Budyšin. Po tym zo je Jordanowa rěčka w juniju po zliwku na zjawnych městnach a priwatnych ležownosćach Budyšina škody načiniła, planuje měšćanske zarjadnistwo w tym wobłuku škit před wulkej wodu. Dźěło pak je čas rubjace a zaběra wjacore zarjady. Tohodla chcedźa wobydlerjow jutře, štwórtk, wot 18 hodź. na žurli Budyskeho Kamjentneho domu wo tuchwilnym stawje planowanja informować. Nimo toho porěča wo tym, kotre škody w zjawnym wobłuku su mjeztym wotstronjene.

Wobornicy zaso zwučuja

Biskopicy. Wohnjowe wobory Budy­skeho wokrjesa budu přichodne dny zaso mobilnu wohnjowu zwučowansku připrawu wužiwać móc. Wot jutřišeho hač do 29. awgusta steji wona na terenje Biskopičanskeho wohnjowoborno-techniskeho centruma. W něhdźe 40 kwadratnych metrow wulkim kontejneru móža wohenje w stwě, kuchni, při płu­nowej připrawje a na dalšich městnosćach simulować. Wjace hač 320 wo­bornikow wokrjesa tam přichodne dny zwučuje.

Z kursom kurić přestać

Gmejna Łaz prócuje so wo wěcowne rozswětlenje Slěborny jězor nastupajo

Łaz (AK/SN). Po wulkim mrěću rybow w Slěbornym jězoru pola Łaza so tam połoženje nětko krok po kroku wolóža. Za kupanje w dowolenym wotrězku na južnym přibrjohu hižo žanych strowotniskich wobmyslenjow njeje. To podšmórny wjesnjanosta Thomas Leberecht (CDU) na wčerawšim posedźenju Łazowskeje gmejnskeje rady. Proby wody zašłych dnjow wujewichu, zo podźěl kislika zaso přiběra a wysoka ph-hódnota spaduje. „Tohodla je strowotniski zarjad warnowanje před kupanjom cofnył“, rjekny wjesnjanosta.

Holcy so nastróžiłoj

Róžant. Hižo minjeny pjatk je dotal nje­znaty muž dwě holcy w Róžeńće nastróžił. Dźěsći běštej popołdnju z psom susoda blisko putniskeje łuki po puću, jako po swojich wuprajenjach maskěrowaneho muža w kerkach wuhladaštej. Holcy stej so mócnje nastróžiłoj a so spěšnje wotsaliłoj. Cuzy jimaj z něšto metrami wotstawkom sćěhowaše, njeje pak jej narěčał. Policija je wo tym padźe hakle předwčerawšim zhoniła a pyta nětko za swědkami: Štó je minjeny pjatk blisko Róžeńčanskeje putniskeje łuki ćmowo­zdrasćeneho muža widźał? Pokiwy při­jimuje Kamjenski policajski rewěr pod telefonowym čisłom 03578/ 35 20, ale tež kóždy druhi policajski běrow.

Tež lětsa pytatej załožba Heinza Sielmanna a němske towarstwo Europarc přirodny dźiw Němskeje. Loni je ­Hornja Łužica myto dobyła, dokelž bě tu najwjac ludźi z Němskeje za łuku z dźiwimi gladiolemi při Dubjanskim lěsu hłosowało.

Stróža (SN/BŠe). Znowa titul přirodneho dźiwa Němskeje dobyć je skerje bjezwuhladne, wšako je po cyłej zwjazkowej republice wjele rjanych a wuznamnych městnosćow w přirodźe. Přiwšěm prócuje so biosferowy rezerwat Hornjołužiska hola a haty znowa wo titul, kotryž chce zakitować. Lětsa wuzwolichu sej zamołwići libele, kotrymž skića hornjołužiske haty přihódnu domiznu. Tři štwórćiny w Němskej dopokazanych družin powětrowych akrobatow su tu w regionje žiwe. Tema wotpowěduje tuž lětušemu hesłu wubědźowanja, z kotrymž pyta Heinza Sielmannowa załožba za poslednimi refugijemi wohroženych překasancow.