyši měšćanosta Stefan Skora (CDU) na wčerawšim posedźenju měšćanskeje rady. „Tuchwilu nastawatej strategijowa papjera kaž tež projektna skica z cyle konkretnymi naprawami“, wón rjekny. Wšitke zawody z měšćanskim wobdźělenjom su zapřijate.

„Ćežišća strategijoweje papjery su zapłaćomne bydlenja, strowota a lěkarske zastaranje, kubłanje a turizm“, Stefan Skora rozłoži. Po jeho słowach chcedźa při kóždej naprawje připisać, štó je jeje nošer, štó su partnerojo, kelko wona płaći a hač do hdy ma so zwoprawdźić. Po móžnosći na přichodnym posedźenju měšćanskeje rady chce wyši měšćanosta strategijowu papjeru a projektnu skicu radźićelam předstajić. Tak móhli woni potom hižo zasadnje wo nimaj rozsudźić. Potom chce Skora strategijowu papjeru zamołwitym w Drježdźanskej statnej kencliji přepodać.

Róžant (jh/SN). 17 porow pěstowarskich dźěći, šulerjow a młodźiny w starobje třoch do 17 lět – wšitke holcy w serbskej narodnej drasće – je so minjenu sobotu w Róžeńće na lětušim mejemjetanju, kotrež­ měli poprawom mejudelebraće mjenować, wobdźěliło.

Kaž hižo loni so Róžeńčanscy mužojo rozsudźichu meju ze žerdźemi zaso pomału dele wzać, zo njeby so wona wo­spjet złamała, a zo njeby so metalowa rynka wěnca wobškodźiła. Wšo to bě so jim minjene lěta mjenujcy někotre razy stało, dokelž padnje meja w hnadownym měsće při klasiskim mejemjetanju na twjerdy puć a na kromu granitoweho chódnika. Dalša wosebitostka lětsa bě, zo dyrbjachu tři hodźiny do mejemjetanja we wokolnych wsach a w Budyšinje wo pomoc prosyć, dokelž bě jedyn z rej­warjow-młodostnych krótkodobnje zastupny lisćik za pokalne finale RB Lipsk – FC Bayern Mnichow dóstał a do Berlina jěł. Na zbožo Budyšan Filip Budar při­praji a tak wodźělenje rejwarki zaruči. Tež z druhich wokolnych wsow a samo z Drježdźan běchu holcy a hólcy Róžeńčanam wupomhali a so wo nahladnu ličbu­ porow postarali.