Předstaji swoju disertaciju
Budyšin. Ze zajimawym aspektom sakskich stawiznow móža so wopytowarjo Budyskeho archiwneho zwjazka jutře, wutoru, rozestajeć. Wot 19 hodź. přednošuje dr. Franziska Böhl na Hrodowskej 12 wo wuwiću swobodnomurjerjow (Freimaurer) po 1918. Sakska bě jedne srjedźišćo swobodnomurjerstwa. Nimale dwaj lětstotkaj bě tónle zwjazk dale a woblubowaniši. Nacionalsocialisća pak jón zakazachu, tež za čas NDR wón dowoleny njebě. Dr. Böhl je so z tematiku w swojej disertaciji zaběrała.
Diskutuja wo swójbje
Smochćicy. Cyle w znamjenju swójby steji diskusijny wječor we wobłuku Smochčanskeje zymskeje akademije štwórtk, 6. februara, w 19.30 hodź. w Domje biskopa Bena. Z hosćom budźetaj mandźelska sakskeho ministerskeho prezidenta Annett Hofmann a arcybiskop dr. Heiner Koch. W srjedźišću wječora steji prašenje, kak hodźi so w pluralistiskej towaršnosći z jeje wšelakimi žiwjenskimi pućemi identita zachować a nazhonić a kak móžetej cyrkej a towaršnosć swójbu lěpje připóznawać.
Policija (03.02.20)
Wopity znjezbožił a ćeknył
Budyšin. W nocy na njedźelu je 25lětny muž w Budyšinje alkoholej chětro přirěčował. To pak jeho njewotdźerža so za wodźidło swojeho awta sydnyć a domoj jěć. Na Jordanowej zrazy wón do parkowaceho VW Golfa, při čimž načini něhdźe tysac eurow škody, a ćekny. Wobsadka policajskeho awta pak winika bórze na to wuslědźi a naměri njesnadne 2,4 promile alkohola w kreji młodeho muža. Jězbnu dowolnosć jemu zastojnicy wězo nablaku sćazachu.
Zakład dobrych wunoškow
Bursa symjenja zajimcow w bohatej ličbje přiwabiła
Njebjelčicy (JK/SN). Wčerawšu njedźelu, kotrejež wjedro po mnohich přisłowach a burskich kaznjach wo spočatku nalěća rozsudźa, měrješe so wulka ličba lubowarjow zahrodkow a wunošnych rostlin do Njebjelčic. Tam bě towarstwo Kamjenjak zaso organizowało prěnju lětušu symjenjowu bursu. Hižo wjele awtow před gmejnskim zarjadom pokazowaše na wulki zajim za tele zarjadowanje. A wopytowarjo njebuchu přesłapjeni. Zaso běchu stari kaž młodźi zahrodkarjo a plahowarjo zeleniny a kwětkow z najwšelakorišim symjenjom přichwatali. Kaž hižo w minjenych lětach dominowachu wšelake družiny tomatow, papriki a kirbsow. Zajimcy mějachu z městnami ćeže, so hač k blidam z poskitkom předrěć, tak hoberski bě nawal.
Štyrceći lět wobstaća Don Boskoweho domu su minjeny pjatk we ...
Krótkopowěsće (03.02.20)
Nowa wopytowarska adresa
Budyšin. W přetwarjenym a njedawno přepodatym nowym Budyskim dwórnišću su wot dźensnišeho socialny a młodźinski zarjad kaž tež zarjadaj za přizwolenje jězdźidłow a za jězbnu dowolnosć Budyskeho krajnoradneho zarjada přistupne. Wopytowarjo maja 70 krótkočasowych parkowanskich městnow k dispoziciji, z nich šěsć za zbrašenych.
Koalicija šansu zapasła
Budyšin. Zwjazkowy sejm je minjeny pjatk próstwu frakcije FDP wotpokazał, w kotrejž sej mj. dr. žadachu železnisku čaru Drježdźany-Zhorjelc elektrifikować a na prioritnu lisćinu přiwzać. Čara słuša k 13 projektam z narodnym wuznamom, a tak móhli jón ze zakonjom wo spěšnišim planowanskim jednanju zwoprawdźić. Šansu pak je koalicija zapasła.
Wobmjezuje posłužby
Policija (31.01.20)
Z kolesom po awtodróze
Budyšin. Normalnje rozestajeja so zastojnicy Budyskeho awtodróhoweho policajskeho rewěra z přeńdźenjemi šoferow wosobowych abo nakładnych awtow. Předwčerawšim pak dyrbjachu so z kolesowarjom zaběrać. Tón bě mjenujcy dopołdnja na awtodróze A 4 do směra na Drježdźany po puću. Wobsadka policajskeho awta zadźerža 75lětneho blisko wotbóčki Budyšin-wuchod a jemu pomhaše awtodróhu wopušćić. Nimo toho jeho powučichu, zo jako kolesowar na awtodróze ničo pytać nima.
Přistupja drustwu
Ze strukturnej změnu widźa wulku šansu
Njebjelčicy (JK/SN). Z dwěmaj napřećiwnymaj hłosomaj je Njebjelčanska gmejnska rada na swojim wčerawšim posedźenju wobzamknyła, zo přistupi gmejna Łužiskemu energijowemu drustwu. Hladajo na to, zo chce komuna sama energijowy koncept nastajić, widźi wjesnjanosta Tomaš Čornak (CDU) w čłonstwje drustwa wulke lěpšiny. Drustwo poradźuje w naležnosćach energetiskeho zastaranja w regionje a nakupuje a wikuje z regionalnej energiju. Tak chce zastaranje z energiju, wosebje milinu, decentralizować a přewažnje regionalnu energiju k zastaranju zasadźeć. Njebjelčanska gmejna widźi w tym wulke šansy, hladajo na strukturnu změnu we Łužicy. Přichodnu wutoru, 4. februara, w 19 hodź. wotměje so k energetiskemu konceptej komuny informaciske zarjadowanje w gmejnskej sydarni. K tomu su wobydlerjo gmejny a dalši zajimcy wutrobnje přeprošeni.
Běła Woda hosći wosebje wita
Zo druhdy trochu dlěje traje, prjedy hač je komunalny projekt zwoprawdźeny, njeje ničo noweho. Druhdy pak su zadźěwki tajke, zo je tež měšćanske zarjadnistwo wobwliwować njemóže.
Běła Woda (CK/SN). Skónčnje připrawjene su nowe informaciske tafle na kromje Běłeje Wody. Na pjeć tajkich dypkach posrědkuja stajnje na šěsć taflach zajimawe informacije wo Běłej Wodźe a wokolinje. W měsće skleńčerjow z dźensa hišće 16 000 wobydlerjemi skedźbnjeja mjez druhim na kołopuć z dwanaće cilemi, kaž su to škleńčerski muzej, lodowa arena a lěsna železnica. Na dalšej karće je kolesowanska čara z 13 dypkami kołowokoło města rozkładźena. Tež pólske město Żary so na tajkej tafli předstaja.
Nowy „šulski dwór zetkawanja“ su wčera w Radworju přepodali. ...
Krótkopowěsće (31.01.20)
Wušo hromadźe dźěłać
Hradek nad Nisou. Zwjazkowa policija chce z čěskimi kolegami w Liberecskim kraju wušo hromadźe dźěłać. Zastupjerjo wobeju stronow su wčera w pomjeznym Hradeku nad Nisou stejnišćo za přichodne zhromadne policajske słužbne zarjadnišćo wopytali. Tehdy je tam policija za cuzych swój domicil měła, kaž mjenuja zarjad za wukrajnikow w Čěskej.
BUND peticiju přepodał
Drježdźany. Swoju peticiju „Brunicu stopować – jamy pomjeńšić“ je Zwjazk za wobswět a přirodoškit Němskeje (BUND) w Sakskej prezidentej krajneho sejma Matthiasej Rößlerej (CDU) srjedu oficialnje přepodał. Peticiju z lońšeje pózdnjeje nazymy je njecyłych 1 300 ludźi podpisało, kotřiž so za kónc wudobywanja a wužiwanja wuhla a tak přećiwo klimowej změnje zasadźeja.
Jamu Turów njerozšěrić
