Lětuša najwažniša inwesticija Chróšćanskeje gmejny so nachila. Bywša srjedźna šula je na kulturny a gmejnski centrum přetwarjena. Wužiwarjo jednotliwych rumnosćow nětko do nich přećahuja.

Chrósćicy (SN/MWj). Přećahowanske kartony a běrowowe mebly stejachu wčera rano na dworje Budyskeho Serbskeho domu spřihotowane, zo byštaj je sobudźěłaćerjej Załožby za serbski lud do bywšeje Chróšćanskeje srjedźneje šule zwozyłoj. Gmejna je ju minjene měsacy na nowy kulturny a gmejnski centrum přetwarić dała. Wšitke twarske dźěła su nětko wotzamknjene, tak zo móža wužiwarjo zaćahnyć. Zašłe dny je to hižo Serbske šulske towarstwo činiło, wčera slědowaštaj socialnaj dźěłaćerjej Rěčneho centruma WITAJ Marija Koklina a Lorenc Jankowski. Přichodne dny tež regionalna rečnica Domowiny a gmejnske zarjadnistwo do swojich nowych rumnosćow přećehnjetej.

Dźensniši dźeń chcyć twarski projekt zmištrować je zwjetša zwažliwa wěc. To móžeš dokładnje planować, kaž chceš, na kóncu dyrbiš tola wjace pjenjez wudać, hač sy zwoprědka předwidźane měł. Dokónčeny přetwar bywšeje Chróšćanskeje srjedźneje šule na kulturny a gmejnski centrum je najlěpši přikład za to. 65 000 eurow wjace hač planowane za tajki projekt wudać žno je šwarna suma. Komuna drje ma často hišće móžnosće, w swojim etaće srědki trochu tam a sem suwać. Za priwatneho twarskeho knjeza, kiž moje­dla stary dom na nowy bydlenski přetwarja, by to katastrofa była. Wězo, stara twarska substanca móže stajnje překwapjenki w sebi chować, wo kotrychž do toho nichtó ničo wědźał njeje. Ale tež rjemjeslniske firmy móža sej dźensa dowolić, trochu wulkomyslnišo kalkulować. Wšako je twarskich nadawkow dosć a nadosć. Štož je potajkim wjeselo jednoho, je druhemu wužadanje. Marian Wjeńka

Slědy wjedu do bronzoweje doby

Choćebuz/Slepo. Při přepytowanju zasy­dlenskeho areala za Nowy Miłoraz w Slepom su archeologojo nimo popjelnicoweho rowa z bronzoweje doby na dźělnej přestrjeni blisko po­hrjebnišća sydlen­ske městno wotkryli, kaž přede­wzaće LEAG informuje. Rěč je dale wo wjace hač 400 jednotliwych nama­kan­kach z rozdźělnych dobow. Kedźby­hódne su powostanki nimale sto wuškrěwanskich pjecow za dobywanje železa.

Dešno złotu medalju dóstało

Berlin/Dešno. Dešno pola Choćebuza je jedna z wosom wsow, kotrež su juro­rojo wubědźowanja zwjazkoweho ministerstwa za zežiwjenje a ratarstwo „Naša wjes ma přichod“ ze złotej medalju počesćili. Z njej zwjazany je mytowanski pjenjez 15 000 eurow. Z něhdźe 1 900 wobdźělenych wsow bě so 30 do finala dóstało. 15 wsow mytowachu ze slěbrom.

Wodźenja tež za slepych

37lětneho zajeli

Budyšin. Zastojnicy tudyšeho policaj­skeho rewěra su wčera dopołdnja na Budyskej Schliebenowej bydlenje přepytali a 37lětneho muža zajeli. Zo njebychu hi­šće­ trajace přepytowanja wohrozyli, njejsu zdźělili, čehodla su bydlenje přepytali rěka w rozprawje policajskeje direkcije. Přećiwo zajatemu mužej předležeše sudniski wukaz zajeća, čehoždla jeho do jastwa dowjezechu. Nimo toho namakachu při kontroli tři konopjowe rostliny, kotrež sćazachu.