Klětu wuknjacy přećahnu
Twar Slepjanskeho šulskeho kompleksa w časowym a pjenježnym ramiku
Slepo (AK/SN). Na dnju wotewrjeneho twarnišća su sej sobotu w Slepom mnozy zajimcy nastawacy němsko-serbski šulski centrum wobhladali. „Smy w časowym a pjenježnym ramiku“, zjima Annett Dreißig, kotraž je ze stron gmejny za projekt zamołwita.
Nowe kubłanišćo nastawa na 54 000 kwadratnych metrach. 80 procentow wšěch dźěłow dyrbjachu po wšej Europje wupisać. Runočasnje k nutřkownemu wuhotowanju zakładneje a wyšeje šule kaž tež horta, biblioteki a sportownje nastawaja wonkowne připrawy. Tak změje sportnišćo 400metrowskej běhanskej čarje, připrawje za kulostork a dalokoskok, wolejbulnišćo a gymnastisku łuku. 12. decembra ma šulski centrum hotowy być. Potom měsac dołho wšitko přepruwuja. W zymskich prózdninach 2020 wuknjacy zakładneje a wyšeje šule přećahnu.
Při šuli maja nowe hrajkanišćo
Minjeny pjatk připołdnju njeje so jenož nimale wšěch 118 šulerjow Ralbičanskeje Serbskeje zakładneje šule na přestawkowym naměsće ze swojimi wučerkami zetkało. Tam běchu tež wjacori starši, sponsorojo a někotři zastupjerjo wokolnych zawodow.
Ralbicy (aha/SN). Wulki bě zajim za přepodaće nowowuhotowaneho hrajkanišća. Nawodnica zakładneje šule Andrea Liehnowa dopomni na to, zo bě na samsnym městnje před poł lětom jeničce pěskowa jama. Zo móhli městnosć za šulerjow wotpowědnje přihotować, pak njebě w gmejnskej kasy dosć pjenjez. Tuž wučerjo problem hinak rozrisachu. Woni rozsudźichu so za běh sponsorow, štož bě jónkrótne emocionalne dožiwjenje zhromadnosće. Předwidźany projekt přinošowaše tohorunja k skrućenju sebjewědomja a identifikacije šulerjow.
W Kulowje je wčera Zhorjelski biskop Wolfgang Ipolt 34 młodostnych a ...
Krótkopowěsće (06.05.19)
Premjera na mejskim nyšporje
Róžant. Mnozy wěriwi su wčera mejski nyšpor Towarstwa Cyrila a Metoda z kapłanom Jensom Bulišom w Róžeńčanskej cyrkwi dožiwili. Wobrubił je jón muski chór Delany pod nawodom Pawoła Šołty-Kulowskeho ze serbskimi a łaćonskimi kěrlušemi. Premjeru měješe choral „Panis angelicus“ z pišćelowym přewodom Chrystofa Mikławška.
Seniorojo SŠT we Wendlandźe
Budyšin. Seniorojo Serbskeho šulskeho towarstwa podachu so wčera na swoju lětušu kubłansku jězbu, a to do Wendlanda. Z přewodom muzejownika Wernera Měškanka z Choćebuskeho Serbskeho muzeja chce sej 44 čłonow SŠT a dalšich zajimcow zbližić něhdyšu słowjansku kónčinu njedaloko Hannovera a so zaběrać z Drjewjanskimi Słowjanami.
Panceraj we wobsydstwje města
Dobyćerjo jutrowneje křižowki
Policija (03.05.19)
Drohe koleso pokradnyli
Wojerecy. Runje zawčerawšim na dnju dźěła njejsu paduši we Wojerecach wotpočnyli, ale so na Drježdźanskej dróze namócnje do kólnje zadobyli. Z njeje pokradnychu chětro drohe koleso, nic pak dospołne, kaž policajska direkcija informuje. Zadnje koleso woni mjenujcy wušrubowachu a w kólni wostajichu. Za to wot dalšeho koła zadnje koleso wutwarichu a do pokradnjeneho mountainbika zatwarichu. Čehodla su tak postupowali, je policiji hódančko. Jasne pak je, zo bě hórske koleso typa Canyon něhdźe 1 300 eurow hódne. Policija nětko za nim pyta.
Koncertuja w cyrkwi
Budyšin. Wosebity koncert z Lipšćanskim synagogalnym chórom a Komornym chórom Josquin des Préz, organizowany wot Rotary-kluba Bautzen-Budyšin, je jutře, sobotu, we 18 hodź. w Budyskej tachantskej cyrkwi. Zaklinči Cantate L’Adonai, w kotrejž interpretuja spěwarjo starozakonske psalmy w židowskej a křesćanskej tradiciji. Cyłkowny nawod ma dirigent Ludwig Böhme, spěwa tenor Falk Hoffmann a na pišćelach hraje Daniel Beilschmidt. Kmótřistwo přewzał je sakski ministerski prezident Michael Kretschmer (CDU). Zastup je darmotny, proša pak wo kolektu, kotruž chcedźa za ewangelske a katolske młodźinske dźěło w Budyšinje wužiwać.
Poswjeća nowe awto wobory
Njebjelčicy. Wšitcy wobydlerjo Njebjelčic su jutře, sobotu, přeprošeni na poswjećenje noweho wohnjowoborneho jězdźidła. Zajimcy zetkaja so w 14.30 hodź. při wohnjowobornej gratowni. W 15 hodź. chcedźa awto poswjećić. Potom poskića kofej a tykanc.
Park rjedźić
Wuměna šulerjow traje 40 lět
Ralbicy (SN). 21 šulerkow a šulerjow, jich wučerce a nawodu šule z čěskeho Mělníka witaja póndźelu, 6. meje, na tradicionelnu wuměnu do Ralbic. Prěnja stacija budźe Budyšin, hdźež wopytaja zajimawostki města. Po tym podadźa so do Małowjelkowskeho prazwěrjenca. Nawječor witaja jich hóstne swójby 5. lětnika Serbskeje wyšeje šule Ralbicy ze zhromadnej wječerju w šuli. W běhu wuměny su mjez druhim planowane wopyt zabawjenskeho parka w Einsiedelu, zhromadne paslenje a zeznaće. Srjedu podadźa so čěscy hosćo ze serbskimi šulerjemi a wučerjemi do Mělníka. Štwórtk wopytaja zhromadnje Prahu, pjatk dopołdnja je ekskursija po Mělníku planowana. Nawječor so Ralbičanscy šulerjo nawróća.
Šulerska wuměna mjez Serbskej wyšej šulu Ralbicy a Zakładnej šulu Jungmannovy sady Mělník traje mjeztym dlěje hač štyrceći lět.
Statok z nowym jěchanišćom
Helmecy w Jitku wosebitu konjacu pokazku poskićili
Jitk (JK/SN). Po dobrej tradiciji su Helmecy w Jitku na prěnjomejskim dnju wrota swojeho burskeho a jěchanskeho dwora šěroko wotewrěli. Najebać chłódne wjedro a mjeńše zliwki je so nahladna ličba zajimcow na dworje a wokoło njeho rozhladowała. Wosebje swójby z dźěćimi wužiwachu składnosć, so ze žiwjenjom a wosebitosćemi na burskim statoku zeznajomić.
Za wulkich a małych wopytowarjow mějachu Helmecy a jich pomocnicy wšelke zajimawosće spřihotowane. Dźěći móžachu sej domjacy skót tež wjetšeho kalibra raz bliže wobhladać a so při molowanju a paslenju kreatiwnje wuspytać. Wosebity powabk pak bě, jěchać na wulkim šakatym konju abo na ponyju. Tež skakanje w synje bě wužadanje.
