Překwapjaca mysl
Za „dźeń serbskeho witanja“
„Serbsko-němska mjezsobnosć w Budyšinje“ rěkaše titl idejoweje konferency minjeny pjatk w Kamjentnym domje sprjewineho města. Podate nastorki zjimaja do kataloga, kotryž ma skutkowanje dźěłoweho kruha za serbske naležnosće a kaž tež měšćanskeje rady w nowej wólbnej periodźe wopłodźeć.
Budyšin (SN/at). Impulsy za lěpšu mjezsobnosć je sej dr. Susanne Hozyna, měšćanska radźićelka w frakciji CDU a rěčnica dźěłoweho kruha za serbske naležnosće města Budyšina, na spočatku nimale třihodźinskeje wuměny myslow přała. A někotre zajimawe su wobdźělnicy za třomi blidami zrodźili. Woni diskutowachu w kołach „komunalne zarjadnistwo a politika“, „wobydlerki a wobydlerjo“ kaž tež „kultura a kreatiwne hospodarstwo“. Mjez přitomnymi běchu tež wyši měšćanosta Alexander Ahrens (SPD), měšćanostaj dr. Robert Böhmer a Juliane Naumann, předsyda Domowiny Dawid Statnik, załožbowy direktor Jan Budar, měšćanscy radźićeljo, zastupjerjo měšćanskich zawodow towarstwow a serbskich zarjadnišćow.
Krótkopowěsće (29.10.18)
FDP z nowym předsydstwom
Kamjenc. Budyski wokrjesny zwjazk FDP je zašły pjatk na stronskim zjězdźe w Kamjencu nowe předsydstwo wuzwolił. Nowy a bywši předsyda je Budyski měšćanski radźićel Mike Hauschild. Za jeho naměstnika wuzwolichu Thomasa Kunza a za pokładnika Holgera Johnu. Dalši čłonojo su Sirko Rosenberg, Stefan Richter, Katharina Gerber, Reiner Deutschmann, Matthias Schniebel a Martin Nedo.
IG metal konferencu přewjedła
Kamjenc. Něhdźe 60 aktiwnych čłonow dźěłarnistwa IG metal z najwšelakorišich zawodow je so sobotu na konferency w Kamjencu wobdźěliło. Na diskusijach a forumach woni zhonichu, što sobustawow dźěłarnistwa zajimuje. Zdobom wuwiwachu plany, kak móhli so přichodnje zaměrnišo za dobre tarifowe zrěčenja zasadźić a dobrych zawodnych radźićelow zdobyć.
W Pólskej čitałoj
Lisćiki za schadźowanku
Budyšin. Předań zastupnych lisćikow za 144. schadźowanku, kotraž budźe 24. nowembra w Budyskim Němsko-Serbskim ludowym dźiwadle, zahaji so štwórtk, 1. nowembra, při dźiwadłowej pokładni. Internetne skazanki su tohorunja móžne.
Čita z noweje knihi
Ćisk. Na němsko-serbski literarno- a hudźbny wječor přeproša Ćišćanske kulturne towarstwo jutře, sobotu, wot 17.30 hodź. na Kasperec dožiwjenski statok. Doris Kasper čita tam ze swojeje noweje knihi „Kuzło dejmantneje soniny“ a přeradźi tajny recept, kak móže čłowjek zbožowny być. Spěwna skupina Wólbernosće wječor hudźbnje wobrubi. Zastup je darmotny.
Kabaret dožiwić
Kamjenc. „Darmotne piwo budźe dróše“ rěka program kabareta „Die Herkuleskeule“ njedźelu, 28. oktobra, w 16 hodź. w Kamjenskim hotelu Město Drježdźany. Za njón maja hišće zastupne lisćiki, kotrež dóstanu zajimcy za 23,50 eurow direktnje w hotelu.
Nyšpor hońtwjerjow a hajnikow
Pokazaja přehladku nukli a pjerizny
Ponowjena dróha přepodata
Rakojdy (CS/SN). Najebać nazymske temperatury knježeše w Malešanskej gmejnje wčera wosebite wjeselo. W Rakojdach su wokrjesnu dróhu K 7219 přez wjes zaso wobchadej přepodali. Hromadźe z Malešanskim wjesnjanostu Matthiasom Seidelom dźakowaše so Budyski krajny rada Michael Harig (wobaj CDU) wobydlerjam za jich sćerpliwosć. Nimo toho wuzběhnyštaj wonaj dobre zhromadne dźěło jednotliwych twarskich firmow a dalšich wobdźělenych. Wot septembra 2016 běchu dróhu po dołhosći 1,5 kilometrow dospołnje ponowili. Wona zwjazuje kromu wsy do směra na Skanecy z přijězdom na sportnišćo a wjedźe hač k wotbóčce na statnu dróhu S 111, kotraž tohorunja k awtodróze A 4 wjedźe.
Policija (26.10.18)
E-bike pokradnyli
Wojerecy. Přiběrajcy měrja so paduši kolesow na tajke z elektriskim motorom. Tak pokradnychu njeznaći tele dny na Wojerowskej Schweitzerowej běły e-bike marki Bulls Green Mover. Z kolesom zhubištej so tež nahłownik a dešćowy płašć 65lětneho wobsedźerja. Koleso ze zeleno-běłym pismom a z nalěpkom předawarja z Rottweila na ramiku ma hódnotu něhdźe 750 eurow. Nahłownik a płašć stej 150 eurow hódnej.
Z młodej hudźbu a reju
Nakupowanski a dožiwjenski wječor za tydźeń w sprjewinym měsće
Budyšin (SN/MWj). Hakle njedawno je staroměšćanski swjedźeń wjele ludźi do Budyšina wabił, da wotměje so tu za tydźeń hižo přichodny wulki podawk. 3. nowembra wabja wikowarjo w nutřkownym měsće na nakupowanski a dožiwjenski wječor Romantica. Wot 16 hač do 22 hodź. budźe dohromady něhdźe 200 wobchodow wočinjenych. W mnohich z nich překwapja wopytowarjow z kulinariskimi a kulturnymi wosebitosćemi. Nutřkoměšćanske towarstwo jako organizator je z pomocu mnohich partnerow najwšelakoriše dalše poskitki přihotował.
Kaž cityjowa managerka Gunhild Mimuß wčera rjekny, budu fasady domow wosebje wobswětlene. Na Bohatej wěži pokazaja widejowe animacije, na Žitnych wikach pak swětłowe pišćele. W tachantskej cyrkwi zaklinči w 19.30 hodź. romantiski pišćelowy koncert. Laserowu show dožiwja wopytowarjo wjacekróć na Timmec sportowym wobchodźe. Cyły wječor rozdawa 15 holcow we wobswětlenych kostimach na hasach wutrobički, w kotrychž namakaja ludźo wosebite poskitki wobchodow.
Skórnika dla dyrbja lěs přetworić
We łužiskich lěsach je so lětsa skórnik razantnje rozmnožił a načinja mjeztym hoberske škody. W tajkim rozměru to fachowcy hišće dožiwili njejsu. A přiwšěm ma to na kóncu pozitiwny efekt.
Kamjenc (UM/SN). W mnohich lěsach Budyskeho wokrjesa lěsni dźěłaćerjo tuchwilu štomy pušćeja a z lěsa woža. Tež při Hennersdorfskej horje južnje Kamjenca ma Robert Kelle ze swojim harvesterom wjele dźěła. Nic pak, dokelž je snano sylny wichor zachadźał, ale małeho bručka dla, kiž da lěsnych fachowcow runjewon zadwělować.
„Loni mějachmy něhdźe 3 000 kósnych metrow škodźeneho drjewa, štož bě hižo wjace hač w lětach do toho. Lětsa trochujemy mnóstwo na něhdźe 50 000 kósnych metrow“, znazornja nawoda Budyskeho wokrjesneho lěsnistwoweho zarjada Christian Starke dimensiju problema. A Rainer Böhme, wjelelětny rewěrowy nawoda a wot septembra na wuměnku, njemóže so na žane lěto z telko škódnikami dopomnić.
