Zaso jónu wulka epidemija zachadźa. Tónkróć šěri so strach, zo afriska swinjaca mrětwa wudyri. Kotre konsekwency to poprawom ma, nichtó tak prawje njewě. Rěči so wo dźiwich swinjach, kiž so hač k nam dóstawaja a kotrež měli hnydom zatřělić – tež w klóšterskich lěsach. Dokelž su pady tejele swinjaceje mrětwy, kotraž bě so po zwěsćenju ekspertow lěta 2007 z Kawkaza, z Běłoruskeje přez Ukrainu do Letiskeje hač do Pólskeje a Čěskeje rozpřestrěła, wosebje w namjeznych kónčinach „sireny wuja“. Tak tohorunja pola nas w Sakskej. Wězo na tym něšto je, zo tale chorosć domjace swinje wohroža. Ale njemóžemy sej předstajić, zo w Ralbičanskej plahowarni swini wšón skót morja. Město tajkeho scenarija pak měli sej wuwědomić, zo tež čłowjek rozšěrjenju chorosće sobu polěkuje. Mjenujcy tón, kotremuž je wšojedne, dokal swoje jědźne wotpadki mjeta. Měrćin Weclich

W Němskej dotal pady afriskeje swinjaceje mrětwy znate njejsu. Tuž njejsu tež w Budyskim wokrjesu žane wobmjezowanja přikazane. To rěka, zo njetrjebaja ludźo swoje psy za powjaz wodźić.

Budyšin (SN/mwe). Kaž Budyski krajnoradny zarjad na naprašowanje SN wobkrući, njetrjebaja so tudyši wobydlerjo tuchwilu starosćić, zo jich afriska swi­njaca mrětwa (ASP) dosćehnje. Wšako za čłowjeka, psy a kóčki strach natyknjenja njewobsteji. Zo pak móže so chorosć mjez dźiwimi swinjemi jara spěšnje wupřestrěć, njeje žane potajnstwo. Wot toho potrjechene móhli tež domjace swinje być, kotrež bychu hladarjo w padźe ASP po tysacach morić dyrbjeli.

Zelena swěca za nowy wotrězk

Drježdźany. Nowotwar zwjazkoweje dróhi B 178 mjez Nosaćicami a awtowej dróhu A 4 móže Sakska dale planować. Zwjazkowe ministerstwo za wobchad je sakskemu wobchadnemu ministerstwu planowany přeběh tak mjenowaneho „wotrězka 1.1“ pisomnje wobkrućiło. Dokelž ma so wotbóčka A 4 Wospórk wobchować, dóńdźe „jeničce k snadnuškej změnje přeběha čary, bjeztoho zo so tohodla­ zasady planowanja zanjechaja“, rěka­ we wobkrućenju.

Z dźěćimi delnjoserbsce rěčeć

Bórkowy. Pěstowarnje Bórkowskeho hamta pytaja Delnjoserbow, kotřiž móhli z dźěćimi serbsce powědać, jim bajki bać abo z nimi spěwać. Přizjewić móža so zajimcy pola zamołwiteje za serbske naležnosće Bórkowskeho hamta Anett Zišcyneje, kotraž sama jako kubłarka w Žylowskej Witaj-pěstowarni dźěła, kaž tež w Bórkowskej abo Strjažowskej pěstowarni.

Slěbro a bronzu dobyli

Budyšin (SN). Před wulkej chłostanskej komoru krajneho sudnistwa je so dźensa w Budyšinje zahajiło jednanje přećiwo 28lětnej žonje z Waldhufena pola Niskeje a přećiwo 32lětnemu zhotowjerjej gratow z Wósporka. Statne rěčnistwo jimaj mjez druhim wumjetuje, zo staj w času wot 26. meje do 7. awgusta 2017 w sydom padach crystal z Pólskeje do Němskeje dowožowałoj, zo byštaj drogu tu z dobytkom předałoj. Kaž z informa­cijow sudnistwa wuchadźa, bě 28lětna terminy a městnosće přepodaća z pólskimi wikowarjemi wothłosowała a dojednała. ­Po tym je ze swojim wosobowym awtom hromadźe z wobskorženym tworu přez mjezu do Němskeje wozyła. Wobaj staj crystal na to ­rozdźělnym wote­běrarjam we Wósporku a wokolinje pře­dawałoj a při tym něhdźe 25 000 eurow dobytka „nadźěłałoj“.

Žona njeje předchłostana. 32lětny muž ma porno tomu w zwjazkowym centralnym registrje pjeć zapiskow, jedyn z nich tohorunja drogoweho delikta dla. Wobaj staj w přepytowanskej jatbje. Dźensnišemu prěnjemu terminej slědujetej 31. januara a 5. februara dalšej.