Seniorow na adwentničce zawjeselili
Mjeztym zo je Pančičansko-Kukowska gmejnska rada hižo wot časa politiskeho přewróta swojich wuměnkarjow wjacore razy na adwentne zarjadowanja přeprosyła, bě to wčera popołdnju šesty raz, zo to mjeztym kóždolětnje činja.
Pančicy-Kukow (aha/SN). 120 wuměnkarjow Pančičansko-Kukowskeje komuny móžeše wjesnjanosta Markus Kreuz (CDU) wčera na hodownje wupyšenej žurli wohnjoweje wobory witać. Wón wuži składnosć a předstaji senioram derje zestajenu prezentaciju wo podawkach a zdokonjanym minjenych pjeć lět.
Na „wikach rjanych wěcow“ w Budyskim „Zelenym pysku“ a w ...
Zwisowaca hudźbna stawizna(21)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim serialu Serbskich Nowin je předstajamy.
Krótkopowěsće (11.12.19)
Měto Pernak zemrěł
Berlin. Měto Pernak, předsyda Maśicy Serbskeje wot jeje nowozałoženja 1993 hač do 2006, je minjenu njedźelu 81lětny w Berlinje zemrěł. W błótowskej Nowej Niwje rodźeny Delnjoserb bě gymnazialny wučer w Berlinje a bu lěta 2009 z Mytom Ćišinskeho počesćeny. W Ludowym nakładnistwje Domowina su někotre knihi z jeho pjera wušli.
Pjata namołwa wozjewjena
Drježdźany. Za program „Witalne wjesne jadra a městne centrumy we wjesnej kónčinje“ přewostaji Sakska klětu dalše 25 milionow eurow. Pjatu programowu namołwu je sakske ministerstwo za wobswět a ratarstwo wčera wozjewiło. Wot lěta 2016 bu dotal za 159 předewzaćow nimale 60 milionow eurow nałoženych, mjez druhim lětsa za dwórnišćowe twarjenje w Budestecach.
Piwo město sněhakowarjow
Wo ratarskej situaciji zhonili
Skónčnje zaso bjez wobjězdkow k tworni dojěć
Kamjenc (UM/SN). Někotrym šoferam drje wčerawši dźeń jako špatny w pomjatku. Zawěsće ze zwučenosće su woni swoje awta na kromje Kamjenskeje Sewjerneje hasy wotstajili, njeposrědnje při nowej tworni awtowych baterijow firmy Deutsche Accumotive. Ta wšak bě dotal twarskich dźěłow dla zawrjena. Hižo dlěje pak běchu škórcy z Kamjenskich třěchow fifolili, zo so wutwar dróhi přez přemysłownišćo při Wolacej hórce do směra na Běłu (Biehla) nachila.
Policija (10.12.19)
Něhdźe tysac eurow škody
Nowa Wjes. Njeznaći su so minjeny kónc tydźenja do zawoda w Nowej Wsy pola Rakec zadobyli. Kaž policija zdźěla, wobškodźichu skućićeljo najprjedy groćany płót, zo bychu so na areal firmy na Hermančanskej dóstali. W běrowowym twarjenju přepytachu wšitke rumnosće. Spakosćili su po informacijach policije 600 eurow hotowych pjenjez, kluč za generatorowu budku kaž tež kapsnu lampu. 57lětny škodowany trochuje wěcnu škodu na něhdźe tysac eurow. Zastojnicy su wjacore slědy zawěsćili. Kriminalna policija pad nětko přepytuje.
Spěšnje so přizjewić
Worklecy. Jězbu na swětoznate pasionske hry do Oberammergauwa (njedaloko Mnichowa) za serbskich młodostnych přihotuje tuchwilu Worklečanske dekanatne młodźinske dušepastyrstwo. Wuprawa budźe wot 8. do 10. meje 2020, z wotjězdom pjatk nawječor. Kaž z běrowa Worklečanskeho dušepastyrstwa rěka, smědźa so tež 15lětni wobdźělić. Młodostni změja tam składnosć sej generalku wobhladać. Wšitcy 15- do 26lětni dóstanu zastupny lisćik, kotryž hewak znajmjeńša 150 eurow płaći, za 24 eurow. Po předstajenju budu so samo z dźiwadźelnikami rozmołwjeć móc. Zajimcy njech so hač do jutřišeje srjedy, 11. decembra, w běrowje Worklečanskeho dekanatneho młodźinskeho dušepastyrstwa a e-mailnje pod přizjewja. Dalše informacije k jězbje su tež pod www.jugendtage-passionsspiele.de přistupne.
Wuslědki slědźenjow
Wo dźěle Hilžbjetkow zhonili
Njebjelčicy (aha/SN). Po njedźelnym nyšporje w Njebjelčicach poda so wjetšina tam so modlacych zhromadnje z wosadnym fararjom Michałom Nawku na žurlu „Bjesady“. Hižo wot časa do politiskeho přewróta je z wašnjom, zo Njebjelčanska gmejnska rada swojich wuměnkarjow druhi adwent na adwentničku přeproša. Něhdźe 50 ludźi ze wšěch wjesnych dźělow gmejny je tónraz přišło.
Zastupowacy wjesnjanosta Tomaš Klar (CDU) poda přitomnym přehlad wo najwažnišich inwesticijach a spjelnjenych nadawkach minjenych měsacow. Tak bu wohnjowa wobora z nowym hašenskim jězdźidłom wuhotowana, zo bychu jeje hotowosć hišće spušćomnišo zaručić móhli. W meji je sakska statna ministerka Petra Köpping (SPD) Njebjelčicy wopytała a podpěru wjacorych projektow připrajiła. Dale rozprawješe Klar wo poćahach gmejny do afriskeho kraja Benin, zwotkelž přebywaše w nowembrje delegacija w Njebjelčicach. A tuchwilu su tam z wjesnjanostu Tomašom Čornakom (CDU) fachowcy gmejny, zo bychu so na wjacore konkretne naprawy na polu ratarstwa, kwalifikacije personala a k zawěsćenju klimy a wobswěta dojednali.
