Na Budyskim Schliebenowym kružnym wobchadźe na originelne wašnje na ...
„Integrujće tla najprjedy nas!“
Petra Köpping žada sej připóznaće žiwjenskeho wukona wuchodnych
Budyšin (SN/CoR). Čehodla stej njedowěra a distanca k demokratiji a politice w Sakskej a wuchodnej Němskej tak wulkej? Zwotkel pochadźa wulki hněw? Na tajke a podobne prašenja je wčera sakska ministerka za integraciju Petra Köpping (SPD) na połnej žurli Budyskeje měšćanskeje rady spytała wotmołwić, jako předstaji swoju loni prěni raz a mjeztym w pjatym nakładźe wušłu knihu „Integrujće tla najprjedy nas! Polemiski spis za wuchod“. Politikarka, kotraž bě po přewróće wjesnjanostka a krajna radźićelka Lipšćanskeho regiona, sej tam žada čas přewróta wobdźěłać a znowa pohódnoćić. W njezmištrowanych sponiženjach a njesprawnosćach, w biografiskich łamkach bjezdźěłnosće a wukorjenjenja wuchodoněmskeho wobydlerstwa dla widźi wona poprawnu přičinu dźensnišeje dilemy – a wothłosa za AfD. Zarjadowanje wotmě so we wobłuku kubłanskopolitiskeho projekta Cyrkwinskeho žónskeho dźěła sakskeje ewangelskeje krajneje cyrkwje w kooperaciji z Budyskej zamołwitej za runostajenje Andreju Spee-Keller.
Krótkopowěsće (13.08.19)
Prawo zastaranja sćazali
Kamjenc. Dokelž mějachu dobro dźěsća za wohrožene, su so zarjady za młodźinu loni w 1 719 padach na swójbne sudnistwa wobroćili. Za 600 małolětnych su staršim na to prawo zastaranja dospołnje sćazali, w 424 padach zdźěla zarjadej za młodźinu abo třećemu přenjesli, kaž Kamjenski krajny statistiski zarjad Sakskeje zdźěla.
Konferenca předwidźana
Zhorjelc. Jobcenter Zhorjelskeho wokrjesa chce z podpěru towaršnosće Europske město Zhorjelc/Zgorzelec w septembru prěnju konferencu dźěłodawarjow přewjesć. Zaměr je, sej nazhonjenja we wobłuku zdobyća fachowcow a wjazanja sobudźěłaćerjow wuměnjeć. Runje tak maja so informacije podać, kak móhli dźěłodawarjo fachowcow z Pólskeje a Čěskeje přistajić.
Tankownicy zwučuja we Łužicy
Podłu statneje dróhi nastanje kolesowanski puć
Błohašecy (SN). Hižo w lěće 2011 stej so město Budyšin a krajny zarjad za dróhotwar a wobchad dojednałoj, w Błohašecach podłu hłowneje dróhi kolesowanski puć twarić. Wot toho časa dyrbjachu tam někotre planowanske zadźěwki zmištrować a ležownostne prašenja rozrisać. Nětko su tam dróhotwarcy dźěłać započeli. W tym zwisku rozrisaja tež problem njedosahaceho wotwodźowanja dešćikoweje wody. Tak změja w Błohašecach nětko kompleksne twarnišćo, kotrež je za zbytk tohole lěta a za klětu planowane.
Jako prěnje staraja so wo wotwodźowanje dešćikoweje wody. Ju powjedu po nowym kanalu na Słonoboršćanske přemysłownišćo. Za to su minjeny tydźeń na planowanym nowym kolesowanskim pućiku pjeršć wotwozyli, zo móhli tam kanal do zemje kłasć. Wot přichodneje póndźele, 19. awgusta, dóńdźe maksimalnje dwaj tydźenjej k wobchadnym poćežowanjam. W tym času budźe wobchad při wotbóčce na přemysłownišćo z amplu rjadowany, kaž měšćanske zarjadnišćo zdźěla. Na wuskutki dyrbja so šoferojo tež na statnej dróze S 100 nastajić.
Spominaja na wopory
Slepo. Z nutrnosću spomina Slepjanska ewangelska wosada jutře, wutoru, we 18.30 hodź. na wopory, kotrež su při nutřkoněmskej hranicy žiwjenje přisadźili. Přichodne tydźenje wotměja so w Slepom dalše zarjadowanja, wěnowace so 30. róčnicy měrliweje rewolucije.
Čitataj twórby Strittmattera
Ćisk. Na wječor žorta a rozmyslowanja z twórbami Erwina Strittmattera a jeho mandźelskeje Evy přeproša Kulturne towarstwo Ćisk srjedu, 14. awgusta, w 19 hodź. na Ćišćanski statok. Z twórbow wobeju spisowaćelow čitataj Uwe Jordan a Majka Kowarjec.
Projekt w muzeju
Policija (12.08.19)
Na łuce so paliło
Němcy. Při žnjach wotawy je so minjeny pjatk pola Němcow paliło. Při ratarskej mašinje běchu škrě łuku zapalili. Woheń přeskoči na walčkaj wotawy kaž tež na prasowansku mašinu. Płomjenja rozpřestrěchu so na 500 kwadratnych metrow. Dalšemu rozpřestrěću wohnjowi wobornicy zadźěwachu. Wěcnu škodu trochuja na něhdźe 60 000 eurow škody.
Zwoprawdźeja tójšto projektow
Wojerecy (AK/SN). Zawjesć we Wojerecach a měšćanskich dźělach wobydlerski etat je so jako dobre wopokazało. Mjeztym su prěnje wuslědki widźeć. Tule bilancu sćahny tele dny měšćanski radźićel Uwe Bazejczyk, nawoda wodźenskeje skupiny za wobydlerski etat. Na te wašnje wužiwa město komunalnu pawšalu za lětsa a klětu, potajkim dohromady 140 000 eurow. Wobydlerjo zapodachu 180 namjetow, 61 z nich móžachu wobkedźbować.
„Tři naprawy su hižo zwoprawdźene“, rozłoži sobudźěłaćerka měšćanskeho zarjadnistwa Korina Jenßen. Při kolesowanskim pućiku na nasypje Čorneho Halštrowa nastajichu sydadła. We wobydlerskim etaće bě za to 10 000 eurow předwidźane. Njedaloko Wojerowskeho Lessingoweho gymnazija dachu za 5 000 eurow wjacore chěžne zachody porjeńšić. A w Brětni-Michałkach nastajichu na hrajkanišću a při Brětnjanskim jězoru blida, ławki a papjerniki za dohromady 12 000 eurow.
Krótkopowěsće (12.08.19)
Za lěpšu koordinaciju přez Nysu
Mužakow. „Mjezu překročace spěchowanske srědki za Łužicu maja so lěpje mjez kónčinami koordinować, zo hodźeli so wobstejace synergije wužiwać“, je prezident euroregiona Nysa a Zhorjelski krajny rada Bernd Lange (CDU) přeswědčeny. Zastupjerjo euroregionow Nysa a Sprjewja-Bóbr a Łužiskeho hospodarskeho regiona su pjatk w Mužakowje němsko-pólske kooperacije rozjimali.
Swoju wjes wopominali
Běła Woda. Bywši Čelnjenjo zetkachu so sobotu při wopomjatnym kamjenju na historiskim městnje. Z piknikom su swoju Wochožanskeje jamy dla w lětomaj 1972 a 1973 přesydlenu a 1979 wotbagrowanu wjes wopominali. Čelno ležeše mjez Nowym Městom nad Sprjewju a Hamorom. Domizniske towarstwo Čelno je zetkanje znowa organizowało.
Dźesaćdypkowy plan předstajeny
Policija (09.08.19)
Pytaneho lepili
Běła Woda. Po pokiwje kedźbliweho wobydlerja je policija zawčerawšim w Běłowodźanskim zahrodowym domčku dospołnje wopiteho muža lepiła, kiž tam kruće spaše. Jednaše so wo 31lětneho bjezdomneho Leta. Po prěnich přepytowanjach so wukopa, zo bě wón z kolesom přijěł, kotrež bu w Žitawskej kónčinje pokradnjene. Dale měješe wón mobilny telefon při sebi, pochadźacy ze zadobywanja w braniborskim Gubinje. Nimo toho je hižo šěsć wšelakich statnych rěčnistwow Sakskeje a Braniborskeje za 31lětnym pytało.
