Lěpše wuměnjenja sportowcam
Kulowske sportowe towarstwo zwoprawdźa nětko projekt, za kotryž běchu ideju hižo před pjeć lětami zrodźili. Za njón su wčera zakładny kamjeń połožili.
Kulow (AK/SN). Hač do kónca lěta natwari Kulowske sportowe towarstwo Módro-běli nowe socialne twarjenje bjez barjerow. W nim budu nuzniki, płokarnja a sušernja za trikoty kaž tež skład za bule a sportowe nastroje. Małe pódlanske twarjenje budźe dźěłarnja. „Nowotwar je dawno trěbny“, podšmórny twarski nawoda Udo Popjela wčera při połoženju zakładneho kamjenja. Stare twarjenje pochadźa z 1950tych lět. W nim běchu nuzniki kaž tež tepjenje často skóncowane. Wopytowarjo dyrbjachu zwjetša nuzniki towarstwoweho hosćenca wužiwać. Popjela je studowany twarski inženjer a bě wot 1994 do 2014 Kulowski měšćanosta. W tym času je twar towarstwoweho domu 1998, sportnišća z wobswětlenjom 2006 a přihladowarskeje tribuny 2011 sobu přewodźał. Dźensa angažuje so čestnohamtsce jako twarski nawoda, tak zo towarstwu žane wudawki za inženjerske dźěła njenastanu.
Rybarsku šulu chcedźa ponowić
Planowana twarska naprawa bywšeho kubła ma tež politisku přičinu
Rakecy (UM/SN). Saksku Krajnu rybarsku šulu w Rakecach chcedźa wot nalěća 2021 wobšěrnje saněrować. Zarjadnišćo w twarskim kompleksu bywšeho Rakečanskeho knježeho kubła ma po informacijach Statneho zawoda imobilijowy a twarski management (SIB) tójšto njedostatkow. Serbske Nowiny projekt předstajeja.
Kotry wuznam ma šula?
Z modernej techniku so zeznajomili
Ze zjawnej zahrodu šulerjam wobswět serbsce zbližić (3)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim lětnim serialu Serbskich Nowin wam projekty předstajamy.
Při Budyskim Mikławšku je zjawna zelowa zahroda, hdźež móže kóždy, kiž chce, swoje rostliny zesadźeć a zela šćipać. Je to idyliski róžk stareho města, hdźež namakaš měr w přirodźe. Runje tajkele něšto přeje sej tež Robert Krawc z Budyšina. We wobłuku wubědźowanja „Čiń sobu!“ doby před krótkim myto, tak zo móže swój projekt zwoprawdźić. „Před dlěšim časom hižo zwěsćich, zo maš w Budyšinje lědma hišće šulske zahrody, hdźež šulerjo rostliny sadźeja a so wo nje staraja“, wón rozprawja. „Jako pytaše mój přećel Florian Kaulfürst njedawno zahrodku w měsće, mějachmoj ideju, zhromadnje natwarić zjawnu zahrodu, kotraž ma być dwurěčnje popisana.“
Krótkopowěsće (24.07.19)
Twarske dźěła so dlija
Pančicy-Kukow. Hinak hač spočatnje planowane njebudźe pjekarnja w klóštrje Marijinej hwězdźe w Pančicach-Kukowje hač do kónca awgusta hotowa. Kaž zdźěli dźěłarnja za zbrašenych, ke kotrejž pjekarnja słuša, so twarske dźěła dlija. Tuchwilu njemóža hišće rjec, kak dołho dźěła w pjekarni hišće traja. To samsne přitrjechi za kofejownju a přechod do klóšterskeje zahrody.
We warjenskej bitwje
Mainz. We warjenskej show ZDF „Die Küchenschlacht“ je tón tydźeń Lubina Ješkec mjez mjezy-finalistami. Póndźelu přeswědči wona ze serbskej kwasnej poliwku a twarohowymi kulkami, wčera z aprikozowym tykancom a waflu. Najpozdźišo pjatk budźe jasne, hač zaćehnje z Chelna pochadźaca Serbowka a w Mnichowje skutkowaca kosmetikarka do finala najlěpšich šěsć hobbyjowych kucharjow.
Skóržba wotpokazana
Policija (23.07.19)
Transporter pokradnyli
Wojerecy. Tójšto škody načinichu njeznaći minjene dny na Radskej dróze we Wojerecach. Kaž bu hakle zawčerawšim znate, pokradnychu hižo w nocy na 11. julij transporter typa Mercedes Sprinter. Tři lěta stare jězdźidło bě něhdźe 30 000 eurow hódne. Nakładowane měješe wone wjacore kašćiki ze specialnym gratom w cyłku něhdźe 20 000 eurow. Za awtom z čisłom F-BG 2253 policija nětko mjezynarodnje pyta.
Motorscy zetkaja so při jězoru
Swobodne dźěłowe městno
Smječkecy. Za hladanje a spěchowanje ludźi ze zbrašenjemi pytaja w Smječkečanskim Domje swjateho Jana fachowu móc w hladanskej słužbje. Městno z dźěłowym časom 30 hodźin wob tydźeń ma so 1. septembra 2019 wobsadźić. Nadrobniše informacije k žadanjam na městno, k dźěłowemu wobłukej a tarifowym postajenjam namakaja zajimcy internetnje na stronje www.christliches-sozialwerk-ggmbh.de.
Poradźuja tež w prózdninach
Budyšin. Powołanski informaciski centrum Budyskeje agentury za dźěło skedźbnja na to, zo tam tež za čas prózdnin wo wukubłanskich a studijnych móžnosćach poradźuja. Wšelake informaciske poskitki móža zajimcy bjez přizjewjenja wužiwać. Najwšelakoriše podłožki, informaciske mapy a filmy posrědkuja dohlad do wukubłanskich a studijnych móžnosćow. Sobudźěłaćerjo rady dale pomhaja. Informaciski centrum na Nowosólskej je přistupny wot póndźele do srjedy stajnje wot 8 do 16 hodź., štwórtk wot 8 do 18 hodź. a pjatk wot 8 do 12 hodź.
Z kameru sej město wotkryli
Kamjenc (Has/SN). Kak su něhdy fotografowali? Kak funguje dźěrkata kamera? Pod hesłom „Čiń sej wobraz wo zašłosći!“ zaběrachu so w Kamjencu w prěnimaj prózdninskimaj tydźenjomaj dźěći a młodostni w starobje dźesać do 16 lět z fotografiju. Drježdźanskaj wuměłcaj Alexandra Wegbahn a Michael Melerski projekt w zhromadnym dźěle z Měšćanskej dźěłarnju Kamjenc, z Dźěćacym škitnym zwjazkom a z Muzejom zapadneje Łužicy Kamjenc nawjedowaštaj. W tym času sej wobdźělnicy město a jeho stawizny z fotoaparatom wotkrychu, wuhotowachu sej labor a twarjachu tak mjenowane dźěrkate kamery. Što je při tym wšo nastało, móža sej zajimcy wot jutřišeho hač do kónca awgusta we wustajeńcy na dworje Kamjenskeje radnicy wobhladać. Přehladku su dźensa popołdnju wotewrěli. Dźěći a młodostni so wězo nadźijeja, zo wobydlerjo města a jich hosćo w prawje bohatej ličbje wustajeńcu wopytaja.
Nahladna kupnica za mału wjes
Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo zetkawachu a rady pobjesadowachu. W našej lětnjej seriji na něhdyše wjesne wobchody dopominamy.
Dźensa: Smjerdźaca (7)
„Korčmu su zawrěli a tak móžachu so ludźo jenož hišće w swojej dobrej stwě doma abo na tehdyšim gmejnskim zarjedźe schadźować“, dopomina so něhdyša wjesnjanostka Smjerdźaceje a Łazka Marja Krawcowa na połoženje w Smjerdźacej spočatk 1960tych lět. Runočasnje wona tehdy wobžarowaše, zo njebě we wsy za ludnosć žana móžnosć, nakupować twory wšědneje potrjeby. Na jeje iniciatiwu sej tohodla w lětomaj 1962/1963 rjany kulturny dom ze žurlu a dalšimi mjeńšimi rumnosćemi natwarichu. Žurla bě zdobom nastork, załožić mjeztym we wjele krajach swěta znatu rejwansku skupinu. Nahladny objekt płaćeše tehdy 87 000 hriwnow. W dobrowólnym dźěle nadźěłachu z toho 45 000 hriwnow. Do domu zaměstnichu tohorunja konsumowu předawarnju.
