Spalowski móst za motorizowany wobchad zawru
Wojerecy (SN). Spalowski móst budźe hišće do hód za motorizowany wobchad zawrjeny. Na to stej so měsće Wojerecy a Kulow, na kotrejuž komunalnej mjezy móst leži, dojednałoj. Tež Ćišćanska wjesna rada postupowanje w naležnosći podpěruje. Město Wojerecy informuje wo tym w medijowej zdźělence.
Jako přičinu mjenujetej komunje špatny twarski staw mosta, kotryž Spale z Ćiskom hižo dlěje hač poł lětstotka zwjazuje. „Aktualny wuslědk pruwowanja mosta je Wojerecy a Kulow pohnuł, wo dalšich kročelach k jeho zachowanju rozmyslować. Pruwowanje wunjese mostej znamku 3,5 nastupajo twarski staw. Wěstota twara samo na sebi kaž tež wěstota za wobchad stej tuž chětro wohroženej. Směmy móst jenož potom wobstajnje dale wužiwać, hdyž nowy natwarimy“, Wojerowski nowinski rěčnik Bernd Wiemer w zdźělence rozłožuje. Zwuporjedźeć móst pak je po informacijach města njehospodarske, a za nowotwar pobrachuja pjenjezy. „Wojerecam kaž tež Kulowej njeje móžno srjedźodobne trěbne resursy za nowotwar mosta nałožić“, Wiemer potwjerdźa.
Policija (20.12.19)
Hnydom tři swinje naraz
Nowa Łuka. Njelubozne zetkanje z hnydom třomi dźiwimi swinjemi dožiwi 48lětny wodźer awta předwčerawšim rano pola Noweje Łuki. Kaž policija zdźěla, njemóžeše so wón rano wokoło šesćich zražce z nimi hižo wuwinyć. Šoferej so na zbožo ničo njesta, wšitke tři dźiwje swinje pak na městnje njezboža zahinychu. Škoda na awće wučinja něhdźe 4 000 eurow.
Na koncert z Emmerlichom
Lubij. 4. adwentnu njedźelu w 16 hodź. wotměje so w Lubijskej Mikławšskej cyrkwi swjedźenski adwentny koncert ze spěwarjom Guntherom Emmerlichom. Jemu poboku budźe sopranistka Jeanne Pascale Schulze. Pod nawodom komorneho hudźbneho direktora Christiana Kühny přewodźa Emmerlicha Collegium canorum Lobaviense a hudźbnicy na trompeće, cellu, klawěrje a pišćelach. Zaklinča arije a duety Händela, Bacha a Mozarta.
HC Schmidt čita ruske bajki
Slepo. Na powědanje starych ruskich bajkow móža so dźěći kaž tež jich starši a dalši njedźelu w 16 hodź. w Slepjanskim Serbskim kulturnym centrumje wjeselić. Připowědźił je so dźiwadźelnik a spěwar HC Schmidt, zo by publikum zakuzłał.
Klětu chcedźa žurlu zwottorhać
Pančicy-Kukow (SN/mwe). Na swojim lětsa poslednim zjawnym posedźenju su radźićeljo gmejny Pančicy-Kukow wčera nawječor w awli Šule Ćišinskeho wobzamknyli, „wjesnjanostu Markusa Kreuza (CDU) społnomócnić, zo podpisa inženjerske zrěčenje wo wukonach k wozrodźenju ležownosće něhdyšeho hosćenca w Pančicach-Kukowje.“ Do zrěčenja zapisane su pomnikoškitne naprawy, wotpadkowe proby a laborowe analyzy, planowanje schodow, kwartěry njetopyrjow a dalše naprawy. Zaměr dźě je, zo gmejnska rada na posedźenju klětu 6. februara zwottorhanske nadawki wotpowědnym firmam přepoda. Tak móhli njeposrědnje po tym započeć stary hosćenc zwottorhać. Spěchowanja k tomu hižo dlěje předleža. To nastupa tež pozdźiše wuhotowanje ležownosće jako zelenišćo bjez twarjenja runje tak kaž zachowanje historiskeje šćežki k Pančičanskemu sportnišću.
Na přichod přihotowani
Trjebinska wohnjowa wobora je hladajo na wuhotowanje a tuchwilne čłonstwo za přichod derje nastajena.
Trjebin (CK/SN). Cyłkownje 19 zasadźenjow měješe Trjebinska wohnjowa lětsa zmištrować. Tak běchu ju dźewjeć razow k wohenjam wołali, z čehož běchu tři samo wulkowohenje. Dwójce mějachu ze swojej techniku pomoc skićić a wězo mějachu tež raz pod prawymi wuměnjenjemi zwučować. Štož wobornicy tak rady nimaja, přiwšěm pak so tón stajnje zaso jewi je wopačny alarm. Tež tajkeho dla dyrbjachu lětsa jónu won. Dwójce běchu alarmowe připrawy zaskočili, wuchadźa z rozprawy wo skutkowanju wobory nawody Thomas Husse. Kaž wón na njedawnej hłownej zhromadźiznje rjekny, organizuje wobora nimo toho dźěłowe zasadźenja, swjedźenje a wšelake serbske nałožki.
Móža swójski podźěl pomjeńšić
Njewočakowany wulki dar za nowy lift w Ralbičanskej šuli
Ralbicy (SN/JaW). Takrjec swoju wosobinsku hodownu stawiznu we woprawdźitym zmysle słowa je wčera gmejnska rada Ralbic-Róžanta dožiwiła. A to hnydom dwójce. Na swojim wuradźowanju w Ralbičanskej starej šuli móžachu wjacore dary k zarunanju kóštow zatwara šulskeho lifta přiwzać. Kaž zastupowacy wjesnjanosta Michał Šołta (SWZ Delany), kotryž zhromadźiznu nawjedowaše – wjesnjanosta Hubertus Ryćer (CDU) je na dowolu –, zwurazni, jedna so wo cyłkownu sumu nimale 8 300 eurow, kotruž su Ralbičanscy šulerjo na swójsku iniciatiwu nazběrali. Prěni raz wotměchu tam mjenujcy „běh z wutrobu“. „Wučerjo běchu mysličku zrodźili a so šulerjow prašeli, što k tomu měnja. Kaž direktorka Milenka Koberowa w rozmołwje rjekny, su wšitcy hnydom za to byli a sej sponsorow w swójbje a mjez přiwuznymi pytali, kotřiž jim na běžane stadionowe koło wěsty obolus płaća“, Šołta rozłoži.
Krótkopowěsće (20.12.19)
Kretschmer wuzwoleny
Drježdźany. Michael Kretschmer (CDU) je dotalny a nowy ministerski prezident Swobodneho stata Sakskeje. Krajny sejm je jeho na spočatku swojeho dźensnišeho posedźenja wuzwolił. Za Kretschmera hłosowaše 61 zapósłancow, šěsć mjenje, hač ma nowa koalicija CDU, Zwjazka 90/Zelenych a SPD, při 57 „ně“-hłosach. Po wuzwolenju je prezident sakskeho sejma dr. Matthias Rößler (CDU) je Michaela Kretschmera spřisahał.
Dalše spěchowanje přilubił
Berlin. Nowe zrěčenje wo financowanju Załožby za serbski lud steješe wčera w srjedźišću rozmołwy čłonow jeje parlamentariskeje přirady Marka Šimana (CDU) a Klaus-Petera Schulzy (SPD) ze statnym sekretarom zwjazkoweho nutřkowneho ministerstwa Stephanom Mayerom. Kaž Šiman zdźěli, njeje Mayer žane konkretne ličby mjenował, přilubi pak serbske naležnosće dale sylnje spěchować.
Zeleni z wulkim přihłosowanjom
Po wuchodźe putnikował
Chrósćicy. Něhdźe tysac kilometrow dołhi je Jakubowy puć podłu historiskeje Via regije wot ukrainskeje hranicy přez Pólsku hač do Zhorjelca. Po tej čarje je prof. Gerd Gellißen w dwěmaj wotrězkomaj pěši putnikował, a to w lětomaj 2017 a 2018. Wo tym přednošuje emeritowany profesor, horliwy putnik a prezident Bratstwa swjateho Jakuba z Düsseldorfa, z wobrazami přichodnu sobotu, 21. decembra, w 19.45 hodź w Chróšćanskej putniskej hospodźe. Nimo wosobinskich dožiwjenjow Gellißen tohorunja wopisuje, što putniska šćežka ze swojej přirodu, stawiznami a wuměłskimi stawiznami skići. Wutrobnje přeprošeni su wšitcy putnicy, tajcy, kotřiž chcedźa so hakle z putnikom stać, a wězo tež wšitcy zajimcy zbliska a zdaloka.
Tohorunja sobotu, ale hižo w 16 hodź., su najmłódši znowa na bajku do Chróšćanskeje putniskeje hospody prošeni. Ćeta Monika baje jim tónraz wo „Třoch přećach“.
Popołdnjo krótkofilmow
Policija (19.12.19)
Z 1,6 promilemi po měsće
Kamjenc. Při kontroli na Kamjenskej Macherowej lepichu policisća wčera w nocy 18lětneho šofera Renaulta, kiž njebě hižo kmany awto wodźić. Wotpowědny test wunjese, zo měješe młodostny 1,6 promilow alkohola w kreji. Papjery sćazać jemu njemóžachu, dokelž njeměješe je při sebi, awto bě sej požčił.
Chcedźa přichodnje hišće wušo hromadźe dźěłać
Zhorjelc (SN). Wyši měšćanosća wyšeho centralneho měšćanskeho zwjazkarstwa Budyšin-Zhorjelc-Wojerecy (OSZV) chcedźa hišće wušo hromadźe dźěłać. To wobzamknychu Alexander Ahrens (SPD), Octavian Ursu (CDU) a Stefan Skora (tohorunja CDU) na swojim njedawnym dźěłowym zetkanju w Zhorjelcu.
Kaž zarjad za medijowe dźěło a marketing města Budyšina tele dny zdźěli, tworješe srjedźišćo wuradźowanjow, zdźěłać regionalny wuwićowy a jednanski koncept za region zwjazkarstwa. Koncept spěchuja z pomocu směrnicy za regionalne wuwiće. Z nim chcedźa sylnosće a potencial wobdźělenych třoch městow za wuwiće regionalneho ruma a sylnjenje Hornjeje Łužicy jako region podšmórnyć. Dźěło za region sej města runohódnje dźěla, a to na zakładźe mjjenowaneho koncepta.
