Po wjele lětach z minusom
Kulowska měšćanska rada wotličenje rjedźernje wopłóčkow schwaliła
Kulow (AK/SN). Sadźby za zakładny dawk A a B w Kulowje wostanu njezměnjene. To je Kulowska měšćanska rada minjenu srjedu rozsudźiła. Za zakładny dawk A za ratarske a lěsne płoniny płaći tuž dale sadźba 335 procentnych dypkow. Zakładny dawk B za wobtwarjomne ležownosće leži pola 420 procentnych dypkow. Přemysłowy dawk wobličeja dale z 370 procentnymi dypkami.
Konsekwentnje chce město Kulow swój dołh dale pomjeńšić. Tuchwilu tłóči tón z něhdźe 3 283 000 eurami na měšćansku pokładnju, štož wučinja 573 eurow na wobydlerja. Hač do kónca lěta 2020 chcedźa jón na 475 eurow na wobydlerja a cyłkownje 2 725 000 eurow pomjeńšić. „Tak zdobywa sej město wjac ruma za nowe inwesticije“, komornik Thomas Woelke radźićelam nadrobnje rozłoži.
Wuměnkarjo adwentničku swjećili
Worklecy (aha/SN). Worklečanska gmejna ma tučasnje 1 180 wobydlerjow. Dźesaćinu z nich móžeše wčera dopołdnja wjesnjanosta Franc Brusk (CDU) na adwentničku w swjedźensce pyšenej sportowni witać. Brusk wědźeše so dopominać, zo je gmejnska rada hižo za čas, jako bě wón hišće zastupowacy wjesnjanosta, wuměnkarjam dohodowne zarjadowanja poskićała. Tak činja to mjeztym 45 lět.
Dalše adwentne woknješko wotewrěchu wčera na Budyskich ...
Wšitko za strowotu
Krótkopowěsće (17.12.19)
Tež sakska SPD za koaliciju
Drježdźany. Po CDU je so tež krajna SPD za zhromadne sakske knježerstwo z CDU a Zelenymi wuprajiła. Po wčera wozjewjenym wuslědku sobustawskeho naprašowanja hłosowaše 74 procentow wobdźělnikow za koaliciju. Něhdźe 64 procentow přibližnje 5 000 hłosakmanych čłonow SPD je sobu wothłosowało, kaž strona wčera informowaše. Zeleni wozjewja swój rozsud štwórtk.
Měsćenki online rezerwować
Waršawa. Ze změnu jězbneho plana minjenu njedźelu poskića pólske železniske předewzaće „PKP Intercity“ nimo online-jězdźenkow, sej tež měsćenki w interneće rezerwować. Nimo toho je w mnohich spěšnikach darmotny WLAN k dispoziciji. Hač do lěta 2023 chce předewzaće 80 procentow swojich ćahow z internetnym přistupom wuhotować. https://www.intercity.pl/de/
Bal za bjezdomnych wotměli
Policija (16.12.19)
Do awta so zadobyli
Mały Wjelkow. Njeznaći su so pjatk w nocy do Renaulta zadobyli, kotryž bě na priwatnej ležownosći w Małym Wjelkowje wotstajeny. Kaž policija zdźěla, rozbichu paduši wokno awta, spakosćichu z njeho kapu, w kotrejž běchu tež móšnja, nawigaciski nastroj a kapsna lampa. Hódnotu rubizny trochuja zastojnicy na něhdźe tysac eurow, wěcna škoda wučinja 250 eurow.
1,8 promilow naměrili
Brěznja. Sobotu něhdźe wo połnocy je policija w Brězni chětro wopiteho wodźerja Toyoty zwěsćiła. Přewjedźeny test wunjese, zo měješe 50lětny 1,8 promilow alkohola w kreji. Wón dyrbješe tuž ze zastojnikami sobu, zo bychu jemu krej za dalši test wotewzali. Jězbnu dowolnosć mužej nablaku sćazachu. Nimo toho přepytuja přećiwo njemu wopiłstwa we wobchadźe dla.
Rejwarjo nuznje pytani
Budyšin (SN). Kamjentny dom w Budyšinje chce nowe lěto tež nowy rjad z rejwanskimi a hudźbnymi dźěłarničkami zahajić. Kaž jeho wjednistwo zdźěla, chcedźa pod hesłom „Artopolis“ Budyšin jako město rejwanja wuhotować. „Organizujemy zhromadnje z Korzymskej skupinu TanzART, z Jelenjogórskim kulturnym centrumom a profesionalnymi nawodami dźěłarničkow zetkanja zajimowanych młodostnych, němskich kaž pólskich“, pisa sobudźěłaćer Budyskeho Kamjentneho domu Michael Lippold. Zdobom wón na to skedźbnja, zo měrja so na młodostnych wot 14 lět. Započeć chcedźa z „wulkim zahajenjom“ kónc tydźenja 10. do 12. januara. Ma to być zazběh napjateho a kreatiwneho poł lěta, we wobłuku kotrehož chcedźa ze wšěmi wobdźělnikami inscenaciju „Woči wulkoměsta“ zdźěłać. „Zahajenje ma tomu słužić so rejujo zeznać a so w dźěłarničkach načasna a měšćanska reja a breakdance wukmanić. W februaru slěduja intensiwne workshopy, a tam zestajamy němsko-pólsku inscenaciju. W juniju chcemy ju předstajić.“
Na adwentne spěwanje
Zelena swěca za festiwal
Najebać lětuši minus chcedźa klětu znowa swjećić
Hamor (AK/SN). Na wuchodnym přibrjohu Bjerwałdskeho jězora w gmejnje Hamor přewjedu klětu wot 30. julija do 2. awgusta dalši openair-festiwal „Break the rules“. Jednohłósnje je Hamorska gmejnska rada na swojim minjenym posedźenju wobzamknyła, za to wotzamknyć wužiwanske zrěčenje mjez gmejnu a zarjadowarjom GBG GmbH z Niskeje. Tak sćěhowaše wona poručenje Klětnjanskeje (Klitten) wjesneje rady. Potrjechenych wobsedźerjow płonin pak ma zarjadowar sčasom do přihotow zapřijeć.
Na lětuši prěni festiwal bě něhdźe 6 500 hosći přišło, 5 500 z nich wužiwaše campingownišćo. Cyłkowne kóšty festiwala wučinjachu 745 000 eurow. „Sumu dawno njejsmy z dochodami kryć móhli. To pak běchmy zaplanowali“, rozłoži organizator swjatka a jednaćel firmy GBG Toni Heide. „Festiwal trjeba dołhodobne přihoty. Z nazhonjenjow wěmy, zo trjebaš dwě do tři lěta, prjedy hač čorne ličby pisaš.“
