Na prózdninske dny
Horni Hajnk. Tež lětsa přeprošuja šulscy socialni dźěłaćerjo Rěčneho centruma WITAJ w prěnim tydźenju nazymskich prózdnin na serbskorěčne tematiske dny. Na ležownosći Jurja Brězana w Hornim Hajnku chcedźa sej wot póndźele do pjatka, stajnje wot 8.30 do 13.30 hodź. nazymske wjesela lubić dać a so w přirodźe hibać. Přizjewić móža so šulerki a šulerjo 3. do 6. lětnika hač do 10. oktobra z mjenom a starobu pod telefonowym čisłom 03591/ 550 400 abo z mejlku na .
Dopominaja na přewrót
Wjelk znowa we wsy zachadźał
Pěčkec stadło wowcow cil suroweho nadpada było
Sernjany (SN/MWj). Hrózbne wobrazy skićachu so Józefej Pěčce minjenu sobotu rano, jako w swojim 180 wowcow wopřijacym stadle na kromje wsy, něhdźe sto metrow wot prěnich bydlenskich domow zdalene za prawym hladaše. W nocy bě tam wjelk elektriski płót přeskočił, w stadle surowje zachadźał a po wšěm zdaću kaž wot kreje wopojeny wjacore wowcy zakusał. Někotre ležachu na pastwje, dalše namakachu Józef Pěčka a jeho swójbni pozdźišo na druhich městnach w bliskosći na łuce. Jednu wuhladachu samo direktnje před jednym z nowonatwarjenych jednoswójbnych domow do směra na Róžant. Při bliskim lěsku zwěsćichu wowcu, kotraž bě hišće žiwa, kotrejž pak nutriny z brjucha wisachu. Ju su pozdźišo wot jeje čwělow wumóžili. Wulki dźěl skoćatow bě před wjelkom ćeknyć spytał. Při tym padny jedna do rěčki, njemóžeše so hižo z njeje wuswobodźić a so we wodźe zatepi.
Nachwatać a so njedlijić
Krótkopowěsće (08.10.19)
2,4 miliony eurow za přetwar
Hórnikecy. Sakska ministerka za wědomosć a wuměłstwo dr. Eva-Maria Stange (SPD) je wčera 1,2 milionaj eurow za přetwar Hórnikečanskeje Energijoweje fabriki přirjadnicy Budyskeho krajneho rady Birgit Weber přepodała. Z přidatnej sumu 1,2 milionow eurow spěchuje tež Zwjazk modernizaciju muzeja, kotryž předstaja stawizny a změnu łužiskeho brunicoweho regiona.
Dźe wo strowe zežiwjenje
Budyšin. Jedna ćežišćowa tema aktualneho Staršiskeho lista, kotryž wudawa Serbske šulske towarstwo, je strowe zežiwjenje. Nimo přinoška z pjera dr. Uty Libšoweje je w zešiwku rozprawa z „Chróšćan kołća“. Malešanske kubłanišćo rozprawja wo zeznaću přirody a Němčanske wo dźěle na zahrodźe. Zabawnej stej rozprawje wo dźěćacym swjedźenju w Hórkach a wo pućowanju na horu Kotmar.
Klětu so temje přiroda wěnuja
Přihotuja słódny zymski liker
Stajnje skromnje wustupowali
W Ralbičanskej wosadnej cyrkwi a pozdźišo na hosćinje w Šunowje zhladowaštaj wčera ćělne a duchownje strowaj Pawoł Šołta a jeho mandźelska Hilža rodźena Wowčerkec ze Šunowa na zhromadny žiwjenski puć 60 zbožownych lět.
Dejmantna jubilarka Hilža narodźi so w měrcu 1938 w Smjerdźacej a chodźeše wot 1944 wosom lět w Róžeńće a Ralbicach do šule. Ju wuchodźiwši dźěłaše jako domjaca pomocnica pola Cyžec w Smječkecach, pozdźišo pola pjekarja w Kamjencu a tam tež něšto lět w Lajnertec modowym domje jako předawarka. Po załoženju plastu předźěłaceho zawoda Zeibina w Bóšicach sej tam jeje přećelne wustupowanje a pilnej ruce hač do wuměnkarskeje staroby chwalachu
Policija (07.10.19)
Tobołku předawarki pokradnył
Wojerecy. Njeznaty wuži předwčerawšim njewobkedźbowany wokomik a pokradny we Wojerowskej kupnicy tobołku předawarki. W njej běchu nimo handyja móšnja, wupokazy a kluče. Tobołku su pozdźišo w bliskosći namakali. Paduch bě sej z njeje 30 eurow wzał.
Přewjedu serbski wječor
Tydźeń dušineje strowoty
Běła Woda (AK/SN). Město Běła Woda wobdźěla so na cyłoněmskim tydźenju dušineje strowoty. K tomu přeprošuje socialna syć Łužica přichodne dny wšitkich zajimcow, zdźěli sobudźěłaćerka syće Romy Ganer. „Wot 7. do 11. oktobra mam cyłkownje 15 zarjadowanjow planowanych“, wona wuwjedźe a podšmórny, „nimale kóždy třeći čłowjek ćerpi w běhu swojeho žiwjenja na psychisku chorosć. Něhdźe 17 procentow wšitkich dnjow chorosće přistajenych ma tajke schorjenje za zakład.“
Dušine schorjenja přiběraja. W reporće lěta 2014 su zawodne chorobne kasy zwěsćili, zo ležeše chorobny staw nastupajo tajke chorosće w Zhorjelskim wokrjesu z něhdźe dwěmaj dnjomaj pod cyłoněmskim přerězkom. Mjeztym je ličba schorjenjow na dwaj dnjej nad cyłoněmski přerězk stupała. „To je jasny indic, zo dyrbimy so hišće bóle wo rozswětlenje a prewenciju prócować“, rjekny Ganer. Tohodla přewjeduja tež w Běłej Wodźe cyłoněmski tydźeń dušineje strowoty, za kotryž je zwjazkowy strowotniski minister Jens Spahn (CDU) patronat přewzał. Zarjadowanja wěnuja so předewšěm strowemu zežiwjenju, pohibowanju a technikam prewencije.
Lipowe łopješko rjany symbol
Budyšin (CS/SN). Wulke wjeselo knježeše njedawno w spěchowanskej šuli za duchownje zbrašenych w Budyskej Strowotnej studni. Dźeń do 3. oktobra spožčichu jej mjeno „Lipowa šula“. Mjez druhim witachu tam zapósłanca Sakskeho krajneho sejma Marka Šimana (CDU), kiž bě so hižo spočatk 1990tych lět sobu za to zasadźał, zo móžeše zarjadnišćo z baraki na Židowje do noweho domicila w Strowotnej studni přećahnyć. Nowu taflu z mjenom wotkryštaj nětko šulska nawodnica Gundula Rabold a prěni přirjadnik krajneho rady Udo Wićaz (CDU) jako zastupjer wokrjesa, nošerja kubłanišća.
Wo mjenje za šulu běchu do toho dlěši čas diskutowali. Namjetowane běchu mjez druhim „Šula při wobkruhu Strowotna studnja“ a mjena wuznamnych wosobinow. Pregnantnemu mjenu „Lipowa šula“ pak su šulerjo, pedagogojo a starši skónčnje přihłosowali, wobkrućejo to mjez druhim tak, zo na šulskim dworje hižo wjacore lipy rostu. Nimo toho ma lipowe łopješko formu wutroby jako symbol za to, zo rozumi so spěchowanska šula jako kubłanišćo z wutrobu.
