Dowolowe bydlenje njezapłaćił

Załom. Wotsrjedź zašłeho tydźenja bě 67lětny muž w Załomju swoje dowolowe bydlenje šěsć dnjow młodemu mužej přewostajił. Při tym wón z toho wuchadźeše, zo hósć posledni dźeń za přenocowanje w apartmenće zapłaći. Předwčerawšim pak sej přenajer bydlenja mysleše, zo prawje njewidźi. Njeznaty młody muž bě so rano zahe zhubił, bjeztoho zo by zapłaćił. Přewšo rozhorjeny 67lětny policiju zazwoni. Kriminalisća so po by­dlenju rozhladowachu a spytachu kmane slědy zawěsćić. Kaž policajska direkcija zdźěli, wučinja nastata škoda něhdźe 150 eurow. Pad nětko dale přepytuja.

Wažne rozsudy na poslednim posedźenju gmejnskich radźićelow

Dźěwin (AK/SN). Poslednje posedźenje Dźěwinskich gmejnskich radźićelow we wólbnej dobje 2014–2019 bě wčera wšo druhe hač snano zabawne zakónčace zetkanje radźićelow. Město toho mějachu parlamentownicy wjacore do přichoda sahace wobzamknjenja na dnjowym porjedźe.

Tak woni z jednym napřećiwnym a jednym wzdatym hłosom wobzamknychu, zo maja popłatki za pohrjebnišćo w Brězowce znowa kalkulować. Wotpowědny nadawk dósta předewzaće za komunalne poradźowanje we vogtlandskim Reichenbachu. Po móžnosći hač do kónca lěta ma kalkulacija předležeć. Wobličenje płaći potom za Brězowske po­hrjebnišćo runje tak kaž za te w Dźěwinje. Po móžnosći wot klětušeho ma nowa kalkulacija płaćić. Reichenbachske předewzaće je tež hižo za Trjebinsku a za Slepjansku gmejnu popłatki za pohrjebnišća kalkulowała.

Młyny najwšelakorišeho razu wotbłyšćuja, kak je čłowjek něhdy přirodnu móc wětřika a wody za sebje produktiwnje wužiwał. Swjatkownu póndźelu budu młyny zaso přistupne.

Bart (SN/MWj). Mjeztym hižo 26. raz wotměje so swjatki póndźelu po wšěm kraju dźeń młynow. Nimale 1 000 wětrnikow, wódnych młynow a dalšich budźe tón dźeń přistupne. Zaměr wot lěta 1994 stajnje póndźelu po swjatkach wotměwaceho so dnja młynow je, wusměrić kedźbnosć a zajim zjawnosće na tele techniske pomniki, kotrež su zdźěla starše hač 2 000 lět.

Tež w dwurěčnych kónčinach su někotre młyny přistupne, kaž wódny młyn Heika Vogela w Barće. Dokelž so wón jenož kóžde druhe lěto wobdźěla, budźe ćim zajimawše widźeć, što je tam zašły čas noweho nastało. Wopytowarjam chcedźa mjez druhim demonstrować, kak žito mjatu. Wo ćělne derjeměće so cyły dźeń z jědźemi a napojemi staraja, popołdnju poskića kofej a tykanc.