Policija (06.02.19)
Muža mortweho namakali
Běła Woda. 27lětny Běłowodźan je policiji wčera wječor zdźělił, zo w bydlenju na dróze Wam k zbožu mortwy muž leži. Policija tam 69lětneho namaka, pola kotrehož móžeše nuzowy lěkar jenož hišće smjerć zwěsćić. Hladajo na zranjenja njehodźi so namócny njeskutk wuzamknyć. Dokelž 27lětny rjekny, zo ma něšto z tym činić, jeho nachwilnje zajachu.
Nowe wudawki za zwjazk
Za datowy škit dyrbja gmejny přichodnje tójšto płaćić
Pančicy-Kukow (SN/MWj). W zarjadniskim zwjazku Při Klóšterskej wodźe dyrbja přichodnje pjenjezy za eksterneho społnomócnjeneho za datowy škit wudawać. Hinak hač planowane pak njemóžachu na wčerawšim posedźenju zarjadniskeho zwjazka wobzamknyć, štó ma tónle nadawk wukonjeć. Dokelž běchu dóšłe poskitki firmow přemało wuprajace a njehodźachu so přirunować, zastupjerjo pjeć sobustawskich gmejnow wotpokazachu, wo tym rozsudźić.
Wo serbskich prašenjach
Malešecy. Domowina, Rada za serbske naležnosće Sakskeje a Załožba za serbski lud přeprošuja jutře, štwórtk, w 19 hodź. na rozmołwne koło wo serbskich prašenjach do Malešanskeho hosćenca Wódny muž. Na rozmołwje wobdźěla so Dawid Statnik, Marja Michałkowa, Leńka Thomasowa a Jan Budar.
Sobotu na premjeru
Chrósćicy. „Čeplski recept“ rěka nowa komedija Serbskeje lajskeje dźiwadłoweje skupiny Chrósćicy, kotraž změje sobotu, 9. februara, w 19.30 hodź. premjeru na Chróšćanskej Krawčikec žuli. Wuměłski nawod ma Tomaš Cyž. Zastupne lisćiki w předpředani dóstanu zajimcy pola wjesneho časnikarja Jürgena Njeka. Hnydom nazajtra, 10. februara, budźe na Krawčikec žurli dalše předstajenje w 16 hodź. Pjatk, 15. februara, pokazaja Chróšćenjo swoju komediju w 19 hodź. w Sulšečanskim kulturnym domje.
Za swjedźeń so přizjewić
Po přestawce znowa pjerjo drěli
Hišće před 50 lětami słušeše pjerjodrěće k tradicionalnym nadawkam, kotrež mějachu žony na dołhich zymskich popołdnjach a wječorach, hdyž dźěło na polu wotpočowaše, wobstarać. W Ćisku so Adelheid Herrmannowa dopomina, zo krótko do kwasa jeje sotry pjerjodrěće w swójbje ze znatymi a susodami cyły tydźeń traješe. K njewjesćinskemu wěnu dźě słušachu tehdy poslešći a hłowakaj. Za to trjebachu něhdźe dźesać kilogramow pjerja.
Mjeztym drje su zdźěla nowe maćizny do lěharnjow zaćahnyli, potrjeba žonow za zetkanje w ćopłej stwě pak so pozhubiła njeje. Před 14 lětami měješe Rose- marie Böhmowa ideju, nałožk pjerjodrěća w Ćisku wožiwić. Wot toho časa jeje dźowka Astrid Wittowa tónle podawk kóžde lěto w Ćisku organizowaše. Hač do lěta 2015, jako jenož hišće dwě žonje přińdźeštej. Zajim mjez ludźimi popušći a organizatorka měješe z nowym dźěłowym městnom tež mjenje chwile.
Etat z mnohimi njeznatymi
Kaž w mnohich druhich gmejnach tež w Slepjanskej tuchwilu hospodarski plan 2019 nastajeja. A kaž wšudźe druhdźe dyrbja tež tu hladać, hdźe móža něšto zalutować.
Slepo (AK/SN). Wo swój zaměr, nastajić dwójny hospodarski plan 2019/2020, so Slepjanska gmejna hižo dale njeprócuje. Město toho ma so po poručenju Zhorjelskeho wokrjesa etat jenož za lětsa nastajić. To pak je ze zalutowanjemi zwjazane. „Dyrbimy wo wšěm rěčeć“, rjekny wjesnjanosta Reinhard Bork (njestronjan) na wčerawšim posedźenju gmejnskeje rady. Někotre inwesticije dyrbja na klětu přestorčić a swoje dobrowólne wukony redukować. Zo bychu wjace dochodow docpěli, maja so komunalne ležownosće předać. „Tež gmejnske objekty njebudźemy hižo za wužiwanje darmotnje přewostajić móc“, wjesnjanosta připowědźi. Diskutowali wo tym hižo su, rozsudźene pak hišće ničo njeje, dokelž pobrachuja ličby z towarstwow.
Krótkopowěsće (06.02.19)
Domaška předsyda wuběrka
Pančicy-Kukow. Runja zašłym lětam změja gmejny zarjadniskeho zwjazka Při Klóšterskej wodźe za lětuše komunalne a europske wólby kaž tež za wólby Sakskeho krajneho sejma zhromadny wólbny wuběrk. Jeho předsyda je Měrko Domaška. Zo wón runočasnje za wokrjesny sejmik kandiduje, so tomu njespřećiwja. Kaž wón wčera na posedźenju zarjadniskeho zwjazka rjekny, je wokrjes tole prawnisce pruwował.
Prěnjej čestnaj čłonaj
Bórkowy. Domowinska župa Delnja Łužica je prěni raz čestne čłonstwo spožčiła. Jako čestneju čłonow su Manfreda Starostu a Erwina Hanuša za jeju wjelelětne prócowanje wo zachowanje a pěstowanje delnjoserbskeje rěče, mjez druhim za zestajenje słownikow, na hłownej zhromadźiznje minjeny pjatk w Bórkowach wuznamjenili.
Faworića so zakopolili
Policija (05.02.19)
Milinowy kašćik wuprózdnili
Lěska. Kable a relaisy we wulkim stilu wutwarili su njeznaći tele dny z milinoweho kašćika při železniskim přechodźe w Lěsce pola Wóslinka. Zmylka we wuhibkarni dla je sobudźěłaćerjam wobškodźenje w šaltowanskej připrawje napadnyło, čehoždla sej woni naležnosć bliže wobhladachu. Při tym zwěsćichu, zo běchu paduši dohromady 26 relaisow pokradnyli. Jich hódnotu trochuja na nimale 8 000 eurow.
Podłu saksko-pruskeje hranicy
Stróža. 200lětne stawizny měznikow podłu saksko-pruskeje hranicy su tema přednoška Hans-Joachima Gawora jutře, srjedu, w 19 hodź. w Stróžanskim Domje tysac hatow. Na nastork swojeje mandźelskeje je Gawor před lětami za měznikami pytać započał. Z planowaneho 20 kilometrow dołheho pućowanja pola Rakec nasta skónčnje 500 kilometrow dołha čara. Dlěje hač wosom lět je Gawor po bywšej saksko-pruskej hranicy pućował a wo tym nětko přednošuje. Zastup płaći dwaj euraj.
Wo serbskich slědach w cuzbje
Budyšin. Štwórtk, 7. februara, w 19.30 hodź. přednošuje Trudla Malinkowa, wědomostna sobudźěłaćerka Serbskeho instituta, w Budyskim „Wjelbiku“ wo temje „Na serbskich slědach po Awstralskej – Zaćišće z lońšeho wopyta pola serbskeju towarstwow na pjatym kontinenće“. Přednošk budźe w serbskej rěči, zastup je darmotny. Přeproša stawizniska sekcija Maćicy Serbskeje.
Zarjaduja konto za dary
Anekdoty wo angažowanej žonje
Čorny Chołmc (SiR/SN). „Dźiwje lěta Gertrud Wincarjoweje“ rěka kniha wo njewšědnje kuražěrowanej žonje, kotruž rady tež mać Krabatoweho młyna mjenuja. Dźakowano jeje wulkemu angažementej je so wizija jónkrótneho dožiwjenskeho statoka z woprawdźitosću stała. Knihu je Gertrud Wincarjowa minjeny pjatk w Krabatowym młynje předstajiła. Gaby Kohlmann je publikumej z njeje někotre anekdoty čitała.
