Policija (27.03.20)
Njewočakowana překwapjenka
Zhorjelc. Zhorjelscy zarjadnicy so wutoru njemało dźiwachu. Jako k swojim awtam přińdźechu, witaše jich wóń kwětkow. Njeznaći běchu pod woknotrějaki kóždeho policajskeho jězdźidła, kotrež stejachu před rewěrom na Gobbinowej, róžu tyknyli. Zarjadnicy dźakuja so nje-znatym darićelam za spodobne floralne hódnoćenja swojeho dźěła.
Wot ideje k biotopej
Wojerecy (SiR/SN). Wojerowčanka Dagmar Steuer je projekt do žiwjenja zwołała, na łukach štomy a kerki sadźeć. A je za swoju ideju dotal wjele připóznaća žnjała. Wotpowědnu ležownosć přewostaja wona ze swójskeho wobsydstwa. „Mam wulke wjeselo a začuwam, zo něšto dobre zdokonjam. Widźiš-li, kak sterilnje sej někotři swoju zahrodu wuhotuja, ale sej jabłuka z Južneje Afriki kupuja, da maš tola rozmyslować. Wobhladuju projekt tuž jako jara trěbny. Je to mój přinošk za wobswětoškit. Njeměli rěčeć, ale jednać!“ Mjeztym su wobydlerjo na 1,3 hektary wulkej priwatnej łuce njedaloko Němcow něhdźe 250 štomow, kerkow a dalšich rostlin nasadźeli.
Projekt najebać koronakrizu
Łužiski park błudźenkow we Wochozach je koronakrizy dla tuchwilu zawrjeny. Přiwšěm prócuja so sobudźěłaćerjo wo to, wobchować park w pomjatku wopytowarjow. Za to su wšelake akcije přihotowali.
Krótkopowěsće (27.03.20)
123 inficěrowanych we wokrjesu
Budyšin/Zhorjelc. Ličba wobkrućenych, z koronawirusom inficěrowanych we wokrjesu Budyšin je wo jědnaće na cyłkownje 123 wosobow přiběrała. Dohromady je tuchwilu 914 ludźi w karantenje. Strowotniski zarjad na to skedźbnja, zo su natyknjenja po cyłym wokrjesu a wšitke starobne skupiny potrjechene. W Zhorjelskim wokrjesu zwěsćichu cyłkownje 53 infekcijow, tam je dotal jedna wosoba zemrěła.
Online-poskitk Płomjenja
Budyšin. Wot wčerawšeho poskića Płomjo online-seriju „Krimije přećiwo wostudźe“. Krótke słuchohry redaktor Pětr Šołta doma ze swojimi dźěćimi nahrawa. „Njeńdźe wo profesionelnosć, ale wo to, na serbske teksty słuchać, je zrozumić a krimi prawje wuhódać. Za to kiwaja mjenujcy rjane myta.“ Pytajće na Youtube pod hesłom PŁOMJO.
6,7 milionow eurow za šule
Budyšin. Sakska natwarna banka je Budyskemu wokrjesej dohromady 6,7 milionow eurow za digitalizaciju w šulach přilubiła. Pjenjezy maja so hač do lěta 2024 za „lěpšu digitalnu infrastrukturu na cyłkownje 30 šulach w nošerstwje wokrjesa“ nałožić, w zdźělence krajnoradneho zarjada rěka.
Policija (26.03.20)
Psyca zaso doma
Wuskidź. Wutoru wječor wuhlada policija na zwjazkowej dróze B 115 pola Hole samotneho psa a jeho popadny. Po rešerši za wobsedźerku podachu so k jeje adresy, žona pak doma njebě. Tak dyrbjachu psycu sobu na rewěr wzać, hdźež so krótko na to mějićelka přizjewi a swojeho lubuška sobu domoj wza.
Rozestajenje při durjach
Rakecy. Na Kaponičanskej hasy w Rakecach je so wobydler wopytowarjej do puća stupił. 54lětny nochcyše 33lětnemu do domu zastupić dać, dokelž tam njebydli. Tak dóńdźe k ćělnemu rozestajenju mjez mužomaj, při čimž so młódši lochko zrani. Nimo toho wjedźeše zwada k wobškodźenju zachodnych duri. Policija wo to prosy, zo bychu so potrjecheni w tajkich padach na zastojnikow wobroćili, kotřiž njejasnosće wuswětla.
Zetkanku rozpušćili
Rjedźenje wotprajene
Pančicy-Kukow. Kedźbu, čłonojo Domowinskeje skupiny Pančicy-Kukow! Za srjedu, 1. apryla, planowane rjedźenje wokoło pomnika Jakuba Barta-Ćišinskeho w Lipju je aktualnych přičin dla wotprajene. Nowy termin budźe sčasom wozjewjeny.
Tydźenske wiki hižo njebudu
Budyšin. Wotnětka hižo móžno njeje so na Budyskich tydźenskich wikach z tworami zastarać. Wukaz płaći najprjedy raz hač do 5. apryla. W nim rěka: „Na tydźenskich wikach njeje wotstawk połdra metra mjez wosobami móžny. Zdobom wosebje starši ludźo tele wiki wužiwaja.“
Telefonować abo pisać
Zły Komorow. Turisća, kotřiž chcedźa so wo wokolinje Złeho Komorowa, Wojerec, Gubina, Baršća, Grodka, Hamora abo wo wopytowarskim centrumje we Wjelcej wobhonić, móža to tuchwilu jenož telefonisce, e-mejlnje abo z póštu činić. Měšćanske informacije dźěłaja w regularnych wotewrjenskich časach.
W zawodźe so paliło
Nowe móžnosće so testować dać
Choćebuz/Lubin (SN). W Choćebuzu maja wotnětka praksu, hdźež móža ludźi na coronawirus testować. Praksa słuša lěkarce dr. Liv Fünfgeld. Kaž wona zdźěli, su wšitcy domjacy lěkarjo města do syće zwjazani, zo móhli so mjez sobu informować wo aktualnych wuwićach a hojenje pacientow koordinować.
Tež w delnjołužiskim Lubinje so wo dobre wuměnjenja za testy na coronawirus staraja. Tam su spočatk tydźenja wosebitu praksu wotewrěli, kaž serbscy redaktorojo rozhłosa RBB po informaciji wokrjesa Dubja-Błóta zdźěleja. Praksa słuša lěkarce dr. Christinje Wendt. Wot póńdźele do pjatka, w času wot 13 do 15 hodź., smědźa so tam dźěći wot dwanaće lět a dorosćeni, kotřiž maja symptomy kaž zymicu, suchi kašel abo smorkawu, testować dać. Telefoniske přizjewjenje do toho pak je trěbne. Dalše móžnosće testow su we wokrjesnych chorownjach we Łukowje (Luckau), w Lubinje a Königs Wusterhausenje.
Pjenjezy sami wróćo njeknihować
Budyšin (SN/MiR). Wotpowědnje powšitkownemu wukazej Sakskeje su dźěćace dnjowe přebywanišća wot 18. měrca zawrjene. Tak njeje wjetšinje staršich móžno hladanski poskitk za swoje dźěći wužiwać. To je městu Budyšinej přičina, wot 18. měrca hač do 17. apryla w zarjadnišćach, kotrež su w jeho nošerstwje, staršiski pjenjez njezběrać. Přiwšěm jón za apryl najprjedy raz dospołnje kasěruje, a to prěni dźeń měsaca. Přičina toho je rjadowanski program za dźěćace dnjowe přebywanišća. Potom budu wšitke aktualne změny – kaž přewzaće staršiskeho pjenjeza přez młodźinski zarjad, wupowědźenja, změna swójbneho stawa a dalše – zapřijate a wotličene. Ručež su lisćiny pruwowane, město Budyšin staršim přinošk wróćo płaći, štož ma so hišće do jutrownych prózdnin stać. Zo njeby so postupowanje dlijiło, je wažne, zo starši płaćeny přinošk sami wróćo njeknihuja.
Kulowski etat wobzamknjeny
Město móže sej někotre inwesticiske naprawy předewzać
Kulow (AK/SN/MiR). Etat města Kulowa za lěto 2020 je přizwoleny. Wobkrućeny je zdobom hospodarski plan swójskeho zawoda za wopłóčki. To zdźěla měšćanosta Markus Posch (CDU). Prawniski a komunalny zarjad Budyskeho wokrjesa jako dohladowanski zarjad je woběmaj etatomaj přihłosował, a to bjez přidatnych zawjazkow. Intensiwne pruwowanje traješe tři měsacy. „Nětko móžemy z lětsa planowanymi naprawami započeć“, měšćanosta podšmórnje.
