Wuskich poměrow dla jednać
Staršiska přirada pěstowarnje „Krabat“ chce polěpšenja docpěć
Wojerecy (AK/SN). Čornochołmčanske dźěćace dnjowe přebywanišćo „Krabat“ trjeba nuznje lěpše wuměnjenja. Tole žadachu sej starši na zašłym posedźenju Wojerowskeje měšćanskeje rady. „W našej pěstowarni je jara wusko. Rozdźělenje rumnosćow w twarjenju je chětro kućikate“, rozłoži Susann Sellge ze staršiskeje rady. „Dokelž su w samsnym twarjenju priwatni podružnicy kaž tež zubnolěkarska praksa, chodźa dźěći po zjawnej chódbje do pěstowarnje. Na dlěši čas njeje to žane rozumne rozrisanje“, praji rěčnica staršich.
Běrnowy swjedźeń w Droždźiju pola Bukec je lěto a ...
Dalši wandrowski so na puć nastajił
RAA Wojerecy mytowane
Drježdźany/Wojerecy (SN/MiR). Regionalne dźěłanišćo za kubłanje, demokratiju a žiwjenske perspektiwy (RAA) Wojerecy/wuchodna Sakska z.t. a RAA Sakska stej lětušej hłownej dobyćerjej Sakskeho spěchowanskeho myta za demokratiju 2017, kotrež je z 5 000 eurami dotěrowane. Nimo njeju bu komunje Meerane njedotěrowane myto přepodate, dalše štyri projekty wuznamjenichu z 1 000 eurami mytowanskeho pjenjeza. Myto hódnoći inowatiwne projektowe přikłady z ciwilneje towaršnosće a zmužity angažement komunow. Załožba Amadeu Antonio zhromadnje z dalšimi wot lěta 2007 mjenowane myto spožča.
Anetta Kahane, nawodnica předsydstwa załožby, je myta póndźelu na swjedźenskim zarjadowanju w Drježdźanskej Statnej opereće přepodała. Přitomny bě tež sakski statny minister za hospodarstwo a wobchad Martin Dulig (SPD), patron zarjadowanja.
Krótkopowěsće (08.11.17)
Jednohłósnje přećiwo reformje
Podstupim. Braniborske knježerstwo je wčera jednohłósnje wobzamknyło wokrjesnu reformu njepřewjesć. „Běše to najćeši rozsud mojeje politiskeje karjery“, rjekny braniborski ministerski prezident Dietmar Woidke (SPD) po posedźenju knježerstwa. Za rozsud bě trjeba, wotwažować mjez ambicionowanej reformu a wolu, kraj dale hromadźe dźeržeć.
Amazon pyta sobudźěłaćerjow
Waršawa/Poznań. Internetny wikowar tworow Amazon pyta w Pólskej wjace hač 10 000 sobudźěłaćerjow za hodowne wobchodnistwo. Wobmjezowane dźěłowe mocy maja na stejnišćach we Wrócławju, Poznanju, Sosnowiecu a Kołbaskowje dźěłać. Dźěl z nich ma so po hodźoch kaž hižo 9 000 w předewzaću dźěłacych kruće přistajić.
Brunicy so wzdać
Na česć swj. Hubertusa jěchali
Policija (07.11.17)
Šula wčera wupadnyła
Hamor. Nad přidatnym swobodnym dnjom wjeselić smědźachu so wčera holcy a hólcy Hamorskeje zakładneje šule. Přičina pak bě wšo druhe hač zwjeselaca. Pod třěchu bě z dotal njeznatych přičin woheń wudyrił, čehoždla so tam chětro kurješe. Alarmowachu tuž wohnjowu woboru, kotraž měješe wšitko spěšnje pod kontrolu. Přiwšěm su něhdźe 90 šulerjow hižo krótko po 7.30 hodź. zaso domoj pósłali. Zranił so na zbožo nichtó njeje. Fachowc wohnjoweje wobory je sej městnosć wčera bliže wobhladał a za tym slědźił, hač bě snano techniski njedostatk přičina wohenja.
Samo mortwe zwěrjata na pasu
Puć znowawužiwanja žołtych wotpadkow w Drobach demonstrowali
Droby (UM/SN). Derje wopytany bě informaciski dźeń, kotryž je Njeswačanska přirodoškitna stacija (NSZ) minjenu sobotu w sortěrowanskej připrawje firmy Veolia w Drobach w Radworskej gmejnje přewjedła. „Chcemy wopytowarjam pokazać, što so z jich zapakowanskimi wotpadkami w žołtym sudobju stawa. Tak chcemy jich tež pohnuć, na prawe dźělenje wotpadkow dźiwać“, praji sobudźěłaćerka NSZ Angelika Schröter. Wot 33 kilogramow wotpadkow, kotrež kóždy přerěznje w běhu lěta do žołteho sudobja mjeta, je jenož 20 kilogramow za to předwidźane, rozłoži sobudźěłaćer Drobjanskeje připrawy Ralf Burghardt.
Terminy zapodać
Budyšin. W nowym lěće ma zaso nasćěnowa młodźinska protyka wuńć, kotruž wosebje serbskim młodźinskim klubam a dalšim młodźinskim cyłkam wudźěla. Terminy za swjedźenje a zarjadowanja, kotrež su w lěće 2018 předewšěm za młodźinu zajimawe, hodźa so hač do kónc nowembra pod zapodać. Młodźinska protyka je zhromadny projekt socialneho teama Rěčneho centruma WITAJ, kubłanskeje referentki Domowiny a młodźinskeho towarstwa Pawk.
Rozprawja wo wuchowanju
Budyšin. Přichodne stajne blido Budyskeho zwjazka CDU jutře, srjedu, w 19 hodź. w Budyskej piwarni zaběra so z prašenjom, kak móže jednotliwc něšto wuskutkować. K tomu witaja tam Heinricha Schleppersa, kiž je ze swojim angažementom parnu lokomotiwu před dwórnišćom wuchował.
Serbske blido w stolicy
Berlin. W hosćencu Einstein Kaffee na Friedrichowej 206 w Berlinje wotměje so štwórtk, 9. nowembra, w 16 hodź. přichodne Serbske blido.
