Slepo (AK/SN). Gmejna Slepo chce zaměrnje twarske ležownosće kupować, wotkrywać a zajimcam předać. Tak chcedźa předewšěm młodym swójbam móžnosć skićić so w komunje zasydlić. To podšmórny nawoda zarjada za planowanje, twarstwo a hórnistwo zarjadniskeho zwjazka Slepo Steffen Seidlich na njedawnym posedźenju gmejnskeje rady. Ta jednohłósnje wobzamkny, wobtwarjenski plan „Brězowski puć“ nastajić dać. Cyłkownje wosom ležownosćow móže tam nastać. Dotal maja pjeć zajimcow. „Zo bychu planowany cil zawěsćili, dyrbja plan zdźěłać. Tež wobswětowe pruwowanje maja za to přewjesć. Gmejnska rada wobzamknje jako planowanski zaměr wupokazanje małosydlišća“, rěka přispomnjenje we wobzamknjenju. Wobydlerjow chcedźa z wozjewjenjemi w zarjadniskim łopjenu zahe na projekće wobdźělić. Financować chce komuna nakup z njepře­trjebanych swójskich srědkow, kotrež běchu za wutwar šěrokopasmoweje syće interneta předwidźane. Wšako zwjazkowe knježerstwo mjeztym wutwar digitalneje syće na wsach stoprocentnje spěchuje.

Spěšnosć měrili

Błohašecy. Policija je minjeny štwórtk w Błohašecach spěšnosć měriła. Wuslědk je, zo bě 176 z cyłkownje 1 800 měrjenych šoferow dowolenu spěšnosć 50 kilometrow na hodźinu překročiło. Najnuznišo měješe wodźer transportera, kiž bě 48 km/h přespěšny. Jemu kiwaja ­měsac bjez jězbneje dowolnosće, dypkaj w Flensburgu a 200 eurow pokuty.

Jitkowsku a dalši wotrězk dróhi w Ralbicach w septembru sporjedźa

Ralbicy (SN/JaW). Gmejna Ralbicy-Róžant da dźěl Jitkowskeje a wjesneje dróhi ponowić. Kaž wjesnjanosta Hubertus Ryćer (CDU) radźićelow na zašłej zhromadźiznje w Ralbičanskej wohnjowobornej gratowni informowaše, je předwidźane wobnowić dźěl dróhi wot křižowanišća njedaloko Stadiona přećelstwa hač na kónc sportnišća. Za nadawk bě sej „cyłkownje šěsć firmow podłožki wupisanja na gmejnje wotwołało, ale jeničce tři su poskitk wotedali“. Financować chcedźa předewzaće ze spěchowanskich srědkow k porjedźenju pućow. Kaž radźićel Swobodneho wolerskeho zjednoćenstwa (SWZ) Delany Michał Šołta hišće raz rozłoži, su „za to srědki dweju lět do jedneje naprawy zwjazali“.

Čara cyłe 95 metrow stupała

W druhej połojcy 19. lětstotka za čas industrializacije twarjachu tež w Hornjej Łužicy železniske čary. Runočasnje nastachu dwórnišća, stražniske chěžki a wuhibkarnje. W lětnjej seriji so rozhladujemy, kak trěbne wone něhdy běchu a što je so z nimi stało. (11)

Hižo srjedź 19. lětstotka njeprócowachu so jenož Budestecy, ale tež wokolne gmejny w zajimje hospodarstwa wo železnisku čaru južnje Budyšina. Pahórkata krajina mjez 432 metrow wysokim Lu­binom a wo 40 metrow wyšim Mnišoncom pak bě planowarjam wulke wužadanje. 1863 trěbne podłožki sakskemu knježerstwu zapodachu a lěto pozdźišo su zamołwići přihłosowali, čaru ze statnych srědkow zapłaćić. Pod ćežkimi dźěłowymi wuměnjenjemi zapołožichu 1877 železnisku čaru, kotraž wot Budy­šina přez Dźěžnikecy hač do Wjelećina 95 metrow stupaše.